ដើម្បីអបអរទិវាជាតិទីក្រុងស្អាត លើកទី១០ ឆ្នាំ២០២២ នៅថ្ងៃទី២៨ ខែកុម្ភៈ នេះ រដ្ឋាភិបាលកម្ពុជា ដែលជាប្រធានកិតិ្តយលនៃគណៈកម្មាជាតិទីក្រុងស្អាត បានចេញការងារអាទិភាពចំនួន៤ ចំណុច។

ទិវាជាតិទីក្រុងស្អាតលើកទី១០  រៀបចំឡើងនៅថ្ងៃទី២៨ ខែកុម្ភៈ ឆ្នាំ២០២២ នេះ ក្រោមប្រធានបទ ទីក្រុងស្អាត៖ គាំទ្រការបើកទេសចរណ៍កម្ពុជា អមជាមួយយុទ្ធនាការកម្ពុជាស្អាតឆ្ពោះទៅស្វាគមន៍ព្រឹត្តិការន៍កីឡាស៊ីហ្គេម អាស៊ានប៉ារ៉ាហ្គេម ២០២៣ ។  រដ្ឋាភិបាលកម្ពុជា សម្ដេច ហ៊ុន សែន ជាប្រធានកិត្តិយសនៃគណៈកម្មជាតិទីក្រុងស្អាត បានចេញនូវការងារអាទិភាពចំនួន៤ ចំណុច ដល់ភាគីពាក់ព័ន្ធទាំងអស់ ជាការឆ្លើយតបជាមួយនឹងប្រធានបទទីក្រុងស្អាតឆ្នាំ២០២២នេះ ។

យោងទៅតាមក្រសួងទេសចរណ៍ ការងារដែលជាអាទិភាពទាំង៤ ក្នុងទិវាជាតិទីក្រុងស្អាតរបស់រដ្ឋាភិបាលកម្ពុជារួមមានៈ

១៖ គ្រប់ស្ថាប័នពាក់ព័ន្ធរដ្ឋបាលថ្នាក់ក្រោមជាតិ និងផ្នែកឯកជនត្រូវបន្តចូលរួមអនុវត្តប្រកបដោយ ស្មារតីទទួលខុសត្រូវខ្ពស់លើវិធាន ឬបទដ្ឋានគតិយុត្តដែលបានដាក់ចេញរួមមាន៖ «វិធានសុវត្ថិភាព ទេសចរណ៍» «នីតិវិធីប្រតិបត្តិស្តង់ដាអប្បរមា(SOP) សម្រាប់សេវាកម្មទេសចរណ៍» ស្របតាមគន្លង ប្រក្រតីភាពថ្មីនិងវិធានការនានារបស់រាជរដ្ឋាភិបាល ដើម្បីបន្តចូលរួមទប់ស្កាត់ការឆ្លងរាលដាលនៃជំងឺកូវីដ-១៩ និងស្តារនូវទំនុកចិត្ត និងភាពជឿជាក់លើគ្រប់ខ្សែច្រវាក់ផលិតកម្មក្នុងវិស័យទេសចរណ៍ ដើម្បីត្រៀមខ្លួនទទួលស្វាគមន៍ភ្ញៀវទេសចរ និងព្រឹត្តិការណ៍កីឡាស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣។ ដូច្នេះ ត្រូវរៀបចំយុទ្ធនាការប្រឡងប្រណាំងរាជធានីខេត្ត ដែលមានស្នាដៃឆ្នើមក្នុងការអនុវត្តវិធានសុវត្ថិភាពទេសចរណ៍។

