loader

លោក បៃឌិន សន្យាផ្តល់ជំនួយថ្មីដល់អ៊ុយក្រែន ហើយព្រមានរុស្ស៊ីអំពីរឿងអាវុធគីមី

ប្រធានាធិបតី ចូ បៃឌិន និងសម្ព័ន្ធមិត្តលោកខាងលិច កាលពីថ្ងៃព្រហស្បតិ៍ បានសន្យាពីរឿងដាក់ទណ្ឌកម្មថ្មីៗលើរុស្ស៊ី និងពីរឿងជំនួយមនុស្សធម៌សម្រាប់អ៊ុយក្រែន ដើម្បីឆ្លើយតបទៅនឹងការវាយប្រហាររបស់ប្រធានាធិបតីរុស្ស៊ី វ្ល៉ាឌីមៀ ពូទីន លើប្រទេសអ៊ុយក្រែន។ ទោះជាយ៉ាងនេះក្ដី ការផ្តល់ជំនួយយោធារបស់បស្ចិមប្រទេស ទាំងភាពទំនើប ទាំងបរិមាណ មិនបានឆ្លើយតបបានតាមអ្វីដែលប្រធានាធិបតីអ៊ុយក្រែន លោក វ៉ូឡូឌីមៀ ហ្ស៊ើឡិនស្គី បានទទូចសុំទេ។

លោក ឯម មាឃ ជូនសេចក្ដីរាយការណ៍ ដោយផ្អែកតាមទីភ្នាក់ងារសារព័ត៌មានអេភី …

 

 

ប្រធានាធិបតី ចូ បៃឌិន និងសម្ព័ន្ធមិត្តលោកខាងលិច កាលពីថ្ងៃព្រហស្បតិ៍ បានសន្យាពីរឿងដាក់ទណ្ឌកម្មថ្មីៗលើរុស្ស៊ី និងពីរឿងជំនួយមនុស្សធម៌សម្រាប់អ៊ុយក្រែន ដើម្បីឆ្លើយតបទៅនឹងការវាយប្រហាររបស់ប្រធានាធិបតីរុស្ស៊ី វ្ល៉ាឌីមៀ ពូទីន លើប្រទេសអ៊ុយក្រែន។ ទោះជាយ៉ាងនេះក្ដី ការផ្តល់ជំនួយយោធារបស់បស្ចិមប្រទេស ទាំងភាពទំនើប ទាំងបរិមាណ មិនទាន់បានឆ្លើយតបបានតាមអ្វីដែលប្រធានាធិបតីអ៊ុយក្រែន លោក វ៉ូឡូឌីមៀ ហ្ស៊ើឡិនស្គី បានទទូចសុំទេ ។

លោក បៃឌិន ក៏បានប្រកាសថា សហរដ្ឋអាមេរិកនឹងទទួលជនភៀសខ្លួនអ៊ុយក្រែនរហូតដល់ ១ សែន នាក់ ថ្វីបើលោកបាននិយាយថា ជនភៀសខ្លួនអ៊ុយក្រែនជាច្រើនទំនងជាចូលចិត្តស្នាក់នៅក្នុងប្រទេសជិតខាងប្រទេសរបស់ខ្លួន។ ទន្ទឹមនឹងនេះ លោក បៃឌិន បានថ្លែងទៀតថា សហរដ្ឋអាមេរិកនឹងផ្តល់ជំនួយបន្ថែមទៀត ដូចជាអាហារ ឱសថ ទឹកស្អាត និងការផ្គត់ផ្គង់ផ្សេងៗទៀត ដែលគិតជាប្រាក់មានតម្លៃ ១ ពាន់លានដុល្លារ។

បណ្ដាមេដឹកនាំប្រទេសបស្ចិមលោកបានចំណាយពេលកាលពីថ្ងៃព្រហស្បតិ៍ ដើម្បីរៀបគម្រោងសម្រាប់ជំហានបន្ទាប់ ក្នុងទប់ទល់នឹងអំពើឈ្លានពានរបស់រុស្ស៊ីនៅប្រទេសអ៊ុយក្រែនដែលមានរយៈពេលមួយខែកន្លងទៅ។ ពួកគេបានពិភាក្សាគ្នាអំពីរបៀបដែលពួកគេអាចឆ្លើយតប​ ប្រសិនបើលោក ពូទីន ដាក់ពង្រាយអាវុធគីមី អាវុធជីវសាស្ត្រ ឬអាវុធនុយក្លេអ៊ែរផងនោះ។ ពួកគេបានជួបគ្នានៅក្នុងកិច្ចប្រជុំកំពូលៗនាគ្រាអាសន្នចំនួនបីជាប់ៗគ្នា នៅក្នុងទីក្រុងប្រ៊ុចសែល។ ក្នុងចំណោមនោះ មានកិច្ចប្រជុំអង្គការណាតូ កិច្ចប្រជុំក្រុមប្រទេសជឿនលឿនទាំងប្រាំពីរ និងកិច្ចប្រជុំក្រុមប្រឹក្សាអឺរ៉ុបដែលមានសមាជិក ២៧ ប្រទេស។

