តំបន់ចំនួនបួនរបស់អ៊ុយក្រែនដែលស្ថិតនៅក្រោមការគ្រប់គ្រងរបស់រុស្ស៉ីបានប្រកាសផែនការធ្វើប្រជាមតិបន្ទាន់ដើម្បីត្រួសត្រាយផ្លូវបញ្ចូលទឹកដីជាមួយរុស្ស៊ី។មន្ត្រីដែលគាំទ្រដោយរុស្ស៊ីនៅភាគខាងកើត និងខាងត្បូងនិយាយថា ពួកគេចង់ធ្វើការបោះឆ្នោតប្រជាមតិក្នុងសប្តាហ៍នេះ។
រដ្ឋមន្ត្រីការបរទេសអ៊ុយក្រែន លោក Dmytro Kuleba បាននិយាយកាលពីថ្ងៃអង្គារថា “ការធ្វើប្រជាមតិក្លែងក្លាយ” នឹងមិនផ្លាស់ប្តូរអ្វីនោះទេ។សហគមន៍អន្តរជាតិមិនដែលទទួលស្គាល់ការបញ្ចូលឧបទ្វីប Crimea ជារបស់រុស្ស៉ីនោះទេ ប៉ុន្តែរុស្ស៊ីចង់យកតំបន់ផ្សេងទៀតតាមរបៀបដូចគ្នានឹងតំបន់គ្រីមៀដែរ។
មានការរំពឹងថារុស្ស៊ីអាចនឹងចល័តទ័ពទ្រង់ទ្រាយធំ ដើម្បីពង្រឹងកម្លាំងរបស់ខ្លួននៅអ៊ុយក្រែនឡើងវិញ។ សភារុស្ស៊ីបានអនុម័តច្បាប់ដាក់ទោសធ្ងន់ធ្ងរចំពោះបទល្មើសយោធាដូចជាការរត់ចោលជួរ ការធ្វើអោយខូចខាតទ្រព្យសម្បត្តិកងទ័ព និងការមិនចុះសម្រុងគ្នាក្នុងអំឡុងពេលចល័តកងទ័ព ឬពេលធ្វើប្រតិបត្តិការសិក។
អនុប្រធានក្រុមប្រឹក្សាសន្តិសុខរុស្ស៊ី លោក Dmitry Medvedev បាននិយាយនៅព្រឹកថ្ងៃអង្គារនេះថា ការបោះឆ្នោតនៅតំបន់ភាគខាងកើតនៃទីក្រុង Donetsk និង Luhansk ដែលត្រូវបានគេស្គាល់ថា Donbas នឹងកែតម្រូវ “យុត្តិធម៌ប្រវត្តិសាស្ត្រ” ហើយវាមិនអាចត្រឡប់ក្រោយវិញបានទេ “បន្ទាប់ពីធ្វើវិសោធនកម្មរដ្ឋធម្មនុញ្ញហើយ គ្មានមេដឹកនាំជំនាន់ក្រោយរបស់រុស្ស៊ី ឬគ្មានមន្ត្រីណាមួយអាចប្រឆាំងការសម្រេចចិត្តទាំងនេះបានឡើយ»។
ឆាប់ៗនេះ អាជ្ញាធរដែលគាំទ្រដោយរុស្ស៊ីដែលបានបំបែកខ្លួននៅតំបន់ Donetsk និង Luhansk នឹងធ្វើការបោះឆ្នោតប្រជាមតិនៅថ្ងៃទី 23 ដល់ថ្ងៃ 27 ខែកញ្ញា។ តំបន់ទាំងពីរត្រូវបានទទួលស្គាល់ជាសាធារណៈរដ្ឋឯករាជ្យដោយប្រធានាធិបតី ពូទីន បីថ្ងៃមុនពេលកងទ័ពរុស្ស៊ីចូលឈ្លានពានអ៊ុយក្រែនពីភាគខាងជើង ខាងកើត និងខាងត្បូង។
