en     km
en     km

យុទ្ធនាការ តស់! សន្សំ រកឃើញអ្នកឈ្នះចិញ្ចៀនមាស

Share

MC ៖ ក្រុមហ៊ុនធានារ៉ាប់រងអាយុជីវិត FWD Cambodia សហការជាមួយវិទ្យុស្រ្តី បានបង្កើតយុទ្ធនាការ តស់! សន្សំ រយៈពេល១ខែ ក្រោមពាក្យស្លោក សន្សំនៅផ្ទះឈ្នះរង្វាន់។ សមាជិកសន្សំដែលបានសន្សំប្រាក់ទៀងទាត់រាល់ថ្ងៃ ពេញមួយខែ មានឱកាសទទួលបានរង្វាន់លើកទឹកចិត្តពីក្រុមហ៊ុនធានារ៉ាប់រងអាយុជីវិត FWD Cambodia។ ក្នុងរយៈពេល១ខែនេះ មានអ្នកទទួលបានរង្វាន់គូប៉ុងញ៉ាំ២៤ ទឹកប្រាក់២០ដុល្លារចំនួន ៨រង្វាន់ និងរហូតថ្ងៃទី០២ ខែកញ្ញានេះ យុទ្ធនាការបានរកឃើញអ្នកឈ្នះចិញ្ចៀនមាស១ជី ចំនួន១រង្វាន់បន្ថែមទៀត។ លោក រស់ គង់ រាយការណ៍បន្ត ៖

Narrator ៖ ក្រុមហ៊ុនធានារ៉ាប់រងអាយុជីវិត FWD Cambodia បានចាប់ដៃគូជាមួយវិទ្យុស្ត្រី នៃអង្គការមណ្ឌលព័ត៌មានស្រ្តីកម្ពុជា បង្កើតនូវយុទ្ធនាការ តស់! សន្សំ…ដែលមានរយៈពេល១ខែ ចាប់ពីថ្ងៃទី០១ ដល់ថ្ងៃទី ៣១ ខែសីហា ឆ្នាំ ២០២២។ ក្នុងយុទ្ធនាការនេះ មានអ្នកចុះឈ្មោះចូលរួមសន្សំ ៨៤រូប ជាសាធារណជន មកពីភ្នំពេញ និងខេត្តមួយចំនួនផ្សេងទៀត។ សមាជិកសន្សំ ត្រូវដាក់ប្រាក់សន្សំក្នុងទៀងទាត់ប្រចាំថ្ងៃក្នុងកូនជ្រូក ឬមធ្យោបាយផ្សេងទៀត ដែលគ្រប់គ្រងដោយខ្លួនឯង។

លោក ចាន់ រដ្ឋា អគ្គនាយកក្រុមហ៊ុនធានារ៉ារប់អាយុជីវិត FWD Cambodia មានប្រសាសន៍ថា យុទ្ធនាកា តស់!សន្សំ បង្កើតឡើងដើម្បីលើកកម្ពស់ចំណេះដឹង និងទម្លាប់នៃការសន្សំបា្រក់ឱ្យបានទៀងទាត់ ៖

លោក ចាន់ រដ្ឋា អគ្គនាយកក្រុមហ៊ុនធានារ៉ាប់រងអាយុជីវិត FWD Cambodia

(ការសន្សំគឺជាមូលដ្ឋានដែលចាំបាច់​ ដែលល្អមែនទែន ទើបយើងសហការជាមួយវិទ្យុស្រ្តីរៀបចំកម្មវិធីនេះឡើង។ ទី២ យើងតែងតែបានឮពាក្យចាស់បុរាណ «តក់ៗពេញបំពង់» ពាក្យហ្នឹងបើត្រលប់មកវិញ គឺធ្វើអ្វីមួយជាប្រចាំ ទម្លាប់ធ្វើជាប្រចាំ មិនថាការអានសៀវភៅ ការសន្សំលុយ ឬធ្វើអ្វីផ្សេងទៀតទេ ខ្ញុំចាត់ទុកថា យុទ្ធនាការតស់!សន្សំ រយៈពេល៣១ថ្ងៃ គឺជាការដាស់អារម្មណ៍ ថា អ្វីដែលយើងធ្វើជាប្រចាំ វានឹងបានលទ្ធផលល្អមែន)