ទី២៖ គ្រប់ស្ថាប័នពាក់ព័ន្ធ រដ្ឋបាលថ្នាក់ក្រោមជាតិ និងផ្នែកឯកជនត្រូវយកចិត្តទុកដាក់បន្តចូលរួមជំរុញ និងស្តារវិស័យទេសចរណ៍ឡើងវិញ តាមរយៈការជំរុញការអនុវត្តនូវផែនការយុទ្ធសាស្ត្រនានារបស់ រាជរដ្ឋាភិបាលដែលបានដាក់ចេញ ដើម្បីលើកស្ទួយវិស័យទេសចរណ៍ សំដៅប្រែក្លាយកម្ពុជាជាគោលដៅទេសចរណ៍ប្រកបដោយគុណភាព សុវត្ថិភាព និងនិរន្តរភាព ដែលនឹងផ្ដល់ផ្លែផ្កាចូលរួម ទ្រទ្រង់ដល់ការងើបឡើងវិញនៃកំណើនសេដ្ឋកិច្ចពីវិបត្តិជំងឺកូវីដ១៩ រួមមាន៖ ផែនទីចង្អុលផ្លូវ ស្តីពីផែនការស្តារ និងលើកស្ទួយវិស័យទេសចរណ៍ ក្នុងនិងក្រោយវិបត្តិជំងឺកូវីដ-១៩ «វិធានការ គោលនយោបាយជំរុញចលនាទេសចរណ៍ផ្ទៃក្នុង ឆ្នាំ២០២១-២០២៣» និង«ផែនការយុទ្ធសាស្ត្រស្តីពី ការបើកទទួលទេសចរណ៍វ៉ាក់សាំង» ។

ទី៣៖ គ្រប់ស្ថាប័នពាក់ព័ន្ធ គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍លើកទី៣២ ឆ្នាំ២០២៣ សហភាពសហព័ន្ធយុវជនកម្ពុជា និងផ្នែកឯកជន ត្រូវរួមគ្នាលើកកម្ពស់កិត្តិយស និងមុខមាត់កម្ពុជា តាមរយៈឥទ្ធិពលព្រឹត្តិការណ៍កីឡាស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ ក្នុងការដាក់ចេញយុទ្ធនាការ អប់រំសង្គមនិងផ្សព្វផ្សាយយុទ្ធនាការ «កម្ពុជាស្អាត» ឱ្យបានកាន់តែសកម្មនិងផុសផុល សំដៅសម្រេច បានការអភិវឌ្ឍប្រកបដោយភាពស្អាតនិងបៃតងនៅក្នុងទីក្រុងនិងកម្ពុជាទាំងមូលដើម្បីត្រៀមទទួល ស្វាគមន៍ភ្ញៀវទេសចរក្នុងព្រឹត្តិការណ៍នេះ។

ទី៤៖ ប្រជាពលរដ្ឋ និងភ្ញៀវទេសចរគ្រប់រូប ត្រូវប្រកាន់ខ្ជាប់នូវការរស់នៅតាមគន្លងប្រក្រតីភាពថ្មី ពិសេស ទម្លាប់នៃការរស់នៅជាមួយ ភាពស្អាត និងអនាម័យ រួមជាមួយការអនុវត្តតាមវិធានសុខាភិបាល និងវិធាននានារបស់រាជរដ្ឋាភិបាល ដើម្បីចូលរួមទប់ស្កាត់ការចម្លងជំងឺកូវីដ-១៩។

សូមជម្រាបថា កាលពីថ្ងៃទី១៩ ខែ មករា ឆ្នាំ២០២២ ទីក្រុង៣ របស់កម្ពុជាបានក្លាយទៅជាទីក្រុងស្អាត ក្នុងចំណោមទីក្រុងចំនួន២១ នៅទូទាំងប្រទេសសមាជិកអាស៊ាន។ ទីក្រុងទាំង៣ រួមមាន ទីក្រុងព្រះសីហនុ ទីក្រុងបាត់ដំបង និងទីក្រុងវប្បធម៌ដ៏ចំណាស់ សៀមរាប។

ប្រជាពលរដ្ឋរស់នៅខេត្តទាំងនេះ មានសេចក្ដីអំណដែលខេត្តរបស់ខ្លួនបានក្លាយទៅជាទីក្រុងស្អាត ហើយដាក់ការសង្ឃឹមថា និងមានទេសចរណ៍មកលេងកម្សាន្ដច្រើន៕