ខេត្តព្រះសីហនុ៖ រយៈពេលជាង ៦ ខែ ក្រោយពីសាលាដំបូងខេត្តព្រះសីហនុ បានចេញសាលក្រមកាត់ទោស មន្ត្រីប៉ូលីសម្នាក់ឱ្យជាប់ពន្ធនាគាររយៈពេល ៥ ឆ្នាំ និងសងជំងឺចិត្តដល់គ្រួសារកុមារីរងគ្រោះចំនួន ៤០ លានរៀល ក្នុងករណីរំលោភកុមារីអាយុ ១១ ឆ្នាំ កាលពីឆ្នាំ ២០១០ ប៉ុន្តែនៅមិនទាន់មានការអនុវត្តទោស និងសងសំណងនៅឡើយ ទើបឪពុកកុមារីរងគ្រោះបន្តស្វះស្វែងរកយុត្តិធម៌ដល់សាលាឧទ្ធរណ៍។
ឪពុកកុមារីរងគ្រោះក្នុងករណីរំលោភសេពសន្ថវៈកាលពី៥ ឆ្នាំមុន សម្ដែងការខកចិត្ត ដោយសារមិនមានការអនុវត្តទោសចំពោះជនឧក្រិដ្ឋដែលបានរំលោភកូនស្រីគាត់។
លោក យ.ប.ល ជាឪពុករបស់កុមារងគ្រោះ បានឱ្យវិទ្យុស្ត្រី FM102 នៃ WMC ដឹងនៅថ្ងៃទី៣០ ខែវិច្ឆិកា ឆ្នាំ២០១៥ នេះថា សាលាដំបូងខេត្តព្រះសីហនុ កាលពីថ្ងៃទី៩ ខែ៤ ឆ្នាំ២០១៥ បានចេញសាលក្រមកាត់ទោសមន្ត្រីប៉ូលីសម្នាក់ មានឋានន្តរស័ក្តិអនុសេនីយទោ ធ្វើការនៅស្នងការដ្ឋាននគរបាលខេត្តព្រះសីហនុ ឈ្មោះ កង សុផាត ដែលជាជនល្មើសរំលោភកុមារីរងគ្រោះ ឱ្យជាប់ពន្ធនាគាររយៈពេល ៥ ឆ្នាំ និងសងជំងឺចិត្តដល់គ្រួសារកុមារីរងគ្រោះចំនួន៤០លានរៀល។ ប៉ុន្តែដោយសារជនល្មើសបានប្ដឹងឧទ្ធរណ៍ ទើបរហូតមកដល់ពេលនេះ គ្រួសារនៅមិនទាន់ទទួលបានយុត្តិធម៌នៅឡើយ។
លោកមានប្រសាសន៍ថា៖ «ទើបប្រកាសសាលក្រមថ្ងៃទី៩ ខែ៤ ឆ្នាំ២០១៥ ហ្នឹង ប្រកាសសាលក្រមឱ្យជាប់ពន្ធនាគាររយៈពេល ៥ឆ្នាំ និងសងជំងឺចិត្តឱ្យជនរងគ្រោះ៤០លានររៀល។ ឥឡូវហ្នឹងជំងឺចិត្ត ៤០លានរៀលក៏អត់ឱ្យ ហើយអ្នកជនដែលប្រព្រឹត្តហ្នឹងក៏នៅក្រៅឃុំ នៅធ្វើជាអនុសេនីយទោសក្តិ ២ នៅធ្វើជាប៉ូលីសរាល់ថ្ងៃ»។
លោកបានបញ្ជាក់ថា មកដល់ពេលនេះ កូនស្រីរបស់លោកនៅមានអារម្មណ៍ភ័យខ្លាចនៅ ហើយបច្ចុប្បន្ននេះ កូនស្រីរបស់លោកស្នាក់នៅក្នុងអង្កការមួយ។
