យោងតាមរ៉យទ័ររាយការណ៍ថា ការតវ៉ានៅទូទាំងប្រទេសអ៊ីរ៉ង់បានបន្តនៅទីក្រុងជាច្រើន កាលពីថ្ងៃព្រហស្បតិ៍ ខណៈក្រុមសិទ្ធិមនុស្សបាននិយាយថា មានមនុស្សយ៉ាងហោចណាស់ ៨៣ នាក់ត្រូវបានសម្លាប់ក្នុងរយៈពេលជិតពីរសប្តាហ៍កន្លងមកនេះ។
ជនរងគ្រោះMahsa Amini អាយុ 22 ឆ្នាំ រស់នៅទីក្រុង Saqez ជាជនជាតិឃឺដត្រូវបានចាប់ខ្លួ នៅទីក្រុង Tehran ពីបទ “ស្លៀកពាក់មិនសមរម្យ” ដោយប៉ូលីសសីលធម៌ដែលអនុវត្តច្បាប់ស្លៀកពាក់ដ៏តឹងរឹងលើស្ត្រីអ៊ីរ៉ង់។ក្រោយមក Mahsa Aminiបានស្លាប់ ដោយគេសង្ស័យថាត្រូវប៉ូសិសធ្វើទារុណកម្មលើនាង។
ការស្លាប់របស់នាង Mahsa Amini បានបង្កឱ្យមានការតវ៉ាដ៏ធំជាលើកដំបូងនៅតាមដងផ្លូវប្រទេសអ៊ីរ៉ង់។
អង្គការ Iran Human Rights ដែលមានការិយាល័យនៅប្រទេសន័រវេសបានសរសេរនៅលើ Twitter ថា “យ៉ាងហោចណាស់មនុស្ស 83 នាក់រួមទាំងកុមារត្រូវបានសម្លាប់នៅក្នុងការធ្វើបាតុកម្មតវ៉ា។ទូរទស្សន៍រដ្ឋអ៊ីរ៉ង់បានរាយការណ៍ថា ប៉ូលិសបានចាប់ខ្លួន “អ្នកធ្វើកុប្បកម្ម” មួយចំនួនធំ តែមិនបានផ្តល់តួលេខច្បាស់លាស់ឡើយ។
ក្រុមសិទ្ធិមនុស្សបាននិយាយថា សកម្មជន និស្សិត និងសិល្បកររាប់សិបនាក់ត្រូវបានឃុំខ្លួន ហើយគណៈកម្មាធិការការពារអ្នកកាសែតបានសរសេរនៅលើ Twitter ថាកងកម្លាំងសន្តិសុខបានចាប់ខ្លួនអ្នកកាសែតយ៉ាងហោចណាស់ 28 នាក់គិតត្រឹមថ្ងៃទី 29 ខែកញ្ញា។
ប្រភព៖ Reuters ថ្ងៃទី៣០ ខែកញ្ញា ឆ្នាំ២០២២
