ភ្នំពេញ៖ ប្រមុខរដ្ឋាភិបាលកម្ពុជា លោកនាយករដ្ឋមន្ត្រី ហ៊ុន សែន បានប្រកាសថា រដ្ឋាភិបាលនឹងចេញសារាចរណែនាំដល់ប្រជាពលរដ្ឋនៅតាមតំបន់ព្រំដែន ឱ្យឈប់ជួលដីស្រែចម្ការរបស់ខ្លួនដល់បរទេស។ ការប្រកាសរបស់លោក ហ៊ុន សែនធ្វើឡើងនៅក្នុងកិច្ចប្រជុំពេញអង្គគណៈរដ្ឋមន្ត្រីថ្ងៃទី១៣ ខែវិច្ឆិកា ឆ្នាំ ២០១៥។
លោកនាយករដ្ឋមន្ត្រី ហ៊ុន សែន បានបញ្ជាក់ពីមូលហេតុដែលរដ្ឋាភិបាលនឹងចេញសារាចរណែនាំដល់ប្រជាពលរដ្ឋរស់នៅតាមព្រំដែន កុំឱ្យជួលដីឱ្យបរទេសនេះ ធ្វើឡើងដើម្បីចៀសវាងបញ្ហា ដីខ្មែរ ស្រែវៀតណាម ដីខ្មែរស្រែថៃ ឬដីខ្មែរស្រែឡាវជាដើម។
លោកនាយករដ្ឋមន្ត្រីបន្តថា រដ្ឋាភិបាលម្ពុជា នឹងពិនិត្យមើលស្ថានភាពជាក់ស្តែងនៅតាមទីតាំងទាំងនោះ ដើម្បីរកវិធានការអភិវឌ្ឍ រួមទាំងការសាងសង់លំនៅដ្ឋានសម្រាប់កងទ័ពនៅតាមបណ្តាព្រំដែនដើម្បីការពារទឹកដីកម្ពុជា។
លោកនាយករដ្ឋមន្ត្រី ហ៊ុន សែន ឱ្យដឹងបន្ថែមថា នៅពេលខាងមុខនេះ រដ្ឋាភិបាលនឹងផ្ញើលិខិតទៅនាយករដ្ឋមន្ត្រីនៃប្រទេសដែលជាប់ព្រំប្រទល់កម្ពុជា ដើម្បីឱ្យជួយសហការ និងហាមឃាត់មិនឱ្យពលរដ្ឋនៃប្រទេសទាំងនោះមកជួលដីនៅតាមព្រំដែនកម្ពុជា។ ប៉ុន្តែលោកបានបន្តអះអាងថា កម្ពុជា និងប្រទេសជាប់ព្រំដែនទាំងអស់ នឹងសហការគ្នាពង្រឹងសេដ្ឋកិច្ច ដើម្បីជួយលើកស្ទួយជីវភាពប្រជាពលរដ្ឋ រស់នៅតាមព្រំដែនឱ្យកាន់តែប្រសើរឡើង។
នៅថ្ងៃនេះដែរ គណបក្សប្រជាធិបតេយ្យមូលដ្ឋាន បានសរសេរនៅលើទំព័រហ្វេសប៊ុកផ្លូវការរបស់ខ្លួនថា គណបក្សប្រជាធិបតេយ្យមូលដ្ឋាន គាំទ្រចំពោះគោលនយោបាយរបស់រាជរដ្ឋាភិបាល ដែលនឹងចេញសារាចរណែនាំដល់ប្រជាពលរដ្ឋរស់នៅតាមព្រំដែនកុំឱ្យជួលដីឱ្យបរទេស។ ប៉ុន្តែគណបក្សនេះយល់ថា ការគ្រាន់តែចេញសារាចរហាមឃាត់ការជួលដី គឺមិនគ្រប់គ្រាន់ទេ សំខាន់គឺរដ្ឋាភិបាលត្រូវធានាការអភិវឌ្ឍនៅតាមតំបន់ព្រំដែនផងដែរ៕
