កម្ពុជាបានឱ្យដឹងថា តំណាងប្រទេសមីយ៉ាន់ម៉ា ដែលមិនមែនជាអ្នកនយោបាយ ត្រូវបានអញ្ជើញឲ្យចូលរួមក្នុងកិច្ចប្រជុំរដ្ឋមន្ត្រីការបរទេសអាស៊ានវិញ មិនអញ្ជើញរដ្ឋមន្ត្រីការបរទេសនៃរបបយោធាមីយ៉ាន់ម៉ាទេ នៅពេលដែលកិច្ចប្រជុំនេះគ្រោងធ្វើឡើងវិញនៅថ្ងៃទី១៦ និង១៧ ខែកុម្ភៈនេះ។
លោក ឯម មាឃ ជូនសេចក្ដីរាយការណ៍ …
កាលពីថ្ងៃព្រហស្បតិ៍ម្សិលមិញ ប្រទេសកម្ពុជាបានឱ្យដឹងថា តំណាងប្រទេសមីយ៉ាន់ម៉ាដែលមិនមែនជាអ្នកនយោបាយ ត្រូវបានអញ្ជើញឲ្យចូលរួមកិច្ចប្រជុំរដ្ឋមន្ត្រីអាស៊ាននៅចុងខែនេះវិញ ជាជាងអញ្ជើញរដ្ឋមន្ត្រីការបរទេសដែលត្រូវបានតែងតាំងដោយយោធារបស់ប្រទេសមីយ៉ាន់ម៉ា។
ប្រទេសកម្ពុជាបច្ចុប្បន្នជាប្រធានសមាគមប្រជាជាតិអាស៊ីអាគ្នេយ៍ ដែលហៅកាត់ថា ASEAN។ កាលពីចុងឆ្នាំមុន សមាគមនេះបានបង្កការភ្ញាក់ផ្អើលមួយ តាមរយៈការសម្រេចមិនឱ្យរបបយោធានៃប្រទេសមីយ៉ាន់ម៉ាចូលរួមក្នុងកិច្ចប្រជុំសំខាន់ៗរបស់សមាគម ដោយសារតែប្រទេសនេះមិនបានអនុវត្តផែនការសន្តិភាពដែលបានព្រមព្រៀងជាមួយអាស៊ាន។
នាយករដ្ឋមន្ត្រីកម្ពុជា សម្ដេច ហ៊ុន សែន បានព្យាយាមធ្វើទំនាក់ទំនងឡើងវិញជាមួយរបបយោធា ហើយបានបង្ហាញជំហរថា សម្ដេចចង់អញ្ជើញមេដឹកនាំនានានៃរបបយោធាឲ្យមកចូលរួមក្នុងបណ្ដាកិច្ចប្រជុំរបស់សមាគមដែលមានសមាជិក១០ប្រទេសនេះឡើងវិញ។
ប៉ុន្តែសមាជិកអាស៊ានមិនបានឈានដល់ការព្រមព្រៀងគ្នាជាឯកច្ឆន្ទទេ ចំពោះរឿងអញ្ជើញរដ្ឋមន្ត្រីការបរទេសនៃរបបយោធាមីយ៉ាន់ម៉ា លោក វូណា ម៉ោង វីន ឱ្យមកចូលរួមប្រជុំ នៅពេលដែលពុំមានវឌ្ឍនភាពគ្រប់គ្រាន់ក្នុងការអនុវត្តផែនការសន្តិភាព។ នេះបើយោងតាមអ្នកនាំពាក្យក្រសួងការបរទេសនិងសហប្រតិបត្តិការអន្តរជាតិ ឯកឧត្ដម ជុំ សុន្ទរី។
ឯកឧត្ដម ជុំ សុន្ទរី បានប្រាប់ទីភ្នាក់ងារសារព័ត៌មានរើយធើថា៖ «អំឡុងពេលនេះ យើងលើកទឹកចិត្តឱ្យមានតំណាងប្រទេសមីយ៉ាន់ម៉ាក្នុងកម្រិតមិនមែននយោបាយ មកចូលរួមប្រជុំអាស៊ាន ជាជាងទុកកៅអីឱ្យនៅទទេ»។ អ្នកនាំពាក្យរូបនេះបានបន្ថែមថា វាអាស្រ័យលើប្រទេសមីយ៉ាន់ម៉ាដែលត្រូវសម្រេចចិត្តថាតើអ្នកណាគួរជាអ្នកតំណាងប្រទេសខ្លួន។
