loader

របាយការណ៍៖សិស្សស្រី៥៦%ក្នុងសាលារៀនចំនួន៥២យល់ដឹងពីដើមចមកើតអំពើហិង្សា

ភ្នំពេញ៖ អង្គការ Save the Children ប្រចាំប្រទេសកម្ពុជាបានដាក់បង្ហាញរបាយការណ៍ថ្មីមួយរបស់ខ្លួនដោយរកឃើញថា សិស្សចំនួន១៥២នាក់ក្នុងនោះមានសិស្សស្រី ៥៦% នៅសាលារៀនចំនួន ៥២ក្នុងខេត្តសៀមរាប និងព្រះវិហារ បានយល់ដឹងពីអាកប្បកិរិយាដែលបង្កើតជាអំពើហិង្សាលើកុមារ និងយល់ដឹងពីរចនាសម្ព័ន្ធនៃការរាយការណ៍ឆ្លើយតបករណីកើតមានហិង្សា។

សិស្សានុសិស្សនិងគ្រូបង្រៀនដែលទទួលបានការបណ្តុះបណ្តាលពីអង្គការSave the Children។រូបភាពពីក្រុមការងារអង្គការSave the Children ។

របាយការណ៍ដែលចេញផ្សាយកាលពីថ្ងៃទី២៧ ខែមិថុនា ឆ្នាំ២០២២បង្ហាញទៀតថា រយៈពេល ២១ ខែនៃការអនុវត្តគម្រោង អ្នកឆ្លើយសំណួរ បានកត់សម្គាល់ពីការកើនឡើងនៃការយល់ដឹងលើបញ្ហាហិង្សាលើកុមារ និងការរាយការណ៍ឆ្លើយតបនៅក្នុងគ្រួសារ និងសហគមន៍។ ក្នុងនោះក្មេងស្រី និងសិស្សដែលមានពិការភាព បានបង្ហាញពីការយល់ដឹងកាន់តែច្រើន បើធៀបនឹងមិត្តភក្ដិប្រុសរបស់ពួកគេ។

របាយការណ៍នៃគម្រោងនេះ បានបង្ហាញពីការថយចុះភាគរយនៃសិស្សដែលជួបប្រទះអំពើហិង្សាពី ៤០% ទៅ៣១%។

តែយ៉ាងណារបាយការណ៍នូវតែដាក់ការព្រួយបារម្ភនូវតួលេខជាភាគរយខាងលើដែលនៅមានកម្រិតខ្ពស់នៅឡើយ ហើយករណីនេះ​បង្ហាញពីតម្រូវការបន្ថែម ដើម្បីការពារនិងឆ្លើយតបទៅនឹងហិង្សាលើកុមារនៅក្នុងសាលារៀន។

រូបភាពនេះទទួលបានពីក្រុមការងារអង្គការSave the Children ។

 

លោក ឡេង វីរៈ នាយកប្រតិបត្តិនៃអង្គការទស្សនៈពិភពលោកកម្ពុជាបានថ្លែងក្នុងរបាយការណ៍ថា បញ្ហានេះ ទាមទារការចូលរួមពីសហគមន៍មួយទាំងមូល ដើម្បីការពារកុមារពីអំពើហិង្សា។ លោកថា គម្រោងសាកល្បងនេះបង្ហាញថា នៅពេលសិស្សានុសិស្ស សមាជិកនៃគណៈកម្មាធិការឃុំដើម្បីស្ត្រី និងកុមារ គ្រូបង្រៀន និងឪពុកម្តាយធ្វើការជាមួយគ្នា ពួកគេអាចធ្វើឱ្យសាលារៀន និងសហគមន៍ក្លាយជាកន្លែងមានសុវត្ថិភាពទដែលកុមារសមនឹងទទួលបាន។

ដោយឡែកនាយិកាប្រចាំប្រទេស នៃអង្គការភ្លែនអន្តរជាតិកម្ពុជា លោកស្រី គ្វីននេត វ៉ង និយាយថា អំពើហិង្សាលើកុមារ ជាពិសេសអំពើហិង្សាលើយេនឌ័រ និងការធ្វើបាប បានបណ្តាលឱ្យកុមារបោះបង់ការសិក្សា ដោយក្មេងស្រីទំនងជាជួបប្រទះការគំរាមកំហែងផ្លូវចិត្ត ការគំរាមកំហែងតាមអ៊ីនធើណែត អំពើហិង្សាផ្លូវភេទ និងការបៀតបៀនជាដើម។

រូបភាពនេះទទួលបានពីក្រុមការងារអង្គការSave the Children ។

 

លោកស្រីបន្ថែមថា គម្រោងរួមគ្នានេះ បានផ្តល់នូវសិទ្ធិអំណាចដល់ក្មេងស្រី ក្មេងប្រុស សិស្សដែលមិនកំណត់អត្តសញ្ញាណភេទខ្លួនឯង កុមារដែលមានពិការភាព និងតួអង្គការពារកុមារតាមសហគមន៍ ឱ្យហ៊ាននិយាយ និងចាត់វិធានការជាវិជ្ជមានប្រឆាំងនឹងអំពើហិង្សា និងការរំលោភបំពាននៅក្នុងសាលារៀន ។

សូមបញ្ជាក់ថា គម្រោងនេះបានបង្កើតសម្ព័ន្ធដៃគូរបស់អង្គការមិនមែនរដ្ឋាភិបាលអន្តរជាតិ រួមមានអង្គការ Save the Children International អង្គការ Plan International Cambodia និងអង្គការ World Vision International-Cambodia ជាដៃគូអនុវត្តក្រោមការដឹកនាំរបស់ក្រសួងអប់រំ។ គម្រោងនេះ មានរយៈពេល ២១ខែ ចន្លោះពីថ្ងៃទី១ ខែតុលា ឆ្នាំ២០២០ ដល់ថ្ងៃទី៣០ ខែមិថុនា ឆ្នាំ២០២២៕

 

 

0 0 votes
Article Rating
guest
0 Comments
Inline Feedbacks
View all comments

ព័ត៌មានទាក់ទង

ADB ព្យាករណ៍កំណើនសេដ្ឋកិច្ចកម្ពុជានៅរក្សាក្នុងរង្វង់ ៥ ភាគរយក្នុងឆ្នាំ២០២២នេះ

ភ្នំពេញ៖ ធនាគារអភិវឌ្ឍន៍អាស៊ី(ADB)បានរក្សាការ[...]

លោក ខៀវ សំផន ត្រូវតុលាការសម្រេចដាក់ពន្ធនាគារអស់មួយជីវិត

លោក ខៀវ សំផន ត្រូវតុលាការសម្រេចដាក់ពន្ធនាគារអស់មួយជីវិត

ថ្ងៃព្រហស្បតិ៍ ទី២២ ខែកញ្ញា ឆ្នាំ២០២២

ភ្នំពេញ៖ អង្គជំនុំជម្រះវិសាមញ្ញក្នុងតុលាការកម[...]

កម្ពុជាគ្រោងចុះបញ្ជី នំបញ្ចុក គុនល្បុក្កតោ និងព្រះរាជពិធីបុណ្យអុំទូកជាសម្បត្តិអរូបីយនៅ UNSCO

ភ្នំពេញ៖  ថ្លែងក្នុងសន្និសីទសារព័ត៌មានស្ដីពី [...]

ព័ត៏មានថ្មី

វីដេអូថ្មីបំផុត

0
Would love your thoughts, please comment.x
()
x