សំឡេង៖
ចាប់តាំងពីមានការគំរាមជារឿយៗថា បើគណបក្សប្រជាជនកម្ពុជាចាញ់ឆ្នោតនឹងមានសង្គ្រាមនោះមក ស្ថានការណ៍នយោបាយនៅកម្ពុជាបានកើនកម្ដៅខ្លាំងឡើងៗពីមួយថ្ងៃទៅមួយថ្ងៃ។
វិភាគ៖ តើពលរដ្ឋកម្ពុជានឹងបណ្ដោយឱ្យប្រទេសនេះវិលទៅរកសង្គ្រាមស៊ីវិលវិញទេ?
Share
កម្ដៅនយោបាយនៅកម្ពុជាកាន់តែកើនឡើងខ្លាំងថែមទៀត ក្រោយពេលបក្សប្រឆាំងនៅប្រទេសភូមា បានឈ្នះការបោះឆ្នោតជាតិភ្លូកទឹកភ្លូកដី។ តើកម្ដៅនយោបាយដែលកើនឡើងនេះ អាចធ្វើឱ្យកម្ពុជាមានសង្គ្រាម ដូចការគំរាមម្ដងហើយម្ដងទៀតនោះទេ?
ទាក់ទងនឹងបញ្ហាសង្គ្រាមនៅកម្ពុជានេះ កាលពីសប្ដាហ៍មុន នាងកញ្ញា លោក លោកស្រី បានស្ដាប់ម្ដងរួចមកហើយ អំពីទស្សនៈរបស់អ្នកវិទ្យាសាស្ត្រនយោបាយ ថាតើអន្តរជាតិនឹងបណ្ដោយឱ្យកម្ពុជាមានសង្គ្រាមវិញទេ។ នៅពេលនោះ ទាំងលោកសាស្ត្រាចារ្យ សូ ចន្ថា ទាំងលោកសាស្ត្រាចារ្យ ឯម សុវណ្ណារ៉ា សុទ្ធតែមានប្រសាសន៍ដូចគ្នាថា អន្តរជាតិនឹងមិនបណ្ដោយឱ្យកម្ពុជាមានសង្គ្រាមវិញឡើយ ព្រោះគេបានចំណាយពេលច្រើនណាស់ ដើម្បីនាំសន្តិភាពមកឱ្យកម្ពុជា តាមរយៈកិច្ចព្រមព្រៀងសន្តិភាពទីក្រុងប៉ារីស ២៣ តុលា ១៩៩១។
នៅសប្ដាហ៍នេះ លោកសាស្ត្រាចារ្យទាំងពីររូបនឹងវិភាគជូននាងកញ្ញា លោក លោកស្រី ម្ដងទៀត អំពីថាតើពលរដ្ឋកម្ពុជានឹងបណ្ដោយឱ្យប្រទេសនេះធ្លាក់ទៅក្នុងសង្គ្រាមស៊ីវិលវិញទេ?
មុននឹងចូលទៅដល់សាស្ត្រាចារ្យវិទ្យាសាស្ត្រនយោបាយទាំងពីររូបនោះ សូមជម្រាបជូននាងកញ្ញា លោក លោកស្រី ថាអ្នកស្រាវជ្រាវពីការអភិវឌ្ឍសង្គម គឺលោក កែម ឡី ធ្លាប់មានប្រសាសន៍ថា មែនទែនទៅ អ្នកក្រីក្រនោះទេ ដែលចង់ឱ្យមានសង្គ្រាម ព្រោះជីវភាពរស់នៅរបស់ពួកគាត់សព្វថ្ងៃ វាលំបាកណាស់ទៅហើយ ទោះបីជាមានសង្គ្រាមក៏មិនប៉ះពាល់អ្វីដល់ពួកគេដែរ ផ្ទុយទៅវិញ វាជាឱកាសឱ្យសម្រាប់ពួកគេនាំមកនូវការផ្លាស់ប្ដូរទៅវិញទេ។ លោក កែម ឡី បន្តថា ចំណែកអ្នកធំ អ្នកមាន ឧកញ៉ា ឯណោះទៅវិញទេ ដែលខ្លាចមានសង្គ្រាម ព្រោះសង្គ្រាមបំផ្លាញអ្វីៗទាំងអស់ដែលពួកគេមាន។
សាស្ត្រាចារ្យវិទ្យាសាស្ត្រនយោបាយ លោក សូ ចន្ថា ក៏ឯកភាពដែរថា អ្នកក្រចង់ឱ្យមានសង្គ្រាម ព្រោះពួកគេគ្មានអ្វីទាំងអស់ ហើយក្នុងនោះអ្នកខ្លះ សូម្បីតែផ្ទះក៏គ្មាននៅផង៖ «ការលើកឡើងរបស់ប្រជាពលរដ្ឋដែលគាត់ក្រីក្រ ជាការពិតគាត់ចង់ឱ្យមានសង្គ្រាម ពីព្រោះគាត់ថា បើពេលដែលមានសង្គ្រាម គាត់អាចទៅយកអ្វីដែលជាទ្រព្យសម្បត្តិរបស់ក្រុមអ្នកមានមួយចំនួន ពីព្រោះនៅពេលនេះគាត់អត់មានអីទេ គាត់មានតែកង់ គាត់មានតែម៉ូតូ គាត់មានតែ – អ្នកខ្លះគ្មានផ្ទះផង»។
