ការស្រាវជ្រាវថ្មីមួយជំរុញឱ្យកម្ពុជាវិនិយោគថែមទៀតលើវិស័យអប់រំ បន្ទាប់ពីរកឃើញថាកុមារខាតរៀនច្រើនដោយសារកូវីដ-១៩។ នេះបើតាមរបាយការណ៍មួយផ្សាយដោយអង្គការយូនីសេហ្វកាលពីថ្ងៃអង្គារ។
ការស្រាវជ្រាវថ្មីមួយជំរុញឱ្យកម្ពុជាវិនិយោគថែមទៀតលើវិស័យអប់រំ បន្ទាប់ពីរកឃើញថាកុមារខាតរៀនច្រើនដោយសារកូវីដ-១៩។ នេះបើយោងតាមរបាយការណ៍មួយផ្សាយដោយអង្គការយូនីសេហ្វកាលពីថ្ងៃអង្គារ។ សេចក្ដីប្រកាសព័ត៌មានរបស់យូនីសេហ្វបានឱ្យដឹងថា ក្រសួងអប់រំ យុវជន និងកីឡា បានវាយតម្លៃលើការរៀនសូត្រនៅថ្នាក់ទី៦ របស់កុមារចំនួន ៦ ពាន់នាក់ នៅក្នុង ២៣០ សាលារៀនទូទាំងប្រទេស អំឡុងខែវិច្ឆិកា ឆ្នាំ២០២១ ដោយមានការគាំទ្រពីយូនីសេហ្វ និងពីដៃគូមួយចំនួនទៀត។
ជា«លទ្ធផលថ្មីគួរឱ្យភ្ញាក់ផ្អើល» គឺថា«ការសិក្សារបស់កុមារបានធ្លាក់ចុះនៅក្នុងអំឡុងពេលនៃជំងឺរាតត្បាត» ហើយថា «ដោយប្រៀបធៀបជាមួយការវាយតម្លៃដូចគ្នានៅឆ្នាំ២០១៦ ភាគរយនៃសិស្សានុសិស្ស ដែលមិនអាចបង្ហាញអំពីជំនាញចំណេះដឹងមូលដ្ឋានផ្នែកភាសាខ្មែរ បានកើនឡើងពី ៣៤ ភាគរយ ទៅ ៤៥ ភាគរយ និងផ្នែកគណិតវិទ្យា បានកើនឡើងពី ៤៩ ភាគរយ ទៅ ៧៤ ភាគរយ»។
សាលារៀននៅប្រទេសកម្ពុជាបានបិទទ្វារអស់រយៈពេល ២៥០ ថ្ងៃ នៅឆ្នាំ២០២០ និងឆ្នាំ២០២១។ ចំនួននេះស្ទើរតែស្មើនឹង ២ ភាគ ៣ នៃឆ្នាំសិក្សាចំនួនពីរឆ្នាំ។
លទ្ធផលនៃការវាយតម្លៃលើការរៀនសូត្រនេះបង្ហាញថា ទោះបីជាសិស្សានុសិស្សទាំងអស់បានជួបប្រទះនឹងការបាត់បង់ការរៀនសូត្រ បន្ទាប់ពីការបិទសាលារៀនទាំងនេះក្ដី ផលប៉ះពាល់មិនមានលក្ខណៈដូចៗគ្នាឡើយ។ ម្យ៉ាង កុមារាបានបាត់បង់ការរៀនសូត្រច្រើនជាងមុន និងទទួលបានលទ្ធផលខ្សោយជាងមុននៅក្នុងការធ្វើតេស្ត ពោលគឺកុមារាចំនួន ៥៥ ភាគរយ ត្រូវបានវាយតម្លៃថាមិនសម្រេចបានជំនាញ ចំណេះដឹងមូលដ្ឋាន ផ្នែកភាសាខ្មែរឡើយ នៅឆ្នាំ២០២១ ធៀបនឹងកុមារីដែលមានចំនួន ៣៤ ភាគរយ។ ម្យ៉ាងទៀត សាលារៀននៅទីក្រុងបានជួបប្រទះនឹងការបាត់បង់ការរៀនសូត្រក្នុងកម្រិតខ្ពស់ជាងពីមុន ទោះបីជាសាលានៅទីក្រុងបន្តមានលទ្ធផលសិក្សាខ្ពស់ជាងសាលានៅទីជនបទក៏ដោយ។ ជាក់ស្ដែង ចំនួនសិស្សានុសិស្សដែលមិនសម្រេចបាននូវស្តង់ដារកម្រិតមូលដ្ឋានក្នុងមុខវិជ្ជាគណិតវិទ្យា បានកើនឡើងពីចំនួន ៣០ ភាគរយ ទៅ ៦២ ភាគរយ នៅសាលារៀនក្នុងទីក្រុង ខណៈដែលសាលារៀនក្នុងទីជនបទ មានសិស្សានុសិស្សមិនបានសម្រេចនូវស្តង់ដារទាំងនោះ បានកើនទ្បើងពី ៥៤ ភាគរយ ទៅ ៧៧ ភាគរយ។ ទន្ទឹមនឹងនេះ សិស្សានុសិស្សកាន់តែច្រើនត្រូវបានរកឃើញថាធ្លាក់មុខវិជ្ជាគណិតវិទ្យា ជាជាងមុខវិជ្ជាភាសាខ្មែរ។ ចំពោះមុខវិជ្ជាគណិតវិទ្យា មានសិស្សចំនួន ៤៩ ភាគរយ បានធ្លាក់កម្រិតស្តង់ដារមូលដ្ឋានក្នុងឆ្នាំ២០១៦ ធៀបនឹង ៧៤ ភាគរយក្នុងឆ្នាំ២០២១។ សម្រាប់ភាសាខ្មែរ ភាគរយខុសគ្នាគឺមានកម្រិតតិចជាង ពោលគឺ ៣៤ ភាគរយ មិនបានជាប់កម្រិតស្តង់ដារមូលដ្ឋានក្នុងឆ្នាំ២០១៦ ធៀបនឹង ៤៥ ភាគរយ ក្នុងឆ្នាំ២០២១។