លោក បៃឌិន ពេលថ្លែងក្នុង​សន្និសីទ​សារព័ត៌មាន​នាពេលល្ងាច ​បន្ទាប់​ពី​កិច្ច​ប្រជុំកំពូលទាំង​នោះ​ បាន​ព្រមាន​ថា ​ការ​វាយ​ប្រហារ​ដោយ​អាវុធគីមី​របស់ប្រទេស​រុស្ស៊ី «នឹង​បណ្ដាល​ឲ្យ​មាន​ការ​ឆ្លើយ​តប​តាមរបៀបដូចគ្នា»។

លោក បៃឌិ បានថ្លែងទៀតថា៖ «អ្នកកំពុងសួរថាតើណាតូនឹងឆ្លងព្រំដែនដែរឬទេ។ យើង​នឹង​ធ្វើ​ការ​សម្រេច​ចិត្ត​នៅ​ពេលសមស្រប»។

ទោះបីជាយ៉ាងនេះក្ដី មន្ត្រីសេតវិមានបាននិយាយក្នុងលក្ខខណ្ឌអនាមិកនៅពេលក្រោយមកថា ការថ្លែងរបស់លោក បៃឌិន មានន័យថាជាការផ្លាស់ប្តូរជំហររបស់សហរដ្ឋអាមេរិកដែលបានព្យាយាមចៀសវាងសកម្មភាពយោធាដោយផ្ទាល់របស់ខ្លួននៅក្នុងប្រទេសអ៊ុយក្រែនទេ។ លោក បៃឌិន និងមេដឹកនាំក្នុងអង្គការណាតូ ​បាន​សង្កត់​ធ្ងន់​ថា ​សហរដ្ឋអាមេរិក​និងណាតូ​នឹង​មិន​ដាក់​ទ័ព​នៅលើ​ទឹកដី​អ៊ុយក្រែន​ទេ។

ដោយថ្លែងអំណរអរគុណចំពោះជំនួយថ្មីៗដែលទើបបានសន្យា ប្រធានាធិបតីអ៊ុយក្រែន លោក វ៉ូឡូឌីមៀ ហ្ស៊ើឡិនស្គី បានបញ្ជាក់យ៉ាងច្បាស់ទៅកាន់សម្ព័ន្ធមិត្តបស្ចិមលោកថា រូបគាត់ត្រូវការជំនួយច្រើនជាងអ្វីដែលសម្ព័ន្ធមិត្តមានបំណងផ្តល់ឱ្យនាពេលនេះទៅទៀត។

លោក ហ្ស៊ើឡិនស្គី បានសំណូមពរសមាជិកអង្គការណាតូថា៖ «ខ្ញុំសុំមួយភាគរយនៃយន្តហោះទាំងអស់របស់អ្នក, មួយភាគរយនៃរថក្រោះទាំងអស់របស់អ្នក»។ តាមសម្ដីដើម ប្រធានាធិបតីអ៊ុយក្រែនបានបន្តថា៖ «យើង​គ្រាន់តែមិន​អាច​​ទិញរបស់​ទាំង​នោះ។ នៅពេលដែលយើងមានរបស់ទាំងអស់នេះ វានឹងផ្តល់ឱ្យយើង ក៏ដូចជាផ្ដល់ឱ្យអ្នកដែរ នូវសុវត្ថិភាព ១០០ភាគរយ។»

លោក បៃឌិន បាននិយាយថា ជំនួយបន្ថែមទៀតកំពុងដឹកមកហើយ។ ប៉ុន្តែ​មេដឹកនាំ​លោកខាងលិច​បាន​ដើរ​យ៉ាង​ប្រយ័ត្នប្រយែង ដើម្បី​កុំ​ឲ្យ​ជម្លោះ​កាន់តែ​រាលដាល​ហួស​ព្រំដែន​អ៊ុយក្រែន។

