សៀមរាប៖ លោក ឃឹម ហ្វីណង់ អភិបាលស្រុកបន្ទាយស្រី ក្នុងខេត្តសៀមរាប បានហាមជាដាច់ខាតមិនឱ្យមានទីសត្តឃាតសត្វឆ្កែ ការជួញដូរ និងការធ្វើអាជីវកម្មលក់សាច់ឆ្កែគ្រប់រូបភាពនៅស្រុកបន្ទាយស្រី ទីដែលលោកប្រឹងប្រែងអភិវឌ្ឍន៍ស្រុកមួយនេះក្លាយជាកន្លែងទេសចរណ៍ដ៏ទាក់ទាញ។
ការបញ្ជាក់របស់លោកអភិបាលស្រុកបន្ទាយស្រី ធ្វើឡើងនៅលើទំព័រហ្វេសប៊ុករបស់លោកនៅថ្ងៃទី០៥ ខែកក្តដា ឆ្នាំ២០២២នេះ បន្ទាប់ពីលោកមើលឃើញថា ជំនួញសាច់ឆ្កែក្នុងស្រុកបន្ទាយស្រីគឺធំជាងគេបើធៀបទៅនឹងស្រុកផ្សេងៗនៃខេត្តទេសចរប្រវត្តិសាស្រ្តសៀមរាបអង្គរ។
លោកអភិបាលស្រុកបន្ទាយស្រីវ័យក្មេងរូបនេះ មិនលាក់លៀមឡើយ ដោយលោកបង្ហាញច្បាស់ៗថាក្នុងឃុំព្រះដាក់ ស្រុកបន្ទាយស្រីមានទីតាំងប្រមូលទិញសត្វឆ្កែរស់ពីបណ្តាស្រុកផ្សេងៗមកស្តុកទុកជាច្រើនកន្លែង ហើយក៏ជាកន្លែងផ្គត់ផ្តង់បន្តសត្វឆ្កែរស់និងសាច់ឆ្កែទៅតំបន់ដទៃទៀតក្នុងប្រទេសកម្ពុជាផងដែរ។
លោកសង្កាត់ធ្ងន់ថា ការជួញដូរសាច់ឆ្កែនេះធ្វើឱ្យប៉ះពាល់ដល់វិស័យទេសចរណ៍ និងកេរ្តិ៍ឈ្មោះរបស់ស្រុក ដែលនេះជាមូលហេតុធ្វើឱ្យរដ្ឋបាលស្រុកបន្ទាយស្រីឈានទៅបិទរបរលក់ដូរសាច់សត្វស្មោះត្រង់នឹងម្ចាស់មួយនេះ។
សូមរំលឹកថា កាលពីថ្ងៃទី ៦ ខែ កក្កដា ឆ្នាំ ២០២០ មន្ទីរកសិកម្ម រុក្ខាប្រមាញ់ និងនេសាទខេត្តសៀមរាបធ្លាប់បានចេញសេចក្ដីជូនដំណឹងដោយព្រមានចាត់វិធានការផ្លូវច្បាប់ចំពោះអាជីវករទាំងឡាយណាដែលបន្តការធ្វើអាជីវកម្ម ទិញ លក់ និងពិឃាតសត្វឆ្កែ ដោយគ្មានការអនុញ្ញាត ព្រោះទង្វើនេះធ្វើឲ្យប៉ះពាល់យ៉ាងធ្ងន់ធ្ងរដល់សុខភាពសាធារណៈ៕
