ទីក្រុងយ៉ាំងហ្គោនៈ រដ្ឋមន្ត្រីការបរទេសរុស្ស៊ីបានថ្លែងកាលពីថ្ងៃពុធ (៣ សីហា)ថាប្រទេសរុស្ស៊ីគាំទ្រកិច្ចខិតខំប្រឹងប្រែងរបស់របបសិកមីយ៉ាន់ម៉ាក្នុងការធ្វើអោយប្រទេសមាន “ស្ថិរភាព” ។លោក Sergei Lavrov ថ្លែងបែបនេះក្នុងអំឡុងពេលជួបពិភាក្សាជាមួយឧត្តមសេនីយកំពូលភូមា។នេះបើយោងតាមប្រព័ន្ធផ្សព្វផ្សាយរដ្ឋរបស់រុស្ស៊ី។
ប្រទេសមីយ៉ាន់ម៉ាមានភាពចលាចលចាប់តាំងពីការដណ្តើមអំណាចរបស់យោធាកាលពីឆ្នាំមុន។មនុស្សជាង 2,100 នាក់ត្រូវបានសម្លាប់នៅក្នុងការបង្រ្កាបលើក្រុមប្រឆាំង នេះបើយោងតាមអ្នកឃ្លាំមើលក្នុង
ស្រុក។
លោក Sergei Lavrov បាននិយាយក្នុងអំឡុងកិច្ចពិភាក្សាក្នុងរដ្ឋធានី Naypyidaw ប្រទេសមីយ៉ាន់ម៉ាថា “ពួកយើងសាមគ្គីគ្នាក្នុងការខិតខំប្រឹងប្រែងរបស់របបយោធាក្នុងការធ្វើឱ្យប្រទេសមានស្ថិរភាព ” ។
ប្រទេសរុស្ស៊ីគឺជាសម្ព័ន្ធមិត្តដ៏សំខាន់ដែលបានផ្គត់ផ្គង់អាវុធដ៍ធំដល់របបយោធាឯកោភូមា ដែលត្រូវបានក្រុមសិទ្ធិមនុស្សចោទប្រកាន់ថាបានបំពាក់អាវុធដល់យោធា ដើម្បីវាយប្រហារជនស៊ីវិលចាប់តាំងពីរដ្ឋប្រហារកាលពីឆ្នាំមុន។
លោក Lavrov បានបន្ថែមថា “នៅឆ្នាំក្រោយ ភូមានឹងរៀបចំការបោះឆ្នោតនីតិបញ្ញត្តិ ហើយយើងសូមជូនពរឱ្យភូមាទទួលបានជោគជ័យក្នុងការធ្វើឱ្យប្រទេសរបស់មីយ៉ាន់ម៉ាកាន់តែរឹងមាំ និងរីកចម្រើន”។ ក្រុមប្រឆាំងភូមាបាននិយាយថា ការបោះឆ្នោតខែសីហា ឆ្នាំ 2023 នឹងមិនមានភាពសេរី និងយុត្តិធម៌។
លោក Lavrov គ្រោងនឹងធ្វើដំណើរទស្សនកិច្ចចូលរួមកិច្ចប្រជុំរដ្ឋមន្ត្រីការបរទេសនៃសមាគមប្រជាជាតិអាស៊ីអាគ្នេយ៍ (អាស៊ាន)នៅកម្ពុជា ដែលមិនមានវត្តមានអ្នកការទូតកំពូលរបស់របបសឹកភូមាចូលរួមក្នុងកិច្ចប្រជុំនេះទេ។
ដំណើរទស្សនកិច្ចរបស់លោកSergei Lavrov ធ្វើឡើងបន្ទាប់ពីរបបសឹកភូមាបានបង្កឱ្យមានកំហឹងជាអន្តរជាតិជាថ្មីកាលពីសប្តាហ៍មុន ដោយបានប្រហារជីវិតអ្នកទោសចំនួន 4 នាក់ក្នុងនោះមានអតីតសមាជិកសភា និងសកម្មជនប្រជាធិបតេយ្យផងដែរ។
ប្រភព៖CNA, 03 August 2022
