លោក ម៉ាក ហ្ស៊ុកឃើប៊ើក (Mark Zuckerberg) បានបង្កើតឱ្យមាននូវអាទិភាពកំពូលក្នុងការប្រើប្រាស់អ៊ិនធឺណែតជាសកលតាមរយៈគម្រោង Internet.org របស់ហ្វេសប៊ុក។ ឥឡូវនេះលោកកំពុងប្រើប្រាស់ទ្រព្យសម្បត្តិផ្ទាល់ខ្លួនរបស់លោកមួយចំនួន ដើម្បីពង្រីកការប្រើប្រាស់អ៊ិនធឺណែតល្បឿនលឿននៅសហរដ្ឋអាមេរិក។
ក្រុមការងារដែលមិនស្វែងរកប្រាក់កម្រៃមួយ ដែលជួយចាប់ពីសាលាមត្តេយ្យដល់ថ្នាក់ទី១២ ដោយទទួលបានពីមូលនិធិសហព័ន្ធ ដើម្បីពង្រឹងការទាក់ទងតាមអ៊ិនធឺណែតល្បឿនលឿន ត្រូវបានប្រកាសដោយលោក ម៉ាក ហ្ស៊ុកឃើប៊ើក និងប្រពន្ធរបស់គាត់គឺលោកស្រីវេជ្ជបណ្ឌិតព្រីស៊ីឡា ចាន់ (Priscilla Chan) ក្នុងការបរិច្ចាគប្រាក់ចំនួន ២០ លានដុល្លារ។ ក្រុមនេះបានទទួលជាអំណោយនូវទឹកប្រាក់ចំនួន ៣ លានដុល្លារដែរ កាលពីឆ្នាំ ២០១៣ សម្រាប់គម្រោង ដែលមានឈ្មោះថា EducationSuperHighway។
លោក ហ្ស៊ុកឃើប៊ើក ជាសហស្ថាបនិក និងជាប្រធាននាយកប្រតិបត្តិរបស់ក្រុមហ៊ុនហ្វេសប៊ុក ដែលគាំទ្រដល់គោលដៅរបស់ក្រុមនោះ ក្នុងអត្ថន័យនៃគោលដៅផ្សព្វផ្សាយចុងក្រោយពី «ការរៀនស្វែងយល់ដោយផ្ទាល់»។
បើតាមលោក ជែន ហូលើរែន (Jen Holleren) នាយកប្រតិបត្តិរបស់ Startup បានឱ្យដឹងថា៖ «ម៉ាក និងព្រីស៊ីឡា ជឿថាការបំពាក់នូវការតភ្ជាប់អ៊ីនធឺណែតដល់ថ្នាក់រៀនពីកម្រិតមត្តេយ្យដល់មធ្យមសិក្សានេះ គឺមានសារៈសំខាន់ដល់សិស្សចំពោះការលូតលាស់ពីសេដ្ឋកិច្ចចំណេះដឹង»។
EducationSuperHighway ជាក្រុមដែលទទួលបានការបរិច្ចាគពីលោក ម៉ាក និងប្រពន្ធរបស់គាត់ ត្រូវបានបង្កើតឡើងក្នុងឆ្នាំ ២០១២ ដោយ អ៊ីវ៉ាន ម៉ាវែល (Evan Marwell) សហគ្រិននៃ Startup។
កាលពីខែកញ្ញា ហ្វេសប៊ុកបានប្រកាសថាខ្លួនបានធ្វើការជាមួយ Summit Public Schools ក្នុងតំបន់ឈូងសមុទ្រសានហ្វ្រានស៊ីស្កូ ដើម្បីអភិវឌ្ឍនូវវេទិកាមួយក្នុងការជួយសម្រួលដល់ ការរៀនស្វែងយល់ដោយផ្ទាល់ ដែលមានបំណងបង្កើតឱ្យមាននៅកម្រិតជាតិ។
លោក ហ្ស៊ុកឃើប៊ើក និងវេជ្ជបណ្ឌិតផ្នែករោគកុមារ ព្រីស៊ីឡា ចាន់ បានចាប់ផ្ដើមផ្ដល់ដល់គម្រោងនានាដែលទាក់ទងនឹងការអប់រំក្នុងឆ្នាំ ២០១០ ជាមួយនឹងការបរិច្ចាគជាទឹកប្រាក់ចំនួន ១០០ លាន ដុល្លារទៅដល់សាលារដ្ឋ នៅ នីវ៉ាក (Newark) និងបានសន្យាថានឹងចំណាយទឹកប្រាក់ ១២០ លានដុល្លារបន្ថែមទៀតដល់គម្រោងអប់រំនៅតំបន់ឈូងសមុទ្រ។
កាលពីខែតុលា ពួកគេបានប្រកាសពីគម្រោងថ្មីមួយ ហៅថា «The Primary School» ដែលជាសាលាកម្រិតមុនមត្តេយ្យសិក្សដល់កម្រិតវិទ្យាល័យ ដែលជួយដល់សហគមន៍ចំនួនពីរដែលរកប្រាក់ចំណូលបានទាប នៅជិតការិយាល័យកណ្ដាលក្រុមហ៊ុនហ្វេសប៊ុក។ ថ្លៃសាលាដែលឥតបង់ថ្លៃ ចំពោះការចុះឈ្មោះចូលរៀននៅខែសីហាខាងមុខ នឹងរួមបញ្ចូលពីការអប់រំជាមួយការថែទាំសុខភាព និងការទ្រទ្រង់ដល់គ្រួសារ។
