ភ្នំពេញ៖ យ៉ាងហោចណាស់មានយានយន្តជាង ១៩ ម៉ឺនគ្រឿងធ្វើចរាចរណ៍លើផ្លូវល្បឿនលឿនភ្នំពេញ-ព្រះសីហនុ រយៈពេល ១៥ថ្ងៃ គិតចាប់ពីថ្ងៃបើកដំណើរការកាលពីថ្ងៃទី០១ ខែតុលា ដល់ថ្ងៃទី១៥ ខែតុលាឆ្នាំ២០២២នេះ។
នេះបើទំព័រហ្វេសប៊ុករបស់ក្រសួងសាធារណការនិងដឹកជញ្ជួននៅថ្ងៃទី១៧ខែតុលាឆ្នាំ២០២២នេះ។
ក្រសួងសាធារណការបន្តថា ការធ្វើចរាចរណ៍លើផ្លូវល្បឿនលឿនមានករណីគ្រោះថ្នាក់មានត្រឹមតែ ០,០០៤%តែប៉ុណ្ណោះ បើធៀបនឹងទំហំចរាចរណ៍ដែលបានកត់ត្រា។
សូមជម្រាបថា ក្នុងចំណោមយានយន្តចំនួនជាង ១៩ម៉ឺនគ្រឿងដែលបានចរាចរណ៍ក្នុងរយៈពេល១៥ថ្ងៃចុងក្រោយនេះ ម្ចាស់យានយន្តបានហៅទូរស័ព្ទសុំប្រឹក្សាយោបល់ សាកសួរព័ត៌មាន និងស្វែងរកជំនួយសង្គ្រោះមកកាន់លេខ ១៣៩៩ សរុបមានចំនួន ៥០៦ខ្សែ។
ជាមួយគ្នានេះដែរ ក្រសួងសាធារណការ និងដឹកជញ្ជូន ស្នើឱ្យប្រជាពលរដ្ឋគ្រប់រូបចូលរួមស្វែងយល់ និងអនុវត្តតាមសេចក្តីណែនាំឱ្យបានម៉ឺងម៉ាត់ចំពោះគ្រប់លក្ខខណ្ឌក្នុងការបើកបរលើផ្លូវល្បឿនលឿននេះ និងគោរពច្បាប់ចរាចរណ៍ឱ្យបានខ្ជាប់ខ្ជួន ដើម្បីការធ្វើដំណើររបស់បងប្អូនប្រកបដោយភាពសប្បាយរីករាយ និងសុខសុវត្ថិភាព៕
