ថ្ងៃនេះ មេធាវី សំ សុគង់ ប្រាប់អំពីដំណើរការប្ដឹងឧទ្ធរណ៍ជំទាស់នឹងសាលក្រមសាលាដំបូងរាជធានីភ្នំពេញកាលពីថ្ងៃព្រហស្បតិ៍ ដែលបានផ្ដន្ទាទោសមេដឹកនាំចលនាសង្គ្រោះជាតិ ដែលកើតចេញពីគណបក្សសង្គ្រោះជាតិដែលត្រូវបានតុលាការកំពូលប្រកាសរំលាយ ព្រមទាំងអ្នកគាំទ្រ សរុបជាង ២០នាក់ ឱ្យជាប់ពន្ធនាគារពីរឿងរៀបចំគម្រោងមាតុភូមិនិវត្តន៍ នៅថ្ងៃទី៩ ខែវិច្ឆិកា ឆ្នាំ២០១៩។  លោកមេធាវីបានកត់សម្គាល់ឃើញចំណុចមិនប្រក្រតីមួយចំនួននៅក្នុងការជម្រះក្ដីរបស់តុលាការ លើគម្រោងមាតុភូមិនិវត្តន៍ដែលរាជរដ្ឋាភិបាលចាត់ទុកថាជាគម្រោងរដ្ឋប្រហារ។