កាលពីថ្ងៃចន្ទ ប្រទេសចិនបានព្រមានអំពី “ផលវិបាកធ្ងន់ធ្ងរ” ប្រសិនបើលោកស្រី Nancy Pelosi ប្រធានរដ្ឋសភាសហរដ្ឋអាមេរិកបំពេញទស្សនកិច្ចនៅកោះតៃវ៉ាន់នាប៉ុន្មានសប្តាហ៍ខាងមុខនេះ។
លោកស្រី Pelosi នឹងក្លាយជាអ្នកនយោបាយអាមេរិកដែលមានឋានៈខ្ពស់បំផុតចាប់តាំងពីឆ្នាំ 1997 ដែលធ្វើដំណើរទៅកាន់កោះតៃវ៉ាន់។
ប្រទេសចិនចាត់ទុកតៃវ៉ាន់គ្រាន់តែជាខេត្តមួយបំបែកចេញពីចិនតែប៉ុណ្ណោះ ដែលចុងក្រោយនឹងក្លាយជាផ្នែកមួយនៃប្រទេសចិនម្តងទៀត ហើយចិនមិនបានបដិសេធក្នុងការប្រើប្រាស់កម្លាំង ដើម្បីបង្រួបបង្រួមកោះតៃវ៉ាន់ឡើយ។
កាលពីសប្តាហ៍មុន ប្រធានាធិបតី Joe Biden បានប្រាប់អ្នកយកព័ត៌មានថា “ការប្រើមធ្យោបាយយោធាវាមិនមែនជាគំនិតល្អនោះទេ”
ប៉ុន្តែសេតវិមានបានហៅវោហាសាស្ត្ររបស់ចិនប្រឆាំងនឹងការធ្វើដំណើរទស្សនកិច្ចនេះថា “មិនមានប្រយោជន៍ និងមិនចាំបាច់” ។
ហេតុអ្វីបានជា លោកស្រីPelosi ចង់ទៅទស្សនកិច្ចកោះតៃវ៉ាន់?
ដោយសារមានការគាំទ្រកោះតៃវ៉ាន់យ៉ាងខ្លាំងក្នុងចំណោមសាធារណជនអាមេរិក និងក្នុងសភាអាមេរិក។លោកស្រីPelosi ក្នុងអាជីពជាសមាជិកសភារយៈពេល35ឆ្នាំ តែងរិះគន់ប្រទេសចិន។
លោកស្រីបានបរិហារកំណត់ត្រាសិទ្ធិមនុស្សនៅប្រទេសចិន និងបានជួបជាមួយក្រុមអ្នកប្រឆាំងប្រទេសចិនដែលគាំទ្រលទ្ធិប្រជាធិបតេយ្យ និងលោកស្រីបានទៅទស្សនាទីលានធានអានមេន ដើម្បីរំលឹកដល់ជនរងគ្រោះដែលត្រូវបានសម្លាប់ ភាគច្រើនជាបាតុករនិស្សិតកាលពីឆ្នាំ1989 ។ តាមផែនការគ្រោងទុកលោកស្រី Pelosi ត្រូវទៅទស្សនកិច្ចកោះតៃវ៉ាន់តាំងពីខែមេសា ឆ្នាំ២០២២នេះប៉ុន្តែត្រូវបានពន្យារពេលដោយសារលោកស្រី Pelosi បានធ្វើតេស្តវិជ្ជមានCovid-19។ លោកស្រី Pelosi បានបដិសេធមិននិយាយលម្អិតអំពីដំណើរទស្សនកិច្ចនេះទេ ប៉ុន្តែបាននិយាយកាលពីសប្តាហ៍មុនថា វាជាការសំខាន់សម្រាប់យើងក្នុងការបង្ហាញការគាំទ្រចំពោះតៃវ៉ាន់។
ហេតុអ្វីចិនប្រឆាំងនឹងដំណើរទស្សនកិច្ចរបស់លោកស្រី Pelosi នៅពេលនេះ?
ទីក្រុងប៉េកាំងចាត់ទុកតៃវ៉ាន់ជាខេត្តមួយរបស់ខ្លួន ហើយបានលើកឡើងម្តងហើយម្តងទៀតនូវលទ្ធភាពនៃការបង្រួបបង្រួមកោះតៃវ៉ាន់ដោយប្រើកម្លាំងក្នុងករណីចាំបាច់។
មន្ត្រីចិនបានសម្តែងការខឹងសម្បារចំពោះអ្វីដែលពួកគេចាត់ទុកថាជាការបង្កើនទំនាក់ទំនងការទូតរវាងក្រុងតៃប៉ិ និងក្រុងវ៉ាស៊ីនតោន។ ការខឹងសម្បារនេះរួមបញ្ចូលទាំងដំណើរទស្សនកិច្ចដ៏គួរឲ្យភ្ញាក់ផ្អើលទៅកាន់កោះតៃវ៉ាន់ដោយសមាជិកសភាអាមេរិកចំនួន ៦ នាក់កាលពីខែមេសា។កាលពីថ្ងៃចន្ទ អ្នកនាំពាក្យក្រសួងការបរទេសចិន លោក Zhao Lijian បានព្រមានថាប្រទេសចិននឹងចាត់វិធានការយ៉ាងម៉ឺងម៉ាត់ ប្រសិនបើលោកស្រី Pelosi បំពេញទស្សនកិច្ចនៅតៃវ៉ាន់។លោក Zhao Lijian បាននិយាយថា “សហរដ្ឋអាមេរិកនឹងទទួលខុសត្រូវទាំងស្រុងចំពោះផលវិបាកធ្ងន់ធ្ងរ” ។អ្នកនាំពាក្យក្រសួងការពារជាតិចិនថាអាចនឹងមានការឆ្លើយតបតាមមធ្យោបាយយោធា។
លោកវរសេនីយ៍ឯក Tan Kefei បានប្រាប់កាសែត China Daily ថា “ប្រសិនបើភាគីអាមេរិកទទូចចង់ធ្វើបែបនេះទៀត យោធាចិននឹងមិនអង្គុយនៅស្ងៀមទេ ហើយនឹងចាត់វិធានការខ្លាំងក្លា ដើម្បីរារាំងការជ្រៀតជ្រែកពីខាងក្រៅ និងការប៉ុនប៉ងផ្តាច់ខ្លួនឯករាជ្យរបស់កោះតៃវ៉ាន់” ។
សារព័ត៌មាន BBC វ៉ាស៊ីនតោន ២៧ កក្កដា ២០២២