មន្ត្រីដែលតែងតាំងដោយរុស្ស៊ីនៅតំបន់ Kherson បាននិយាយថា ពួកគេក៏នឹងរៀបចំការបោះឆ្នោតប្រជាមតិដែរ ហើយការប្រកាសស្រដៀងគ្នានេះក៍មាននៅតំបន់ Zaporizhzhia ដែលកាន់កាប់ដោយរុស្ស៊ីផងដែរ។ ប្រព័ន្ធផ្សព្វផ្សាយរដ្ឋរុស្ស៊ីបាននិយាយថា ប្រជាជនអាចបោះឆ្នោតដោយផ្ទាល់ ឬបោះពីចម្ងាយ។
អស់រយៈពេលជាច្រើនខែមក អាជ្ញាធរដែលតែងតាំងដោយរុស្ស៊ីបានព្យាយាមធ្វើប្រជាមតិស្វែងរកស្វ័យភាព។ប៉ុន្តែគេមិនដែលសង្ឃឹមថាមានការបោះឆ្នោតដោយសេរី ឬយុត្តិធម៌នោះទេ ហើយសង្រ្គាមកំពុងតែឆាបឆេះដែលធ្វើឱ្យការបោះឆ្នោតមិនអាចអនុវត្តបាន។
ការប៉ុនប៉ងណាមួយដើម្បីបញ្ចូលទឹកដីអ៊ុយក្រែនបន្ថែមទៀតទៅរុស្ស៉ី បានធ្វើអោយខឹងសម្បារពីមេដឹកនាំទីក្រុង Kyiv និងបំផ្លាញក្តីសង្ឃឹមនៃដំណោះស្រាយតាមរយៈការចរចា។ទីប្រឹក្សាក្រសួងការពារជាតិអ៊ុយក្រែនលោក Oleksiy Kopytko បានលើកឡើងថា ផែនការបោះឆ្នោតគឺជា “សញ្ញានៃភាពច្របូកច្របល់” នៅទីក្រុងម៉ូស្គូ។ ប្រធានាធិបតី Volodymyr Zelensky បាននិយាយកាលពីយប់ថ្ងៃច័ន្ទថា “អ្នកឈ្លានពានបង្ហាញយ៉ាងច្បាស់នូវភាពភ័យស្លន់ស្លោ” ។ អធិការបតីអាល្លឺម៉ង់ Olaf Scholz បាននិយាយថា ការបោះឆ្នោតនោះគឺជា “ការបោកប្រាស់” ខណៈពេលដែលលោក Emmanuel Macron ប្រធានាធិបតីបារាំងបានថ្កោលទោសគំនិតធ្វើប្រជាមតិនេះថាជា “ការប្រមាថ” និង “ការលេងសើច” ដែលច្បាស់ណាស់នឹងមិនត្រូវបានទទួលស្គាល់ដោយសហគមន៍អន្តរជាតិ។ អគ្គលេខាធិការអង្គការណាតូ លោក Jens Stoltenberg បាននិយាយថា ពួកគេគ្មានភាពស្របច្បាប់ទេ ហើយជា “ការកើនឡើងបន្ថែមទៀតនៅក្នុងសង្គ្រាមរបស់ពូទីន” ។ រដ្ឋមន្ត្រីការបរទេសរុស្ស៊ីលោក Sergei Lavrov បាននិយាយថា តាំងពីចាប់ផ្តើមប្រតិបត្តិការពិសេសមក ប្រទេសរុស្ស៊ីចង់ឲ្យពលរដ្ឋនៅក្នុងតំបន់ទាំងនោះមានការសម្រេចចិត្តដោយខ្លួនឯង៖ «ស្ថានភាពបច្ចុប្បន្នបញ្ជាក់ថា ពួកគេចង់ធ្វើជាម្ចាស់នៃជោគវាសនារបស់ពួកគេ។ ”
ប្រភព៖ BBC News ថ្ងៃទី ២១ ខែកញ្ញា ឆ្នាំ ២០២២