loader

សមាគមស្ករអំពៅមួយនៅអង់គ្លេស​មិន​អើពើ​​ការ​រំលោភ​សិទ្ធិមនុស្ស​​​​របស់សមាជិក​​ខ្លួនដែលប្រព្រឹត្តិ​នៅកម្ពុជា

ភ្នំពេញ៖ សមាគមអ្នកប្រើប្រាស់ស្ករអំពៅមួយដែលមានមូលដ្ឋាននៅប្រទេសអង់គ្លេស នៅតែមិនអើពើនូវការរំលោភសិទ្ធិមនុស្សរបស់សមាជិកខ្លួនដែលបានរំលោភយកដីធ្លីប្រជាពលរដ្ឋកម្ពុជាក្នុងដំណើរការដាំដុះអំពៅផលិតជាស្ករស។ នេះបើយោងតាមសេចក្តីថ្លែងការណ៍រួមចេញផ្សាយដោយអង្គការ អាយឌីអាយ អង្គការសមធម៌កម្ពុជា និងអង្គការលីកាដូកាលពីថ្ងៃទី២៤ ខែមករា ឆ្នាំ២០២២ តែទើបចុះផ្សាយនៅគេហទំព័រនិងទំព័រហ្វេសប៊ុករបស់អង្គការលីកាដូនៅថ្ងៃទី៣០ ខែមករា ឆ្នាំ២០២២។

លោក កែវ សុខា រាយការណ៍ពីព័ត៌មាននេះ

 

សេចក្តីថ្លែងការណ៍រួមរបស់អង្គការទាំងបីខាងលើ ចេញផ្សាយដើម្បីរំលឹកឡើងវិញឱ្យស្ថាប័នបុនស៊ូក្រូជាសមាគមអ្នកប្រើប្រាស់ស្ករអំពៅមួយមានមូលដ្ឋាននៅប្រទេសអង់គ្លេស ត្រូវរួមចំណែកទទួលខុសត្រូវលើទង្វើរបស់សមាជិកខ្លួនដែលបានរំលោភដីធ្លីប្រជាកសិករអំឡុងឆ្នាំ ២០០៨-២​០​០​៩​ នៅចំណុចអូរបាត់មាន់ សង្កាត់កូនក្រៀល ក្រុងសំរោង ខេត្តឧត្តមមានជ័យ។ ការចេញសេចក្តីថ្លែងការណ៍រំលឹកឡើងវិញនេះ ក៏ព្រោះតែស្ថាប័នបុនស៊ូក្រូបានធានាថា ស្ករសដែលផលិតបាននិងនាំចូលប្រទេសអង់គ្លេសគឺមិនពាក់ព័ន្ធនឹងការរំលោភសិទ្ធិមនុស្សនោះទេ។

តែផ្ទុយទៅវិញសមាជិករបស់ស្ថាប័នបុនស៊ូក្រូគឺក្រុមហ៊ុន មិត្រផូល បានរំលោភយកដីប្រជាពលរដ្ឋ បង្ខំឱ្យអ្នកភូមិចាកចេញពីទីលំនៅដ្ឋាន ដោយឈូសឆាយផ្ទះ ដុតស្រែ វាយដំ ហើយចាប់ខ្លួនអ្នកភូមិទៀតផងតាមរយៈការប្រើកម្លាំងប៉ូលីស និងកងសន្តិសុខឯកជន។ នេះបើតាមការគូសបញ្ជាក់បន្ថែមពីលោក អំ សំអាត នាយករង​ទទួលបន្ទុក​កម្មវិធី​ឃ្លាំមើល​នៃអង្គការ​លីកាដូ​ប្រាប់វិទ្យុស្រ្តីនៅថ្ងៃទី៣១ ខែមករា ឆ្នាំ២០២២នេះ។