នៅឆ្នាំ ២០១៣ ក្រោយពីការវិភាគនៃតេស្តចំនួន ៨ សែន រួចមក អ្នកវិភាគពី EducationSuperHighway បានសន្និដ្ឋានថាមានត្រឹមតែ ៣០% ប៉ុណ្ណោះ នៃសាលាក្នុងស្រុករបស់អាមេរិក ដែលមានប្រប្រាស់អ៊ិនធឺណែត ដែលបង្កើតឡើងដោយគណៈកម្មការសារគមនាគមន៍សហព័ន្ធ គឺចំនួន ១០០ គីឡូប៊ីត ក្នុង ១ វិនាទី សម្រាប់សិស្សម្នាក់។
ក្នុងឆ្នាំ ២០១៣ ដដែលនោះ លោកប្រធានាធិបតី បារ៉ាក់ អូបាម៉ា បានប្រកាសពីគំនិតផ្ដួចផ្ដើមមួយឈ្មោះថា ConnectED ជាមួយនឹងគោលដៅផ្ដល់ឱ្យចំនួន ៩៩% នៃសិស្សនៅសហរដ្ឋអាមេរិក នូវការតភ្ជាប់ជាមួយសេវា Broadband នាឆ្នាំ ២០១៨ខាងមុខ។
តាមរយៈកម្មវិធីនោះ គណៈកម្មការគឺកំពុងបង្កើតនូវមូលនីធិដែលមានទឺកប្រាក់ចំនួន៥ រយលាន ដុល្លារ ក្នុងពេល ៥ ឆ្នាំ ពិសេសគឺប្រព័ន្ធ Wi-Fi សម្រាប់សាលារៀន និងបណ្ណាល័យ ហើយទឹកប្រាក់ចំនួន ១.៥ រយលាន ដុល្លារ ទៀត ទុកសម្រាប់ទ្រទ្រង់ដល់ការតភ្ជាប់ល្បឿនលឿន។ លើសពីនេះ ក្រុមហុនឯកជនបានប្ដេជ្ញាថាទឺកប្រាក់ជាង ២.២៥ រយលានទៀតគឺសម្រាប់កម្មវិធី Hardware, Software, និងសេវាកម្ម Wireless។
បច្ចុប្បន្ន ៧៧% នៃសាលាក្នុងស្រុក បានផ្ដល់ឱ្យសិស្សនូវការតភ្ជាប់អ៊ីនធឺណែតសហព័ន្ធហើយ ដែលជារបាយការណ៍ថ្មីមួយពីក្រុមការងារបានធ្វើការសន្និដ្ឋាន។
បើតាមប្រធានក្រុមប្រឹក្សាសេដ្ឋកិច្ចជាតិនៅសេតវិមាន លោក ជែហ្វ ហ្សេនត៍ (Jeff Zeints) បានឱ្យដឹងថា៖ «វាត្រឹមតែពេលជាង ២ ឆ្នាំ ប៉ុណ្ណោះ ដែលយើងបានកាត់នូវការចែករំលែកដល់សិស្សនូវអ៊ិនធឺណែតល្បឿនលឿនក្នុងពាក់កណ្ដាលថ្នាក់រៀន ពេលដែលកំពុងពង្រីកទៅឧបករណ៍រៀនសូត្របែបទំនើប ដែលសិស្សត្រូវការដើម្បីជោគជ័យក្នុងការរៀនសូត្ររបស់ពួកគេ»។
លោក ម៉ាវែល បាននិយាយថា EducationSuperHighway គ្រោងនឹងប្រើថវិកាចំនួន ២០ លានដុល្លារ ពីគ្រួសារលោកហ្ស៊ុកឃើប៊ើក ដើម្បីជួលបុគ្គលិកបន្ថែម រួមទាំងអ្នកជំនាញខាងគុណភាពទិន្នន័យ អ្នកកែសម្រួលប្រព័ន្ធ software និងអ្នកផ្ដល់ប្រឹក្សា ក្នុងការធ្វើការជាមួយមន្ត្រីពីសាលារដ្ឋ និងក្នុងស្រុក។ គាត់កំពុងតែស្វែងរកនូវថវិកាចំនួន ៤០ លានដុល្លារបន្ថែមទៀត ដែលមួយចំណែកអាចនឹងបានពីមូលនិធិ Bill and Melinda Gates ហើយមួយចំណែកទៀត បានពីម្ចាស់ជំនួយទៅដល់ក្រុម។
«កុមារ ២០ លាន នាក់ត្រូវបានទំនាក់ទំនងគ្នា តែយើងនៅមានកុមារ ២០ លាន នាក់ទៀតផងដែរ ដែលត្រូវការ»។
នៅថ្ងៃអង្គារនេះដែរថាលោក ម៉ាក ហ្ស៊ុកឃើប៊ើក និងភរិយារបស់លោក បានថ្លែងថានឹងបរិច្ចាគភាគហ៊ុនចំនួន ៩៩ភាគរយ
(ប្រហែល ៤៥ ពាន់លាន ដុល្លារ) ដល់មូលនិធិសប្បុរសធម៌ ក្នុងរយៈពេលដែលពួកគេមានជីវិត។ លោកបញ្ជាក់ថា លោកនិងភរិយាសម្រេចចិត្តបរិច្ចាគថវិកាច្រើនបែបនេះគឺដើម្បីជួយកែប្រែពិភពលោកឱ្យប្រសើរឡើង ឱ្យមានភាពរីករាយ វិបុលភាព និងសុខដុមរមនាសម្រាប់កូនស្រីលោក ដែលទើបតែបង្កើតកាលពីសប្តាហ៍មុន និងមនុស្សគ្រប់គ្នាលើពិភពលោកនេះផងដែរ៕
ប្រែសម្រួលដោយ៖ សេង វិបុល / ប្រភព៖ The New York Times