អ្នកនាំពាក្យរបបយោធាមីយ៉ាន់ម៉ាមិនបានលើកទូរស័ព្ទដែលស្នើសុំការអត្ថាធិប្បាយលើបញ្ហានេះពីទីភ្នាក់ងារសារព័ត៌មានរើយធើទេ។
កម្ពុជាគ្រោងធ្វើជាម្ចាស់ផ្ទះនៃកិច្ចប្រជុំចង្អៀតថ្នាក់រដ្ឋមន្ត្រីការបរទេសអាស៊ាននៅថ្ងៃទី១៦ និងទី១៧ ខែកុម្ភៈនេះ ដើម្បីត្រៀមរៀបចំកិច្ចប្រជុំពិគ្រោះយោបល់ជាមួយភាគីពាក់ព័ន្ធនានា ទាក់ទងនឹងការផ្ដល់ជំនួយមនុស្សធម៌ទៅកាន់ប្រទេសមីយ៉ាន់ម៉ា។ នេះបើយោងតាមសេចក្ដីរាយការណ៍អំពីស្ថានភាពប្រទេសមីយ៉ាន់ម៉ា ដែលបេសកជនពិសេសរបស់ប្រធានអាស៊ាន គឺរដ្ឋមន្ត្រីការបរទេសនិងសហប្រតិបត្តិការអន្តរជាតិ ឯកឧត្ដម ប្រាក់ សុខុន ធ្វើជូនក្រុមប្រឹក្សាសន្តិសុខអង្គការសហប្រជាជាតិ កាលពីថ្ងៃទី២៨ ខែមករា។
ពីមុន កិច្ចប្រជុំចង្អៀតថ្នាក់រដ្ឋមន្ត្រីការបរទេសអាស៊ាននេះគ្រោងធ្វើនៅថ្ងៃទី១៨ និងទី១៩ ខែមករា ប៉ុន្តែត្រូវបានលើកពេល ដោយសារប្រទេសសមាជិកមួយចំនួនបានសម្រេចចិត្តមិនមកចូលរួមប្រជុំ ក្រោមហេតុផលផ្សេងៗ។
ប្រធានអាស៊ានបច្ចុប្បន្ន គឺសម្ដេច ហ៊ុន សែន បានរងសម្ពាធធ្ងន់ ក្នុងការធ្វើឲ្យឧត្ដមសេនីយ៍ មីន អោង ឡាំង មេដឹកនាំរបបយោធាមីយ៉ាន់ម៉ា គោរពកិច្ចព្រមព្រៀងសន្តិភាពដែលសម្រេចបានដោយអាស៊ាន ខណៈដែលសមាជិកអាស៊ានមួយចំនួនបានទាមទារឲ្យមេដឹកនាំធ្លាក់ពីអំណាចដោយសាររដ្ឋប្រហារយោធា គឺលោកស្រី អោង សាន ស៊ូ ជី ដែលកំពុងរងការកាត់ទោស មានសេរីភាពនិងបានចូលរួមក្នុងការចរចារកសន្តិភាព៕
—
យោង៖
១) https://www.reuters.com/world/asia-pacific/cambodia-says-non-political-myanmar-rep-invited-asean-meeting-2022-02-03/
២) https://www.mfaic.gov.kh/posts/2022-01-29-Press-Release-Deputy-Prime-Minister-PRAK-Sokhonn-Briefs-the-United-Nations-Security-Council–On-Myanmar-Crisis–08-40-18
