តាមការចុះផ្សាយរបស់សារព័ត៌មាន BBC បានអោយដឹងថាក្រុមអធិការកិច្ចមកពីអង្គការឃ្លាំមើលនុយក្លេអ៊ែររបស់អង្គការសហប្រជាជាតិកំពុងធ្វើដំណើរទៅកាន់រោងចក្រថាមពលនុយក្លេអ៊ែរ Zaporizhzhia នៅប្រទេសអ៊ុយក្រែនដែលរងការវាយប្រហារដោយសង្គ្រាម។
លោក Rafael Grossi អគ្គនាយកនៃទីភ្នាក់ងារថាមពលបរមាណូអន្តរជាតិ (IAEA) បាននិយាយថា ក្រុមអធិការកិច្ចនេះនឹងទៅដល់រោងចក្រនុយក្លេអ៊ែរ Zaporizhzhiaនៅចុងសប្តាហ៍នេះ។លោក Rafael Grossi បានសរសេរលើ Twitter ថា៖ «យើងត្រូវតែការពារសុវត្ថិភាព និងសន្តិសុខនៃរោងចក្រនុយក្លេអ៊ែរដ៏ធំបំផុតរបស់អ៊ុយក្រែន និងអឺរ៉ុប។
រោងចក្រនុយក្លេអ៊ែរត្រូវបានកាន់កាប់ដោយការឈ្លានពានរបស់ទាហានរុស្ស៊ីចាប់តាំងពីខែមីនា។ការប្រយុទ្ធគ្នានៅជុំវិញកន្លែងផលិតឋាមពលនៅភាគអាគ្នេយ៍នៃប្រទេសអ៊ុយក្រែនបាននាំឱ្យមានការព្រួយបារម្ភជាសកលលើសុវត្ថិភាព និងសន្តិសុខនៃទីតាំងនោះ។អ៊ុយក្រែន និងរុស្ស៊ីបានចោទគ្នាទៅវិញទៅមកពីការបាញ់ផ្លោងនៅតំបន់រោងចក្រនុយក្លេអ៊ែរនោះ។គ្មានប្រភពណាមួយអាចបញ្ជាក់ដោយឯករាជ្យថាភាគីណាជាអ្នកទទួលខុសត្រូវនោះទេ។
យោធារបស់រុស្ស៊ីបានកាន់កាប់រោងចក្រនេះនៅដើមខែមីនា ប៉ុន្តែរោងចក្រនុយក្លេអ៊ែរនៅដំណើរការនៅឡើយ ក្រោមការមើលថែរដោយបុគ្គលិកអ៊ុយក្រែនក្នុងលក្ខខណ្ឌដ៏លំបាក។វិមានក្រឹមឡាំងធ្លាប់បាននិយាយថាខ្លួននឹងអនុញ្ញាតឲ្យតែអធិការអន្តរជាតិតែប៉ុណ្ណោះ អាចចូលពិនិត្យអគាររោងចក្រនុយក្លេអ៊ែរនេះ ដូច្នេះដំណើរទស្សនកិច្ចរបស់ IAEA នៅពេលនេះជាពេលវេលាដ៏សំខាន់មួយក្នុងការផ្ទៀងផ្ទាត់នូវអ្វីដែលកំពុងកើតឡើងនៅរោងចក្រនុយក្លេអ៊ែរនោះ។
អគ្គនាយក IAEA បាននិយាយថា “ស្ទើរតែរាល់ថ្ងៃមានការផ្ទុះអាវុធនៅទីនោះ ឬក្បែររោងចក្រថាមពលនុយក្លេអ៊ែរ Zaporizhzhia ។ យើងមិនអាចអូសបន្លាយពេលវេលាទៀតទេ” ។
អ្នកជំនាញនិយាយថា ការបាញ់ផ្លោងជុំវិញរោងចក្រមិនមែនជាកង្វល់ចម្បងនោះទេ ដោយសាររោងចក្រនេះមានជញ្ជាំងការពារក្រាស់។
ទោះជាយ៉ាងណា ការកាត់ផ្តាច់ការផ្គត់ផ្គង់ចរន្តអគ្គិសនីគឺប្រឈមនឹងគ្រោះថ្នាក់ខ្លាំង។ ការកាត់ផ្ដាច់អគ្គិសនីដល់ម៉ាស៊ីនរ៉េអាក់ទ័រនុយក្លេអ៊ែរ និងម៉ាស៊ីនភ្លើងបម្រុង មានន័យថាគ្មានថាមពលសម្រាប់ម៉ាស៊ីនបូមទឹកដែលធ្វើឲ្យត្រជាក់ស្នូលរ៉េអាក់ទ័រក្តៅ ដូច្នេះនាំឱ្យប្រេងឥន្ធនៈចាប់ផ្តើមរលាយ។
ប្រភព៖ BBC ថ្ងៃទី២៩ ខែសីហា ឆ្នាំ២០២២