តាមរយៈសេចក្តីថ្លែងការណ៍ខាងលើ ស្ថាប័ន​ទំនាក់ទំនង​ជាតិ​ចក្រភពអង់គ្លេស​ (UK NC​P​) ​បាន​រក​ឃើញ​ថា​ ​ស្ថាប័ន​បុ​ន​ស៊ូ​ក្រូ “​មិនបាន​អនុវត្ត​នូវ​គោលការណ៍​ទទួលខុសត្រូវ​ (​Due​ ​Diligence​) ឱ្យ​បាន​គ្រប់គ្រាន់​” ​នៅពេលដែល​ខ្លួន​បាន​ទទួលយក​ក្រុមហ៊ុន​មិត្រ​ផូ​ល​ម្តងទៀត​ជា​សមាជិក​ក្នុង​ឆ្នាំ​២​០​១​៥ នោះទេ​។

ក្រុមអង្គការសង្គមស៊ីវិល បានចងក្រងរបាយការណ៍យ៉ាងគ្រប់គ្រាន់ស្តីពីការរំលោភបំពានសិទ្ធិមនុស្សរបស់ក្រុមហ៊ុនមិត្រផូល បន្ទាប់ពីទទួលបានសម្បទានដីស្របច្បាប់ពីរដ្ឋាភិបាលកម្ពុជា។ ក្រុមអង្គការស៊ីវិលរកឃើញថា ក្រុមហ៊ុនមិត្រផូលបានឃុបឃិតជាមួយអាជ្ញាធរមូលដ្ឋានរំលោភយកដីចំនួន ៩,៤០០ហិតាពីកសិករសម្រាប់ដំណាំអំពៅ។

ជាងនេះនៅចន្លោះឆ្នាំ ២០០៨ ដល់ ២០០៩ ប្រជាពលរដ្ឋជាង ២,០០០គ្រួសារ ក្នុង ២៦ភូមិ ត្រូវបានគេបង្ខំឱ្យចាកចេញពីដីធ្លីរបស់ពួកគេសម្រាប់គម្រោងក្រុមហ៊ុន។ គ្រួសារដែលរងផលប៉ះពាល់បានបាត់បង់ដីស្រែចម្ការ ដីស្មៅ ដំណាំ និងលទ្ធភាពទទួលបានអនុផលព្រៃឈើ ហើយពួកគេត្រូវបង្ខំចិត្តចំណាកស្រុកទៅប្រទេសថៃដើម្បីស្វែងរកការងារធ្វើ។

របាយការណ៍ដែលចេញផ្សាយលើគេហទំព័រអង្គការលីកាដូ។

 

លោក អំ សំអាត បន្ថែមថា បច្ចុប្បន្នក្រុមហ៊ុនមិត្រផូលត្រូវបានរដ្ឋាភិបាលដកយកដីសម្បទានវិញ ហើយអាជ្ញាធរខេត្តនិងក្រសួងពាក់ព័ន្ធបានប្រគល់ដីនោះជូនប្រជាពលវិញបានមួយចំនួន និងពលរដ្ឋមួយចំនួននៅមិនទាន់ទទួលបានដីកាន់កាប់។ ចំណែកករណីរំលោភដីធ្លីពលរដ្ឋនេះ តុលាការប្រទេសថៃនឹងបន្តនីតិវិធីលើបណ្តឹងសើរើនៅក្នុងឆ្នាំនេះ។ ប៉ុន្តែរហូតមកទល់ពេលនេះ លោក អំ សំអាត មិនទាន់បានមើលឃើញពីពន្លឺនៃភាពយុត្តិធម៌នៅឡើយទេ។ ដូច្នេះហើយលោករំពឹងថា តាមរយៈសេចក្តីថ្លែងការណ៍រួមនេះ ស្ថាប័នបុនស៊ូក្រូនឹងផ្តល់ភាពយុត្តិធម៌ជូនជនរងគ្រោះ ដោយជំរុញឱ្យសមាជិកខ្លួនគោរពគោលការណ៍សិទ្ធិមនុស្សក្នុងអាជីវកម្មរបស់ខ្លួន។