មន្ត្រីជាន់ខ្ពស់ទទួលបន្ទុកចាត់ចែងការិយាល័យ ឃ្លាំមើលការរំលោភសិទ្ធិស្ត្រី និងកុមារ កញ្ញា ណាប់ សុម៉ាលី ដែលបានតាមដានយ៉ាងយកចិត្តទុកដាក់ លើករណីនេះបានឱ្យដឹងថា ជនល្មើសត្រូវបានដោះលែងភ្លាមៗ បន្ទាប់ពីបានបញ្ជូនទៅដល់ព្រះរាជអាជ្ញា ដោយព្រះរាជអាជ្ញាបានលើកឡើងថា មិនមានភស្តុតាងដើម្បីដាក់បន្ទុកលើជនល្មើស។
កញ្ញាបានបន្តថា សម្រាប់អង្គការលីកាដូយល់ថា ព្រះរាជអាជ្ញាគួរតែបើកការស៊ើបអង្កេត លើសំណុំរឿងនេះ មុនពេលដែលសម្រេចដោះលែងជនល្មើស។ កញ្ញាថ្លែងថា៖ «អ្វីដែលគួរឱ្យភ្ញាក់ផ្អើលនោះគឺ ជនល្មើសត្រូវបានដោះលែងភ្លាមៗ បន្ទាប់ពីបានបញ្ជូនទៅដល់ព្រះរាជអាជ្ញា ដោយព្រះរាជអាជ្ញាអះអាងថា មិនមានភស្តុតាងគ្រប់គ្រាន់ ក្នុងការដាក់បន្ទុកអីជាដើម។ សម្រាប់អង្គការលីកាដូយល់ឃើញថា ព្រះរាជអាជ្ញាគួរតែបើកការស៊ើបអង្កេតករណីនេះ មុនពេលសម្រេចចិត្តដោះលេងជនល្មើស…»។
កញ្ញាបានបន្តថា បើសិនជាជនដែលប្រព្រឹត្តិនោះមិនមានបុណ្យសក្តិអ្វីទេ នោះតុលាការអនុវត្តទៅតាមនិតិវិធីច្បាប់ ដោយឡែកបើសិនជាជនដែលប្រព្រឹត្តិនោះមានអំណាច ឬប្រាក់កាស នោះ ពួកគេតែងតែត្រូវបានរួចខ្លួនពីច្បាប់។
កញ្ញាបានបន្តថា ក្នុងនាមអង្គការលីកាដូ កញ្ញាសូមសំណូមពរឱ្យរដ្ឋាភិបាល មានការតាំងចិត្តខ្ពស់ក្នុងការបញ្ចប់ការរំលោភបំពានផ្លូវភេទលើស្ត្រី និងកុមារ ដោយពង្រឹងនូវ ស្ថាប័ន ដែលពាក់ព័ន្ធមួយចំនួន ក្នុងការអនុវត្តច្បាប់ឱ្យបានពេញលេញ និងបញ្ឈប់អំពើនិទ្ទណ្ឌភាព ព្រមទាំងអំពើពុករួយផងដែរ។
វិទ្យុស្ត្រី FM 102 នៃ WMC បានព្យាយាមទាក់ទងសុំការបំភ្លឺពីលោក ជួន ណារិន ស្នងការ នៃស្នងការដ្ឋាននគរបាលខេត្តព្រះសីហនុ ប៉ុន្តែទូរស័ព្ទចូល មិនមានអ្នកទទួល។
សូមរំឭកថា ហេតុការណ៍រំលោភសេពសន្ថវៈនេះ បានកើតឡើងស្ថិតក្នុងក្រុម៩ ភូមិ៣ សង្កាត់៣ ក្រុងព្រះសីហនុ ខេត្តព្រះសីហនុ ក្នុងឆ្នាំ២០១០ នៅពេលនោះកុមារីរងគ្រោះមានអាយុ១១ឆ្នាំ៕
