បណ្ឌិត កសិកម្ម ម៉ុង ឬទ្ធី ដែលមានចម្ការដំណាំរាប់ហិចតា បានអំពាវនាវឱ្យប្រជាកសិករងាកមកប្រើជីសរីរាង្គ ជំនួសជីគីមីដែលមានតម្លៃថ្លៃ ខណៈកសិផលដាំបានលក់ក្នុងតម្លៃទាប មិនអាចរកផលចំណេញបាន។ ទន្ទឹមក្រសួងកសិកម្មក៏បានលើកទឹកចិត្តឱ្យប្រជាកសិករប្រើជិសរីរាង្គផងដែរ។
លោកបណ្ឌិតកសិកម្ម ម៉ុង ឬទ្ធី អំពាវនាវឱ្យប្រជាកសិករខ្មែរ ងាកមកប្រើជីសរីរាង្គ ជំនួសជីគីមី ខណៈតម្លៃជីគីមីខ្ពស់ ហើយកសិផលដែលដាំបាន អាចលក់ក្នុងតម្លៃទាប។ ការអំពាវនាវនេះ លោកបណ្ឌិតបានបង្ហោះនៅលើផេកហ្វេសប៊ុក នៅថ្ងៃទី១ ខែមីនា ឆ្នាំ២០២២ បន្ទាប់ពីលោកបានលក់ស្វាយកែវរមៀតនៅថ្ងៃទី២៧ ខែកុម្ភៈ ទៅឱ្យឈ្មួញវៀតណាមតម្លៃ តែ៤០០រៀល ប៉ុណ្ណោះក្នុងមួយគីឡូក្រាម បើប្រៀបធៀបទៅកាលពីពេលកន្លងទៅអាចលក់ជាមធ្យមពី ៨០០រៀល ទៅ១២០០រៀល។
លោកបន្ដឱ្យដឹងថា ឆ្នាំមុនជីគីមី មានតម្លៃ៤២០ដុល្លា ក្នុងមួយតោន ហើយនាពេលបច្ចុប្បន្ន មានតម្លៃ៨២០ដុល្លា ក្នុងមួយតោន តែលោកបញ្ជាក់ថា បណ្ដាលមកពីវិបត្តិជំងឺសាកលកូវីដ១៩ និង ជាមួយវិបត្តិផ្សេងៗទៀតនៅលើសាកលលោក។
ជាមួយគ្នានឹងការលើឡើងពីជីគីមី លោក ម៉ុង ឬទ្ធី បានលម្អិតចំពោះការប្រើជីសរីរាង្គលើដំណាំថា បើទិញជីសរីរាង្គនាំចូលមានតម្លៃ៤២០ ដុល្លា ក្នុងមួយតោន ដែលពីមុនតម្លៃ២២០ដុល្លា តែចំពោះការផលិតខ្លួនឯង លោកអះអាងថាចំណាយតែ២៤ ដុល្លាប៉ុណ្ណោះ ក្នុងមួយតោន ខណៈលោកអាចផលិតជាក់ស្ដែងជាមធ្យមបាន២៤តោន ជារៀងរាល់ថ្ងៃ។
វិទ្យុស្ដ្រីបានសុំការឆ្លើយតបក្នុងរឿងនេះជាមួយ លោក ស្រី វុឌ្ឍី អ្នកនាំពាក្យក្រសួងកសិកម្ម រុក្ខាប្រមាញ់ និង នេសាទ តាមប្រពន្ធ័តេឡេក្រាម លោកថា ចំពោះរឿងការប្រើជីសរីរាង្គ ក្រសួងកសិកម្មបានលើកទឹកចិត្តដល់ប្រជាកសិករឱ្យប្រើជាយូរណាស់មកហើយ។
បើផ្អែកតាមផែនការប្រចាំឆ្នាំ២០២២ របស់ក្រសួងកសិកម្ម រដ្ឋមន្ដ្រី វេង សាខុន បានឱ្យបង្កើនការយកចិត្តទុកដាក់ការត្រួតពិនិត្យសមាសភាពផ្សំជីគីមី និងថ្នាំសម្លាប់សត្វល្អិតផងដែរ។
យ៉ាងណាក្រៅពីអំពាវនាវឱ្យប្រជាកសិករងាកមកប្រើជីសរីរាង្គ លោកបណ្ឌិត ម៉ុង ឬទ្ធី ក៏បានឱ្យប្រជាកសិករងាកមកដាំដំណាំស្វាយណាំដកម៉ៃ អេវិន អាយវិន និងប៉ោមអូស្ត្រាលីវិញ។ លោកនិយាយថា ដើម្បីបំពេញសេចក្តីត្រូវការទីផ្សារក្នុងប្រទេស ដែលបច្ចុប្បន្នដំណាំស្វាយណាំដកម៉ៃ អេវិន អាយវិន និងប៉ោមអូស្ត្រាលីលក់បានតម្លៃជាមធ្យម១៦.០០០រៀលមួយគីឡូក្រាម ហើយកសិករខ្នាតតូច និងមធ្យមអាចរកចំណូលចិញ្ចឹមជីវិតបាន តែលោកថាបើខ្នាតធំប្រើគ្រឿងចក្រ និងជួលកម្លាំងពលកម្ម១០០% ក៏ពិបាករកប្រាក់ចំណេញដែរ៕
លោក ឡាក់ ច័ន្ទតារា ជូននូវសេចក្ដីរាយការណ៍៖