រដ្ឋាភិបាលសហរដ្ឋអាមេរិកនឹងពង្រីកការដាក់ទណ្ឌកម្មរបស់ខ្លួនលើប្រទេសរុស្ស៊ី ដោយផ្តោតលើសមាជិកសភារបស់ប្រទេសនេះ ក៏ដូចជាលើអ្នកសហការនានាក្នុងវិស័យការពារជាតិរុស្ស៊ី។ សហរដ្ឋ​អាមេរិក​បាន​និយាយ​ថា ខ្លួន​ក៏​នឹង​ធ្វើ​ការ​ជាមួយ​នឹង​ប្រទេស​លោក​ខាង​លិច​ផ្សេង​ទៀតដើម្បី​ធានា​ថា​ទុន​បម្រុងជា​មាសសុទ្ធរបស់​ធនាគារ​កណ្តាល​រុស្ស៊ី​ ក៏មិនអាចគេចផុតពី​ទណ្ឌកម្ម​ដែល​មាន​ស្រាប់ដែរ។

អគ្គលេខាធិការអង្គការណាតូ លោក ចេន ស្តូលធិនប៊ើក បាននិយាយថា មេដឹកនាំណាតូបានព្រមព្រៀងគ្នាកាលពីថ្ងៃព្រហស្បតិ៍ បញ្ជូនសម្ភារៈទៅអ៊ុយក្រែន ដើម្បីជួយប្រទេសនេះទប់ទល់នឹងការវាយប្រហារដោយអាវុធគីមី។

មន្ត្រីសេតវិមានបាននិយាយថា ទាំងសហរដ្ឋអាមេរិក ទាំងអង្គការណាតូ បាននឹងកំពុងធ្វើការលើផែនការយថាភូត ប្រសិនបើរុស្ស៊ីដាក់ពង្រាយអាវុធខុសច្បាប់។ អង្គការណាតូបានបណ្តុះបណ្តាលនិងបំពាក់សម្ភារៈឱ្យកងកម្លាំងយោធារបស់ខ្លួន ប្រសិនបើមានការវាយប្រហារដោយអាវុធបែបនេះលើប្រជាជន ប្រទេស ឬកងកម្លាំងរបស់សមាជិកខ្លួន។ ប៉ុន្តែអ៊ុយក្រែនមិនមែនជាសមាជិកអង្គការណាតូទេ។

លោក Stoltenberg បាននិយាយនៅក្នុងបទសម្ភាសន៍ជាមួយ អិនប៊ីស៊ី ញូស៍ ថា ប្រសិនបើរុស្ស៊ីដាក់ពង្រាយអាវុធគីមី នោះវានឹងធ្វើឱ្យ«ស្ថានភាពមិនអាចប៉ាន់ស្មានបាននិងប្រកបដោយគ្រោះថ្នាក់ គឺរឹតតែគ្រោះថ្នាក់ និងរឹតតែមិនអាចប៉ាន់ស្មានបាន»។ ប៉ុន្តែ អគ្គលេខាធិការអង្គការណាតូរូបនេះមិនបានប្រាប់ពីរបៀបដែលសម្ព័ន្ធមិត្តលោកខាងលិចអាចនឹងឆ្លើយតបទេ៕

យោង៖ Biden pledges new Ukraine aid, warns Russia on chem weapons | AP News

0 0 votes
Article Rating
guest
0 Comments
Inline Feedbacks
View all comments

ព័ត៌មានទាក់ទង

ប្រធានអង្គការសហប្រជាជាតិថាការវាយប្រហាររោងចក្រនុយក្លេអ៊ែរគឺជាការធ្វើអត្តឃាត

អគ្គលេខាធិការអង្គការសហប្រជាជាតិ លោក Antonio G[...]

ការបំផ្ទុះគ្រាប់បែកនៅវិហារអ៊ីស្លាមនៅអាហ្វហ្គានីស្ថានមានអ្នកស្លាប់យ៉ាងហោច ២១នាក់

ការបំផ្ទុះគ្រាប់បែកនៅវិហារឥស្លាមមួយអំឡុងពេលសូ[...]

ចិន​ប្រកាស​ធ្វើ​សមយុទ្ធ​ថ្មី ខណៈ​គណៈប្រតិភូ​អាមេរិក​ធ្វើ​ទស្សនកិច្ច​នៅ​តៃវ៉ាន់

តៃប៉ិ តៃវ៉ាន់ (AP)៖ ប្រទេសចិនបានប្រកាសធ្វើសមយ[...]

ព័ត៏មានថ្មី

វីដេអូថ្មីបំផុត

0
Would love your thoughts, please comment.x
()
x