លោក សុខ ទូច ប្រធានរាជបណ្ឌិតសភាកម្ពុជា បានព្រមានចាប់ខ្លួនមនុស្សជាង៥០ ដែលរស់នៅខេត្តពោធិ៍សាត់ និងខេត្តកំពង់ធំ ករណីនេសាទខុសច្បាប់នៅរដូវបិទនេសាទ។ លោកបានបញ្ជាក់ថា បើសិនជាឃើញសកម្មភាពរបស់ពួកគេជាលើកទី២ លោកនឹងស្នើសុំដីការចាប់បញ្ជូនខ្លួនទៅចាត់ការតាមនីតិវិធីច្បាប់។ នេះបើតាមការបង្ហោះលើទំព័រហ្វេសប៊ុករបស់លោក នៅថ្ងៃទី២៧ ខែ សីហា ឆ្នាំ២០២២។
បើតាមលោកបណ្ឌិតសុខ ទូច បុគ្គលដែលត្រូវបានបង្ហាញអត្តសញ្ញាណ [ឈ្មោះ] គឺពលរដ្ឋរស់នៅខេត្តពោធិ៍សាត់មានចំនួន៣៩រូប ហើយខេត្តកំពង់ធំ មានចំនួន១៦រូប។ ពួកគេបានលួចរាយស្បៃមុង និងរបាំងសាច់អួនជាដើម។
បើតាមរដ្ឋបាលជលផលកាលពីថ្ងៃទី ៣០ ខែឧសភាឆ្នាំ២០២២ រដូវបិទនេសាទឆ្នាំនេះ ត្រូវបានកំណត់ចាប់ពីថ្ងៃទី០១ ខែមិថុនា ដល់ថ្ងៃទី៣០ ខែកញ្ញា ចំពោះដែននេសាទទឹកសាប រួមមាន ខេត្តកំពង់ឆ្នាំង ពោធិ៍សាត់ បាត់ដំបង ប៉ៃលិន បន្ទាយមានជ័យ សៀមរាប ឧត្តរមានជ័យ ព្រះវិហារ រតនគិរី មណ្ឌលគិរី ក្រចេះ ត្បូងឃ្មុំ កំពង់ចាម កំពង់ធំ និងមួយផ្នែក នៃរាជធានីភ្នំពេញ និងខេត្តកណ្តាលដែលស្ថិតនៅខាងជើងខ្សែស្របទន្លេចតុមុខ។
ចំណែកចាប់ពីថ្ងៃទី០១ ខែកក្កដា ដល់ថ្ងៃទី៣១ ខែតុលា ឆ្នាំ២០២២ រដូវបិទនេសាទនឹងត្រូវអនុវត្តលើ ខេត្តព្រៃវែង ស្វាយរៀង តាកែវ ខេត្តកំពង់ស្ពឺ និងមួយផ្នែក នៃរាជធានីភ្នំពេញ និងខេត្តកណ្ដាល ដែលស្ថិតនៅខាងត្បូងខ្សែស្របទន្លេចតុមុខ។ នៅក្នុងរយៈពេលបិទនេសាទនេះ អ្នកនេសាទទាំងអស់ត្រូវប្រើតែឧបករណ៍នេសាទគ្រួសារតែប៉ុណ្ណោះ។
យ៉ាងណា លោក សុខ ទូច ថាចំពោះបុគ្គលជាង៥៥ រូបដែលក្រុមស្រាវជ្រាវនៃរាជបណ្ឌិតសភាកម្ពុជារកឃើញ ត្រូវបញ្ឈប់សកម្មភាពនេសាទខុសច្បាប់ជាបន្ទាន់៕
#លោក សុខ ទូច #ការនេសាទខុសច្បាប់