ទោះជាយ៉ាងនោះក្ដី ក៏លោកសាស្ត្រាចារ្យ សូ ចន្ថា យល់ថា កម្ពុជាមិនអាចមានសង្គ្រាមបានដែរ ព្រោះលោកជឿថា ក្រុមអ្នកមាន លោកធំ និងឧកញ៉ា ដែលមានបុណ្យសក្តិ ទ្រព្យសម្បត្តិមហាសាលទាំងអស់នោះ នឹងមិនរួមចំណែកទម្លាក់កម្ពុជាទៅក្នុងភ្លើងសង្គ្រាមឡើយ។ «យើងក្រឡេកទៅមើលចំណែកមួយទៀត ក្រុមអ្នកដឹកនាំ ក្រុមមេដឹកនាំឧកញ៉ា មានមន្ត្រីខ្ពង់ខ្ពស់ យើងឃើញថា ក្រុមមន្ត្រីទាំងអស់ហ្នឹងមានលុយរាប់កោដិ៍ រាប់លាន។ អ៊ីចឹងបើសិនជាមានសង្គ្រាមកើតឡើង ថាតើគាត់អ្នករក្សាចំនួនលុយដ៏មហាសាលរបស់គាត់ហ្នឹងបានទេ? អ៊ីចឹងអត់បានទេ។ មែនទែនទៅគាត់ខ្លាចបាត់បង់តួនាទី បាត់បង់ទ្រព្យសម្បត្តិរបស់គាត់ហ្នឹងខ្លាំងជាងពលរដ្ឋក្រីក្រទៅទៀត។ អ៊ីចឹងខ្ញុំមិនជឿថា ក្រុមអ្នកមានទាំងអស់ហ្នឹងនឹងរុញឱ្យមានសង្ក្រាមកើតឡើងនៅកម្ពុជាទេ។ តាមពិតនេះគ្រាន់តែជាវាហោសាស្ត្រនយោបាយ ដែលគំរាមដល់ពលរដ្ឋកុំឱ្យធ្វើការផ្លាស់ប្ដូរតែប៉ុណ្ណោះ»។
ចំណែកសាស្ត្រាចារ្យវិទ្យាសាស្ត្រនយោបាយមួយរូបទៀត គឺលោក ឯម សុវណ្ណារ៉ា មានប្រសាសន៍ថា កម្ពុជាមិនអាចធ្លាក់ដល់របត់ផ្លាស់ប្ដូរ ដូចការផ្លាស់ប្ដូរពីរបបសង្គមរាស្ត្រនិយម ទៅរបបសាធារណរដ្ឋ ឬពីសាធារណរដ្ឋទៅរបបខ្មែរក្រហមនោះទេ គឺយ៉ាងច្រើនត្រឹមដូចព្រឹត្តិការណ៍៥, ៦ កក្កដា ១៩៩៧ ដែលអន្តរជាតិចាត់ទុកថាជារដ្ឋប្រហារ ហើយការដណ្ដើមយកទ្រព្យសម្បត្តិអ្នកដទៃក្នុងទីក្រុងនៅពេលនោះ លោកសាស្ត្រាចារ្យប្រៀបប្រដូចទៅនឹងការឆក់ប្លន់។
លោកថា៖ «ឥឡូវយើងក្រឡេកមើលអ៊ីចេះ យើងមើល [១៩] ៩៧ ដែលរដ្ឋាភិបាលហៅថា
ព្រឹត្តិការណ៍ តែនៅអន្តរជាតិគេហៅថារដ្ឋប្រហារហើយ ថ្ងៃទី៥ ទី៦ កក្កដា ឆ្នាំ១៩៩៧ នេះ។ ប៉ុន្តែអ្នកដែលយកទ្រព្យសម្បត្តិប្រជាពលរដ្ឋ អាហ្នឹងគឺប្លន់គេហើយបើយើងនិយាយមែនទែននោះ។ គ្មានទៅផ្លាស់ប្ដូរដើម្បីបានទ្រព្យសម្បត្តិដូចសម័យខ្មែរក្រហមទៀតទេ សាធារណរដ្ឋខ្មែរ ហើយកម្ពុជាប្រជាធិបតេយ្យចូលមកកាន់កាប់ ប្រមូលរឹបអូសអ៊ីចឹង អាហ្នឹងវាលែងមានដល់ករណីហ្នុ៎ងទៀតហើយ»។
បើតាមមតិរបស់អ្នកវិទ្យាសាស្ត្រនយោបាយទាំងពីររូបខាងលើឃើញថា ប្រជាពលរដ្ឋខ្មែរ ជាពិសេសអ្នកធំ អ្នកមាន ឧកញ៉ា ពិតជាមិនចង់ឱ្យមានសង្គ្រាមនោះទេ ព្រោះបើមានសង្គ្រាមនឹងធ្វើឱ្យពួកគេរលាយហិនហោចទ្រព្យសម្បត្តិទាំងអស់៕
Share
ព័ត៌មានទាក់ទង