ការបង្កើតយុទ្ធនាការ តស់! សន្សំ ក្រុមហ៊ុន FWD Cambodia មិនទទួលបានផលប្រយោជន៍ណាមួយពីសមាជិកសន្សំនោះទេ ប៉ុន្តែបានផ្ដល់រង្វាន់លើកទឹកចិត្តចំពោះសមាជិកដែលបានសន្សំទៀងទាត់ប្រចាំថ្ងៃក្នុងរយៈពេល ១ខែ នូវគូប៉ុងញ៉ាំ២៤ ក្នុងទឹកប្រាក់ ២០ដុល្លារ ចំនួន៨រង្វាន់ និងចិញ្ចៀនមាស ១ជី ចំនួន១រង្វាន់។ លោក ផាន់ សីហា នៅស្រុកស្រែអំបិល ខេត្តកោះកុង ដែលមានសំណាង​ទទួលបានរង្វាន់គូប៉ុងញ៉ាំ២៤-២០ដុល្លារ និងចិញ្ចៀនមាស១ជី មានប្រសាសន៍ថា​ ៖

(មានអារម្មណ៍រំភើប អត់នឹកស្មានដល់ទាល់តែសោះ ព្រោះអី ចាប់គូប៉ុងហ្នឹងត្រូវ ២០ដុល្លារម្ដង ហើយចាប់រង្វាន់ត្រូវចិញ្ចៀនមាស១ជីទៀត…តាមមើលការចាប់រង្វាន់ មិននឹកស្មានថា ត្រូវខ្លួនឯងម្ដងទៀត។)

លោក ផាន់ សីហា អ្នកទទួលបានរង្វាន់ចិញ្ចៀនមាស ចូលរួមផ្ដល់សម្ភាសក្នុងកម្មវិធីវិទ្យុ តស់! សន្សំ
ចិញ្ចៀនមាស ១ជី រង្វាន់សម្រាប់សមាជិកចូលរួមសន្សំប្រាក់

អ្នកស្រី ចម្រើន ជាសមាជិកសន្សំ លើកឡើងថា ទោះបីមិនទទួលបានរង្វាន់ពីកម្មវិធី ប៉ុន្តែយុទ្ធនាការ តស់! សន្សំ បានបង្កើតទម្លាប់ល្អសម្រាប់គាត់ ហើយអាចប្រើប្រាស់លុយដែលសន្សំបានដោះស្រាយបញ្ហាចាំបាច់ក្នុងគ្រួសារនៅថ្ងៃណាមួយ។

(កម្មវិធីតស់! សន្សំមានចំណុចល្អ ដូចជាឱ្យយើងចេះសន្សំ ចេះបែងចែកប្រាក់ទុកសន្សំ និងការចំណាយប្រចាំថ្ងៃ និងបង្កើតចំណេះដឹងដល់យើងក្នុងការសន្សំប្រាក់)

អ្នកស្រី ចម្រើន សមាជិកសន្សំប្រាក់ មកពីខេត្តកំពង់ធំ

លោក ចាន់ រដ្ឋា អគ្គនាយកក្រុមហ៊ុន ធានារ៉ាប់រងអាយុជីវិត FWD Cambodia លើកឡើងថា យុវជនក៏ជាគោលដៅសំខានដែរ ដែលត្រូវលើក​កម្ពស់ចំណេះដឹងសន្សំប្រាក់ដើម្បីសម្រេចគោលដៅអនាគត់របស់ពួកគេ។

(ពេលនេះមានការចូលរួមទាំងប្រុសទាំងស្រី និងទូទាំងតំបន់​ ខេត្តក្រុងផងដែរ តទៅមុខទៀតយើងនឹងធ្វើយ៉ាងម៉េចដើម្បីឱ្យមានការចូលរួមពីយុវជន ខ្ញុំជឿថាយុវជនឥឡូវ ប្រហែលជាចង់បង្កើតអាជីវកម្មច្រើន សហគ្រិនភាពច្រើន ដូច្នេះគាត់ត្រូវការដើមទុន)

លោក ចាន់ រដ្ឋា អគ្គនាយកក្រុមហ៊ុនធានារ៉ាប់រងអាយុជីវិត FWD Cambodia

លោក ចាន់ រដ្ឋា បន្តថា យុទ្ធនាការនេះ ដែលមានការចូលរួមច្រើនពីបុរសផងនោះ គឺជាការឆ្លុះបញ្ចាំងកិច្ចសហការក្នុងគ្រួសារ ដែលបុរសបានចូលរួមសន្សំសំចៃ និងចូលរួមសន្សំប្រាក់ ជាចំណែកសំខាន់ជួយស្រ្តីជាភរិយា និងការគ្រប់គ្រងសេដ្ឋកិច្ចគ្រួសារឱ្យបានល្អ។ ដូច្នេះក្រុមហ៊ុននឹងបង្កើតយុទ្ធនាការ តស់! សន្ស រដូវកាលទី២ ដែលនឹងចាប់ផ្ដើមនៅដើមខែវិច្ឆិកា ឆ្នាំ ២០២២ ខាងមុខនេះបន្តទៀត។

 

Share

Image
Image
Image