រាជធានីភ្នំពេញ ៖ ថ្ងៃទី ០៩ កញ្ញា ២០២២ – ក្រុមហ៊ុន FWD បានប្រកាសសម្ពោធជាផ្លូវការនូវកម្មវិធីទូរសព្ទ «Omne» ដែលមានមុខងារពិសេសៗជាច្រើនដើម្បីជួយដល់អ្នកប្រើប្រាស់ក្នុងការកំណត់គោលដៅផ្ទាល់ខ្លួន ព្រមទាំងរីករាយនឹងកម្មវិធីកម្សាន្តជាច្រើន។
កម្មវិធីទូរសព្ទដៃ Omne ត្រូវបានបង្កើតឡើងដើម្បីជួយផ្តល់ការរស់នៅប្រកបដោយភាពរីករាយជូនដល់អ្នកប្រើប្រាស់តាមរយៈមុខងារដែលជំរុញឱ្យសម្រេចបានគោលដៅប្រចាំថ្ងៃ។ កម្មវិធីទូរសព្ទនេះ មានភាពងាយស្រួលក្នុងការប្រើប្រាស់ និងមានមាតិកាជាច្រើនរួមមាន តន្រ្តី ល្បែងខ្លីៗ ការគូររូប សុខភាព និងមុខងារកម្សាន្តជាច្រើនទៀត ដែលតម្រូវតាមចំណង់ចំណូលចិត្តផ្ទាល់ខ្លួនរបស់អ្នកប្រើប្រាស់។ កម្មវិធី Omne ក៏នឹងនាំយកមុខងារស្វ័យប្រវត្តិជាច្រើនសម្រាប់អតិថិជនរបស់ក្រុមហ៊ុនធានារ៉ាប់រងអាយុជីវិត FWD ផងដែរក្នុងពេលខាងមុខ។
លោក ចាន់ រដ្ឋា អគ្គនាយកនៃក្រុមហ៊ុន FWD Cambodia បានមានប្រសាសន៍ថា៖ «ផ្នែកដ៏សំខាន់មួយនៃយុទ្ធសាស្ត្ររបស់យើងក្នុងការផ្តល់បទពិសោធថ្មីលើសេវាធានារ៉ាប់រងអាយុជីវិត គឺការត្រៀមខ្លួនដើម្បីផ្តល់នូវគុណតម្លៃដែលស្របតាមតម្រូវការរបស់អតិថិជនក្នុងសម័យឌីជីថលនេះ។ កម្មវិធី Omne បាននាំមកនូវបទពិសោធថ្មីក្នុងការសម្រេចគោលដៅផ្ទាល់ខ្លួន ជាមួយនឹងសកម្មភាពកម្សាន្តផ្សេងៗជាច្រើនដែលអាចឱ្យអ្នកប្រើប្រាស់បង្កើត និងសម្រេចបានទម្លាប់តូចៗប្រចាំថ្ងៃបានយ៉ាងងាយស្រួលតាមរយៈទូរសព្ទដៃ។»
ក្រុមហ៊ុន FWD បានសហការជាមួយក្រុមហ៊ុនជាច្រើនដែលត្រូវបានទទួលស្គាល់ទាំងក្នុងតំបន់ និងពិភពលោក ដើម្បីផ្តល់នូវមាតិកា និងសេវាកម្មផ្តាច់មុខដោយឥតគិតថ្លៃក្នុងកម្មវិធីទូរសព្ទមួយនេះ ហើយអាចប្រើប្រាស់លើទីផ្សារទាំង 10 នៅទូទាំងតំបន់អាស៊ី រួមទាំងប្រទេសកម្ពុជាផងដែរ។ ដៃគូទាំងនោះរួមមាន ម៉ាកតន្ត្រីធំជាងគេមួយក្នុងពិភពលោក និង ONE Esports ដែលជាប្រព័ន្ធផ្សព្វផ្សាយផ្នែកកីឡាឈានមុខគេ។ កម្មវិធី Omne នឹងផ្ដល់នូវគុណតម្លៃចម្រុះជាច្រើនដល់អ្នកប្រើប្រាស់ទាំងអស់នៅគ្រប់ទីផ្សាររបស់ ក្រុមហ៊ុន FWD ដោយការសហការបន្ថែមជាមួយនឹងដៃគូល្បីៗផ្សេងទៀតរួមមាន Dacadoo, Nuralogix, STASH NextGen, Shadow Factory, Koa Health និង Imunis ជាដើម។
ចាប់ពីពេលនេះទៅ កម្មវិធី Omne នឹងមានវត្តមានលើទីផ្សារទាំងអស់របស់ក្រុមហ៊ុន FWD សម្រាប់សាធារណជនប្រើប្រាស់ជាផ្លូវការ។ លោកអ្នកអាចទាញយកកម្មវិធីនេះដោយឥតគិតថ្លៃទាំងនៅលើ App Store និង Play Store។
អត្ថបទ FWD Cambodia
