ភ្នំពេញ៖ នៅថ្ងៃទី២៤ ខែមករា ឆ្នាំ២០២២នេះ គណៈកម្មាធិការសិទ្ធិមនុស្សកម្ពុជា និងឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា(OHCHR) បានបើកសិក្ខាសាលាពិគ្រោះយោបល់មួយ ជុំវិញការរៀបចំនិងការប្រព្រឹត្តទៅគណៈកម្មាធិការជាតិសិទ្ធិមនុស្សកម្ពុជា។
នេះបើតាមទំព័រហ្វេសប៊ុកគណៈកម្មាធិការសិទ្ធិមនុស្សកម្ពុជានៅថ្ងៃទី២៤ ខែមករា ឆ្នាំ២០២២នេះ។
លោក កែវ រ៉េមី រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានគណៈកម្មធិការសិទ្ធិមនុស្សកម្ពុជាមានប្រសាសន៍ថា កិច្ចពិគ្រោះយោបល់លើសេក្តីព្រាងច្បាប់នេះ ជាធាតុចូលមួយមានសារៈសំខាន់ ដើម្បីធានាថា ច្បាប់នេះ បានការពារ លើកកម្ពស់ និងការគោរពសិទ្ធិមនុស្សនៅកម្ពុជាកាន់តែល្ងប្រសើរ។
ដោយឡែកលោក Pradeep Wagle តំណាង OHCHR និយាយថា ការបង្កើតគណៈកម្មធិការជាតិសិទ្ធិមនុស្សកម្ពុជានេះ មានសារៈសំខាន់ណាស់ ក្នុងការលើកកម្ពស់សិទ្ធិមនុស្ស និងការពារសិទ្ធិមនុស្សនៅកម្ពុជា។ លោកបន្តថា លោកនឹងបន្តសហការជាមួយគណៈកម្មាធិការសិទ្ធិមនុស្សកម្ពុជាក្នុងការបង្កើតគណៈកម្មាធិការជាតិសិទ្ធិមនុស្សកម្ពុជានេះប្រកបដោយប្រសិទ្ធិភាព។
សូមបញ្ជាក់ថា សេចក្តីព្រាងច្បាប់មួយនេះរៀបចំធ្វើឡើងដោយ គណៈកម្មាធិការសិទ្ធិមនុស្សកម្ពុជា និងមានកិច្ចសហការផ្ដល់ជាបច្ចេកទេសពីការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា និងវេទិកាអាស៊ីប៉ាស៊ីហ្វិក (Asia Pacific Forum-APF) ដែលមានទីតាំងនៅប្រទេសអូស្ត្រាលី។
គណៈកម្មាធិការជាតិសិទ្ធិមនុស្សកម្ពុជា បង្កើតឡើងក្នុងគោលបំណងតួនាទីជាស្ថាប័នជាតិមួយមានភាពឯករាជ្យ អព្យាក្រឹត្យ ដើម្បីបំពេញការងារលើវិស័យសិទ្ធិមនុស្សឱ្យល្អប្រសើរ៕
