សាលាដំបូងរាជធានីភ្នំពេញ នៅថ្ងៃទី១៣ ខែវិច្ឆិកា ឆ្នាំ២០១៥ នេះ បានចេញដីកាចាប់ខ្លួនលោក សម រង្ស៊ី តាមអំណាចសាលដីកាស្ថាពរ ចុះថ្ងៃទី១២ ខែមីនា ឆ្នាំ២០១៣ របស់សាលាឧទ្ធរណ៍។
ក្នុងដីកាបង្គាប់ឲ្យចាប់ខ្លួន ដែលចុះហត្ថលេខាដោយលោក ស៊ឺ វណ្ណនី តំណាងអយ្យការអមសាលាដំបូងរាជធានីភ្នំពេញ បានបញ្ជាក់ថា លោកសមរង្ស៊ី ជាប់ចោទក្នុងសំណុំរឿងក្តីជាមួយនឹងលោកហោណាំហុង រដ្ឋមន្ត្រីការបរទេស កាលពីឆ្នាំ២០០៨ ។
ដីកានោះបញ្ជាក់ថា លោកសម រង្ស៊ី លើកឡើងថា លោកហោ ណាំហុង ជាប្រធានគុកបឹងត្របែក នៅសម័យខ្មែរក្រហម ។ ដីកានោះបន្ថែមថា ក្នុងសំណុំរឿងក្តីនោះ លោកសម រង្ស៊ី ត្រូវបានតុលាការ សម្រេចផ្តន្ទាទោសដាក់ពន្ធនាគារ ២ ឆ្នាំ និងពិន័យជាប្រាក់ ៨ លានរៀល ។
ទាក់ទងនឹងបញ្ហានេះ លោកមេធាវីជួង ជូងី ដែលជាមេធាវីរបស់គណបក្សសង្គ្រោះជាតិបញ្ជាក់ប្រាប់វិទ្យុស្ត្រី FM 102 នៃWMC ថា លោកមិនទាន់បានទទួលដីកានោះទេ ប៉ុន្តែលោកថា លោកបានទទួលដំណឹងនោះតាមរយៈមិត្តភក្តិលោក។
លោកជួង ជូងី មានប្រសាសន៍ថា តុលាការមិនអាចចាប់ខ្លួនលោកសម រង្ស៊ីបានឡើយ ព្រោះតម្រូវឲ្យមានការដកអភ័យឯកសិទ្ធិតំណាងរាស្ត្ររបស់លោកជាមុនសិន៕