លោក អំ សំអាត៖«មកទល់ពេលនេះយើងសង្កេតឃើញថា មិនទាន់មានដំណោះស្រាយឬការការពន្លឿនយុត្តិធម៌ជូនគាត់ទេ ចឹងហើយយើងចេញសេចក្តីថ្លែងការណ៍នេះដើម្បីឱ្យសមាគមន៍បុនស៊ូក្រូ មានចំណែកក្នុងការទទួលខុសត្រូវព្រោះក្រុមហ៊ុន មិត្រផូលជាសមាជិករបស់ខ្លួនហើយគោលការណ៍នៃសមាគមធានាថាមិនមានការរំលោភសិទ្ធិមនុស្ស។ ចឹងបើក្រុមហ៊ុន មិត្រផូលបានរំលោភបំពានសិទ្ធិពលរដ្ឋពាក់ព័ន្ធចំការអំពៅនៅឧត្តមមានជ័យហ្នឹង ចឹងយើងធ្វើការទាមទារនឹងជំរុញគោលការណ៍គោរពសិទ្ធិមនុស្ស និងដោះស្រាយសំណងជូនពលរដ្ឋដែលរងគ្រោះដោយសារក្រុមហ៊ុន មិត្រផូល»។

ទាក់ទងរឿងនេះ អ្នកស្រី ហូយ ម៉ៃ ប្រជាពលរដ្ឋរងគ្រោះករណីនេះប្រាប់វិទ្យុស្ត្រីថា រហូតមកទល់ពេលនេះ មានប្រជាពលរដ្ឋតែ ១២៤ ក្នុងចំណោម ២១៤ តែប៉ុណ្ណោះបានទទួលដីនោះមកគ្រប់គ្រងវិញ។ ចំណែកប្រជាពលរដ្ឋ៩២គ្រួសារផ្សេងទៀតនៅមិនទាន់ដោះស្រាយចប់នៅឡើយទេ ខណៈដីនោះបច្ចុប្បន្នអាជ្ញាធរខេត្តបានផ្តល់សម្បទានដល់ក្រុមហ៊ុនឯកជនមួយផ្សេងទៀតទៅហើយ។ អ្នកស្រីថា គ្រួសារដែលមិនទាន់ទទួលបានការដោះស្រាយខ្លះបានចំណាកស្រុកទៅធ្វើការនៅប្រទេសថៃ ដើម្បីរកប្រាក់ចំណូលផ្គត់ផ្តង់គ្រួសារ។

បើតាមអ្នកស្រី ម៉ៃ ប្រជាពលរដ្ឋដែលមិនទាន់ទទួលបានការដោះស្រាយសមរម្យគ្រងបន្តមកក្រសួងដែនដីនៅខែឧសភាខាងមុខ ដើម្បីសុំកិច្ចអន្តរាគមន៍លើរឿងនេះបន្តទៀត។

អ្នកស្រី ហូយ ម៉ៃ ៖«ខ្ញុំសូមសំណុំពរ និងអំពាវនាវដល់រដ្ឋាភិបាលជួយដល់ប្រជាពលរដ្ឋអ្នកមិនទាន់បានដី ឱ្យពួកគេមានជីវភាពរស់នៅត្រឹមត្រូវ មានបាយហូប មានថវិកាចិញ្ចឹមកូនចៅ»។

ជុំវិញរឿងនេះ វិទ្យុស្រ្តីពុំទាន់អាចរកការឆ្លើយបំភ្លឺពីខាងក្រុមហ៊ុនស្ករស មិត្រផូល និងស្ថាប័នបុនស៊ូក្រូបាននៅឡើយទេ។

ប៉ុន្តែបើតាមសេចក្តីថ្លែងការណ៍ខាងលើ ក្រុមប្រឹក្សាភិបាលរបស់ស្ថាប័នបុនស៊ូក្រូ ធ្លាប់បានច្រានចោលបណ្តឹងរបស់ក្រុមអង្គការសង្គមស៊ីវិលកាលពីខែធ្នូ ឆ្នាំ២០១៨ ក្រោមហេតុផលថា ខ្លួនមិនបានទទួល“ភស្តុតាងជាក់ស្តែងដែលថាក្រុមហ៊ុន មិត្រផូល បានរំលោភបំពានលើលក្ខខណ្ឌនៃក្រមសីលធម៌របស់ស្ថាប័នបុនស៊ូក្រូនោះទេ។