ឯកឧត្តម ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានមានប្រសាសន៍តាមសម្ដីដើម ក្នុងសេចក្ដីប្រកាសព័ត៌មានរបស់យូនីសេហ្វកាលពីថ្ងៃអង្គារថា៖ «លទ្ធផលទាំងនេះគឺជាលទ្ធផលគួរឱ្យបារម្ភ» ហើយថា «យើងបានខិតខំប្រឹងប្រែងធ្វើការងារជាមួយដៃគូទាំងអស់របស់យើង ដើម្បីដាក់ចេញនូវវិធានការរៀនសូត្រពីចម្ងាយ នៅពេលសាលារៀនបិទទ្វារក្នុងអំឡុងពេលនៃជំងឺរាតត្បាត។ ការសិក្សានានាក៏បានបង្ហាញថា វិធានការទាំងនេះពិតជាបានជួយរក្សាការរៀនសូត្រសម្រាប់កុមារជាច្រើន ប៉ុន្តែលទ្ធផលនៃការវាយតម្លៃលើការរៀនសូត្រ បានបញ្ជាក់ថា សកម្មភាពទាំងនេះមិនទាន់គ្រប់គ្រាន់ ដើម្បីមកបង្គ្រប់មកវិញ ចំពោះសកម្មភាពទាំងអស់ដែលកុមារបានបាត់បង់ នៅពេលពួកគេមិនបានរៀនសូត្រនៅក្នុងថ្នាក់»ឡើយ។
ឯកឧត្ដមរដ្ឋមន្ត្រីបានបន្តថា៖ «ឥលូវនេះគឺជាពេលដែលយើងទាំងអស់គ្នាត្រូវព្យាយាម និងជួយកុមារកម្ពុជាតាមឱ្យទាន់ការរៀនសូត្រដែលពួកគេបានបាត់បង់។ នេះជាដំណើរការមួយដែលបានចាប់ផ្ដើមរួចហើយ ប៉ុន្តែនៅពេលនេះ វាត្រូវតែពន្លឿនបន្ថែមជាមួយនឹងការគាំទ្រពីដៃគូទាំងអស់នៅក្នុងវិស័យអប់រំ។»
ទន្ទឹមនឹងនេះ លោកស្រី ហ្វ័រូគ ហ្វ័រយូហ្សិត នាយិកាអង្គការយូនីសេហ្វប្រចាំកម្ពុជា បាននិយាយនៅក្នុងសេចក្ដីប្រកាសព័ត៌មានដដែលនោះថា៖ «ប្រទេសកម្ពុជាគឺជាប្រទេសមួយក្នុងចំណោមប្រទេសតិចតួច ដែលបានបង្ហាញទំហំនៃការបាត់បង់នេះ ជាមួយនឹងទិន្នន័យដែលអាចជឿទុកចិត្តបាន។ ខ្ញុំសូមទទួលស្គាល់នូវជំហានដ៏សំខាន់ៗ ដែលក្រសួង អប់រំ យុវជន និងកីឡា បានដាក់ចេញ ដើម្បីបង្កើតភស្តុតាងយ៉ាងសំខាន់នេះ សម្រាប់ផ្ដល់ជាភស្តុតាង និងជាមគ្គុទ្ទេសក៏ដល់គោលនយោបាយ និងវិធានការចាំបាច់ដើម្បីផ្លាស់ប្ដូរទិសដៅនៃនិន្នាការនេះ។»
នាយិកាអង្គការយូនីសេហ្វប្រចាំប្រទេសកម្ពុជា បានគូសបញ្ជាក់ទៀតថា៖ «សិស្សានុសិស្សគប្បីទទួលបានការគាំទ្រដែលចាំបាច់ ដើម្បីជួយឱ្យពួកគេតាមទាន់ការអប់រំរបស់ខ្លួន។ យើងក៏ត្រូវតែវិនិយោគច្រើនទៀតលើគណិតវិទ្យា និងចំណេះដឹងភាសាខ្មែរនៅថ្នាក់ដំបូងផងដែរ។ សិស្សានុសិស្សក្មេងៗត្រូវការមូលដ្ឋានរឹងមាំលើមុខវិជ្ជាស្នូលទាំងនេះ ដើម្បីទទួលបានលទ្ធផលកាន់តែល្អនៅថ្នាក់ក្រោយៗទៀត។ សម្រាប់យូនីសេហ្វ យើងប្តេជ្ញាចិត្តផ្ដល់កិច្ចខិតខំប្រឹងប្រែងអតិបរមាជាមួយដៃគូទាំងអស់ ដើម្បីជួយធ្វើឱ្យកិច្ចខិតខំប្រឹងប្រែងទាំងនេះសម្រេចបាន។»
បច្ចុប្បន្ន បើយោងតាមសេចក្ដីប្រកាសព័ត៌មានរបស់យូនីសេហ្វដដែល ក្រសួងអប់រំ យុវជន និងកីឡា រួមជាមួយយូនីសេហ្វ និងដៃគូនៃមូលនិធិភាពជាដៃគូដើម្បីអភិវឌ្ឍន៍សមត្ថភាពវិស័យអប់រំ កំពុងធ្វើការងារលើរបាយការណ៍អំពីការបាត់បង់ការរៀនសូត្រ និងវិធានការនានាដែលត្រូវតែធ្វើ ដើម្បីដោះស្រាយបញ្ហានេះ៕
