កិច្ចប្រជុំចង្អៀតថ្នាក់រដ្ឋមន្ត្រីការបរទេសអាស៊ាន ដឹកនាំដោយឯកឧត្ដម ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ បានប្រព្រឹត្តទៅនៅទីក្រុងភ្នំពេញ កាលពីព្រឹកព្រហស្បតិ៍ ថ្ងៃទី ១៧ ខែកុម្ភៈនេះ ដោយពុំមានវត្តមានរដ្ឋមន្ត្រីការបរទេសភូមាឬមីយ៉ាន់ម៉ាទេ ទោះបីជាកម្ពុជាធ្វើប្រធានអាស៊ានជាមួយនឹងមូលបទ«អាស៊ានរួមគ្នាធ្វើ ដោះស្រាយបញ្ហាប្រឈមទាំងអស់គ្នា»ក៏ដោយ។
ទីភ្នាក់ងារសារព័ត៌មានកម្ពុជា (AKP) បានឱ្យដឹងថា កិច្ចប្រជុំនេះមានវត្តមានផ្ទាល់របស់អគ្គលេខាធិការអាស៊ាន រដ្ឋមន្ត្រីការបរទេសឥណ្ឌូណេស៊ី រដ្ឋមន្ត្រីការបរទេសឡាវ រដ្ឋមន្ត្រីការបរទេសម៉ាឡេស៊ី រដ្ឋមន្ត្រីការបរទេសហ្វីលីពីន និងរដ្ឋមន្ត្រីការបរទេសសិង្ហបុរី រីឯរដ្ឋមន្ត្រីការបរទេសព្រុយណេ រដ្ឋមន្ត្រីការបរទេសថៃ និងរដ្ឋមន្ត្រីការបរទេសវៀតណាម បានចូលរួមដោយប្រយោលតាមរយៈប្រព័ន្ធទូរសោតទស្សន៍។
ក្នុងកិច្ចប្រជុំចង្អៀតនេះ រដ្ឋមន្ត្រីកាបរទេសអាស៊ានមានរបៀបវារៈជាច្រើន ក្នុងចំណោមនោះមាន៖ ពិនិត្យមើលឡើងវិញនូវការសម្រេចនានារបស់មេដឹកនាំអាស៊ានអំឡុងកិច្ចប្រជុំកំពូលអាស៊ានលើកទី៣៨និងលើកទី៣៩ ផ្លាស់ប្តូរទស្សនៈគ្នាលើមធ្យោបាយពង្រឹងនិងពង្រីកទំនាក់ទំនងខាងក្រៅជាមួយដៃគូសន្ទនានានា និងរិះរកវិធីសាស្ត្រពួតដៃគ្នាកសាងសហគមន៍អាស៊ានមួយដែលកាន់តែធន់ រឹងមាំ ប្រកបដោយថាមពល សន្តិភាព និងវិបុលភាព។ នេះបើយោងតាម AKP ដែលបញ្ជាក់ថា រដ្ឋមន្ត្រីការបរទេសអាស៊ានក៏គិតគូអំពីការថែរក្សានិងលើកកម្ពស់មជ្ឈភាព សាមគ្គីភាព និងឯកភាពអាស៊ានដែរ។
កាលពីដើមខែកុម្ភៈនេះ អ្នកនាំពាក្យក្រសួងការបរទេសកម្ពុជាបានឱ្យដឹងថា កម្ពុជាលើកទឹកចិត្តឱ្យមានតំណាងប្រទេសមីយ៉ាន់ម៉ាក្នុងកម្រិតមិនមែននយោបាយ មកចូលរួមប្រជុំអាស៊ាន ជាជាងទុកកៅអីឱ្យនៅទទេ៕