តាមរបាយការណ៍របស់ក្រុមអង្គការសង្គមស៊ីវិលខាងលើ  ​ក្រុមហ៊ុន​មិត្រ​ផូ​ល​បាន​ឃុបឃិតជាមួយ​អាជ្ញាធរ​មូលដ្ឋាន​​រំលោភ​យក​ដី​ចំនួន​ ​៩​,​៤​០​០​ហិ​តា​ពីប្រជាកសិករ​​ ​សម្រាប់​ឧស្សាហកម្ម​ដំណាំ​អំពៅ​នៅ​ភាគ​ពាយ័ព្យ​នៃ​ប្រទេស​កម្ពុជា​។​ នៅ​ចន្លោះ​ឆ្នាំ​ ​២​០​០​៨​ ​ដល់​ ​២​០​០​៩​ ​ប្រជាពលរដ្ឋ​ជាង​ ​២​,​០​០​០​គ្រួសារ​ ​ក្នុង​ ​២​៦​ភូមិ​ ​ត្រូវ​បាន​គេ​បង្ខំ​ឱ្យ​ចាកចេញ​ពី​ដីធ្លី​របស់​ពួកគេ​សម្រាប់​គម្រោង​ក្រុមហ៊ុន​។​

ទាក់ទងរឿងនេះ គណៈកម្មាធិការ​សិទ្ធិមនុស្ស​ជាតិ​ថៃ​បាន​រក​ឃើញ​ថា​ ​ក្រុមហ៊ុន​មិត្រ​ផូ​ល​ត្រូវ​ទទួលខុសត្រូវ​ដោយ​ផ្ទាល់​ចំពោះ​ការ​រំលោភបំពាន​សិទ្ធិមនុស្ស​ទាំងនេះ​។​ ​ប៉ុន្តែ​ជាង​ដប់​ឆ្នាំក្រោយ​មកនេះ​ ​ក្រុមហ៊ុន​នៅ​មិនទាន់​ទទួលខុសត្រូវ​ ​ឬ​ធ្វើការ​កែប្រែ​នៅឡើយ​ទេ​។​​ ​ដោយឡែកតុលាការ​សហ​ព័ន្ធ​របស់​សហរដ្ឋអាមេរិក​កាលពី​ស​ប្តាហ៍​មុន​ ​បាន​បញ្ជា​ឱ្យ​ក្រុមហ៊ុន​កូ​កា​កូឡា​បង្ហាញ​ការ​រក​ឃើញ​ពី​ការស៊ើបអង្កេត​បឋម​លើ​អ្នកផ្គត់ផ្គង់​ស្ករ​របស់​ខ្លួន​។​ ​ដីកា​នេះ​បាន​ធ្វើឡើង​ដើម្បី​ឆ្លើយតបនឹង​ញត្តិ​ដែល​ដាក់​ដោយ​អង្គការ​អាយ​ឌី​អាយ​ ​ក្នុងនាម​ជា​ដើមបណ្តឹង​ក្នុង​សេរី​នៃ​បណ្តឹង​ប្រឆាំង​នឹង​ក្រុមហ៊ុន​មិត្រ​ផូ​ល​ដែល​កំពុង​បន្ត​នៅ​តុលាការ​ថៃ​៕

 

0 0 votes
Article Rating
guest
0 Comments
Inline Feedbacks
View all comments

ព័ត៌មានទាក់ទង

ការស្វែងយល់ពីជំងឺមហារីកមាត់ស្បូន!

ការស្វែងយល់ពីជំងឺមហារីកមាត់ស្បូន!

ថ្ងៃពុធ ទី២៩ ខែមីនា ឆ្នាំ២០២៣

តាមរបាយការណ៍របស់ទីភ្នាក់ងារអន្តរជាតិស្រាវជ្រា[...]

ស្រ្តីគួរស្វែងយល់ពីមូលហេតុនិងវិធីការពារទារកកើតមិនគ្រប់ខែ

ការសម្រាលកូនមិនគ្រប់ខែ ជាបញ្ហាចោទមួយ ក្នុងចំណ[...]

ផលប៉ះពាល់នៃផ្សែងនិងក្លិនបារីចំពោះស្រ្តីមានផ្ទៃពោះនិងគភ៌ក្នុងផ្ទៃ

  ការជក់បារីបង្កផលអវិជ្ជមានច្រើនណាស់ចំពោ[...]

ព័ត៏មានថ្មី

វីដេអូថ្មីបំផុត

0
Would love your thoughts, please comment.x
()
x