យោងតាម C N A អតីតប្រធានាធិបតីស្រីលង្កា Gotabaya Rajapaksa ដែលបាននិរទេសខ្លួនដោយបង្ខំខ្លួនឯងនៅប្រទេសថៃ នឹងវិលត្រឡប់ចូលក្នុងប្រទេសវិញនៅថ្ងៃសៅរ៍ ថ្ងៃទី 3 ខែកញ្ញា។ នេះបើតាមមន្ត្រីការពារជាតិជាន់ខ្ពស់ម្នាក់បានប្រាប់សារព័ត៌មានAFP ។
មន្ត្រីការពារជាតិដែលសុំមិនបញ្ចេញឈ្មោះបានប្រាប់ AFP នៅថ្ងៃសុក្រថា៖ «លោក Rajapaksa បានស្នាក់នៅក្នុងសណ្ឋាគារប្រទេសថៃក្នុងនាមជាអ្នកទោសក្លែងក្លាយ ហើយចង់ត្រឡប់ទៅស្រុកវិញ»។ «លោកត្រូវបានគេប្រាប់ថានឹងត្រឡប់ទៅស្រីលង្កាវិញនៅព្រឹកថ្ងៃសៅរ៍»។មន្រ្តីការពារជាតិជាន់ខ្ពស់បានបន្ថែមទៀតថា”យើងទើបតែបង្កើតក្រុមសន្តិសុខថ្មីមួយដើម្បីការពារគាត់ នៅពេលគាត់ត្រឡប់មកវិញនៅថ្ងៃសៅរ៍។ អង្គភាពការពារសុវត្ថិភាពលោក Rajapaksa នេះមានការចូលរួមពីកងទ័ព និងប៉ូលីស។”
រដ្ឋធម្មនុញ្ញប្រទេសស្រីលង្កា បានចែងពីការធានានូវអង្គរក្សការពារ យានជំនិះ និងលំនៅដ្ឋានសម្រាប់អតីតប្រធានាធិបតី។លោកRajapaksa បានធ្វើដំណើរទៅប្រទេសថៃ បន្ទាប់ពីសិង្ហបុរីបានបដិសេធមិនបន្តទិដ្ឋាការរយៈពេល 28 ថ្ងៃជូនលោក ប៉ុន្តែអាជ្ញាធរសន្តិសុខនៅទីក្រុងបាងកកបានប្រាប់លោកមិនឱ្យចាកចេញពីសណ្ឋាគារដែលលោកស្នាក់នៅនោះទេ ដើម្បីសុវត្ថិភាពផ្ទាល់ខ្លួនរបស់លោក។
មន្ត្រីរូបនេះបាននិយាយថា អតីតប្រធានាធិបតីមានទិដ្ឋាការរយៈពេល 90 ថ្ងៃ ដើម្បីស្នាក់នៅក្នុងប្រទេសថៃ ប៉ុន្តែបានជ្រើសរើសយកការត្រឡប់ទៅស្រីលង្កាវិញមុនកាលកំណត់ជាមួយនឹងភរិយា អង្គរក្ស និងជំនួយការរបស់លោកម្នាក់ទៀត។
ប្អូនប្រុសពៅរបស់ Rajapaksa គឺលោក Basil អតីតរដ្ឋមន្ត្រីហិរញ្ញវត្ថុ បានជួបជាមួយប្រធានាធិបតី ស្រីលង្កាបច្ចុប្បន្នគឺលោកRanil Wickremesinghe កាលពីខែមុន ហើយបានស្នើសុំការការពារបងប្រុសរបស់លោកពេលត្រឡប់ចូលប្រទេសវិញ។គណបក្សស្រីលង្កា Podujana Peramuna (SLPP)បានចេញសេចក្តីថ្លែងការណ៍ថា “Basil Rajapaksa ជាប្អូនប្រុសលោក Rajapaksa បានស្នើសុំប្រធានាធិបតីបច្ចុប្បន្នរៀបចំឱ្យអតីតប្រធានាធិបតី Rajapaksa បានវិលត្រឡប់ទៅផ្ទះវិញដោយសុវត្ថិភាព” ។ ប្រទេសស្រីលង្កាបានប្រឈមនឹងការខ្វះខាតស្បៀងអាហារ ប្រេងឥន្ធនៈ និងថ្នាំពេទ្យ ខ្វះអគ្គិសនី និងអតិផរណាធ្ងន់ធ្ងរ បន្ទាប់ពីអស់រូបិយបណ្ណបរទេសដើម្បីធានាការនាំចូលទំនិញចាំបាច់សំខាន់ៗមួយចំនួន។
Rajapaksa អាយុ 73 ឆ្នាំបានភៀសខ្លួនចេញពីស្រីលង្កាក្រោមការជួយជ្រោមជ្រែងពីយោធាកាលពីខែ
កក្កដា បន្ទាប់ពីហ្វូងមនុស្សយ៉ាងច្រើនបានសម្រុកចូលលំនៅដ្ឋានរបស់លោក បន្ទាប់ពីមានការតវ៉ាជាសាធារណៈអស់ជាច្រើនខែដែលស្តីបន្ទោសលោកចំពោះវិបត្តិសេដ្ឋកិច្ចដែលមិនធ្លាប់មានពីមុនមកនៅប្រទេសនេះ។លោកបានចេញលិខិតលាលែងពីសិង្ហបុរី មុននឹងឡើងយន្តហោះទៅទីក្រុងបាងកក ជាទីដែលលោកបានផ្ញើលិខិតទៅកាន់អ្នកបន្តតំណែងពីលោក ដើម្បីសម្រួលការវិលត្រឡប់ចូលប្រទេសវិញ។
ប្រភព៖ C N A, ថ្ងៃទី០២ ខែកញ្ញា ឆ្នាំ២០២២
