ភ្នំពេញ៖ ក្រសួងធនធានទឹក និងឧតុនិយម នៅថ្ងៃទី២៣ ខែ វិច្ឆិកា ឆ្នាំ២០១៥នេះ បានឲ្យដឹងថា សីតុណ្ហភាពនៅក្នុងប្រទេសកម្ពុជា នៅខែប្រាំងសម្រាប់ឆ្នាំ២០១៦ខាងមុខ នឹងកើនកំដៅខ្លាំងបណ្តាលឲ្យក្តៅហួតហែង ខណៈពេលដែលរដូវវស្សាអាចនឹងមកដល់យឺត និងមានភ្លៀងធ្លាក់តិចតួចនៅដើមរដូវវស្សា។
សេចក្តីជូនដំណឹងក្រសួងធនធានទឹក និងឧតុនិយមបានបន្តទៀតថា សីតុណ្ហភាពនៅក្នុងប្រទេសកម្ពុជាកើនពី៤០ ដល់៤១អង្សា និងមានភ្លៀងធ្លាក់តិចតួចនៅដើមរដូវវស្សា ដោយសារការប្រែប្រែអាកាសធាតុនៅតំបន់មហាសមុទ្រប៉ាស៊ីហ្វិកភាគខាងលិច និងសមុទ្រចិនខាងត្បូង បានជះឥទិ្ធពល នៃការប្រែប្រួលអាកាសធាតុមកប្រទេសកម្ពុជា។
បើតាមសេចក្តីជូនដំណឹងរបស់ក្រសួងដដែល ចាប់ពីខែធ្នូ ឆ្នាំ២០១៥ ដល់ខែឧសភា ឆ្នាំ២០១៦ សីតុណ្ហភាពនៅកម្ពុជា នឹងមានការប្រែប្រួល ពិសេសនៅខែមេសា និងខែឧសភា ឆ្នាំ២០១៦ កម្ពុជានឹងកើនកំដៅ ក្តៅហួតហែង ដែលសីតុណ្ហភាពជាអតិបរមាកើនពី ៤០ ដល់៤១ អង្សា។
ក្រសួងធនធានទឹក និងឧតុនិយមក៏បានអំពាវនាវដល់ ក្រសួង អាជ្ញាធរដែនដី អ្នកពាក់ព័ន្ធនិងសាធារណជន ត្រូវចូលរួមរក្សាទឹកទុក ដើម្បីប្រើប្រាស់ប្រចាំថ្ងៃ និងប្រើសម្រាប់វិស័យកសិកម្មជាដើម៕
