ប្រជាពលរដ្ឋរងគ្រោះដីធ្លីប្រមាណ ៥០ នាក់មកពី ស្រុកគិរីសាគរ និងស្រុកបុទុមសាគរ ខេត្តកោះកុង បានឡើងមករាជធានីភ្នំពេញ ដើម្បីមកដាក់ញត្តិនៅរដ្ឋសភាជាតិ ឱ្យជួយដោះស្រាយបញ្ហាដីធ្លី ជាមួយក្រុមហ៊ុន ចិន យូញៀន ឌីវែលឡុបមិនត៍ គ្រុប ខូអែលធីឌី (Union Development Group Co., Ltd) នាព្រឹកថ្ងៃទី ១២ ខែ វិច្ឆិកា ឆ្នាំ ២០១៥ ដោយពួកគេលើកឡើងថា ការអភិវឌ្ឍរបស់ក្រុមហ៊ុនចិនមួយនេះ បានប៉ះពាល់ធ្ងន់ធ្ងរដល់ជីវភាពរស់នៅរបស់ពួកគេ។
ប្រជាពលរដ្ឋរងគ្រោះដីធ្លីប្រមាណ ៥០ នាក់មកពីភូមិពយជប៉ុន ឃុំកោះស្តេច ស្រុកគីរីសាគរ និងស្រុកបុទុមសាគរ ខេត្តកោះកុង បានឡើងមករាជធានីភ្នំពេញ ដើម្បីដាក់ញត្តិនៅរដ្ឋសភាជាតិ ឱ្យជួយដោះស្រាយបញ្ហា ដីធ្លីជាមួយក្រុមហ៊ុនចិន ដែលប្រជាពលរដ្ឋចោទថា មិនបានផ្តល់សំណង់សមរម្យ ចំពោះផលប៉ះពាល់ទៅលើពួកគេ។
ពលរដ្ឋរងគ្រោះដីធ្លីម្នាក់គឺ លោក ជួន ជុំ មានអាយុ ៦៣ ឆ្នាំ បានឱ្យដឹងថា ប្រជាពលរដ្ឋរស់នៅតំបន់កូនកុក ប្រមាណ ៤២ គ្រួសារ រងផលប៉ះពាល់ដីធ្លីជាង ១០០ ហិកតា ជាមួយក្រុមហ៊ុនចិន ឈ្មោះ យូញៀន ឌីវែលឡុបមិនត៍ គ្រុប ខូអែលធីឌី តាំងពីឆ្នាំ ២០១០មកម្ល៉េះ។
លោក ជួន ជុំ បន្តថា ប្រជាពលរដ្ឋអស់ជំនឿទៅលើអាជ្ញាធរថ្នាក់ក្រោមជាតិ ដែលមិនអាចជួយ ដោះស្រាយបញ្ហាដីធ្លីជូនពួកគេបាន ទើបប្រជាពលរដ្ឋបានលើកគ្នាប្រមាណ ៥០ នាក់ មក ដាក់ ញ្ញត្តិនៅ រដ្ឋសភាជាតិឱ្យជួយដោះស្រាយបញ្ហាដីធ្លីនេះ។ លោកនិយាយថា៖ «បាទ! តាមការពិត ទៅចំពោះខាងតំបន់កូនកុករបស់ខ្ញុំ ប្រជាសហគមន៍ ៤២ គ្រួសារ មានសំណូមពរសុំឱ្យក្រុមហ៊ុន កុំយកដីបន្តទៅទៀត ហើយសល់ដីប៉ុន្មានសុំវិញ និងសុំឱ្យអាជ្ញាធរជួយធ្វើបណ្ណកម្មសិទ្ធិដីធ្លីស្រប់ច្បាប់ កុំឱ្យក្រុមហ៊ុនយកតទៅទៀត»។
ចំណែកពលរដ្ឋរងគ្រោះម្នាក់ទៀត លោក ប៊ុន នីម អាយុ ៥៣ ឆ្នាំ បានឱ្យដឹងថា ក្រុមហ៊ុន យូញៀន ឌីវែលឡុបមិនត៍ គ្រុប
ខូអែលធីឌី បានបណ្តេញប្រជាពលរដ្ឋទាំងបង្ខំ ដោយពុំបានផ្តល់សំណងសមរម្យឡើយ។ លោក នីម បន្តថា លោកស្នើឱ្យរដ្ឋាភិបាលជួយខ្វៀលដីទុកឱ្យប្រជាពលរដ្ឋ ស្ថិតនៅក្នុងភូមិកោះស្តេច ឃុំកោះស្តេច ស្រុកគីរីសាគរ និងស្រុកបុទុមសាគរ ខេត្តកោះកុង ដើម្បីពួកគាត់អាចបង្កបង្កើនផលតទៅទៀត។
លោក ប៊ុន នី ថា៖ «ខ្ញុំសុំទាមទារឱ្យរដ្ឋាភិបាលខ្វៀលដីទុកឱ្យប្រជាពលរដ្ឋ ធ្វើស្រែ ធ្វើចម្ការ។ មករស់នៅដីថ្មីធ្វើអ្វីបាន? មកនៅលើភ្នំ ធ្វើចម្ការបានតែ ១ រដូវទេ អស់ពីហ្នឹងទៅអត់ [អត់]មានអ្វីធ្វើទេ»។
តំណាងប្រជាពលរដ្ឋរងគ្រោះអ្នកស្រី ភួ តាំងគាន ដែលចូលទៅដាក់ញត្តិនៅរដ្ឋសភា កាលព្រឹកថ្ងៃព្រហស្បតិ៍ ទី១២ ខែវិច្ឆិកា បានឱ្យដឹងថា សមាជិករដ្ឋសភាម្នាក់គឺ អ្នកស្រី ឡោក ខេង បានទទួលញត្តិពីតំណាងពលរដ្ឋ ដោយបានសន្យាថា រដ្ឋសភានឹងជួយជំរុញបន្ថែមទៀត ទៅរដ្ឋមន្ត្រីក្រសួងបរិស្ថាន លោក សាយ សំអាល់ ឱ្យអង្កេតលើបញ្ហាដីធ្លី ស្ថិតនៅក្នុងស្រុកគីរីសាគរ និងស្រុកបុទុមសាគរ ខេត្តកោះកុងនេះឱ្យបានឆាប់ៗ។
អ្នកស្រី តាំងគាន បន្តថា នៅក្នុងញត្តិដាក់ជូនរដ្ឋសភាព្រឹកមិញនេះគឺ ស្នើឱ្យរដ្ឋសភា ជួយបញ្ឈប់សកម្មភាពឈូសឆាយ និងសាងសង់អាគាររបស់ក្រុមហ៊ុនចិន យូញៀន ឌីវែលឡុបមិនត៍ គ្រុប ខូអែលធីឌី ជាបណ្តោះអាសន្នសិន។
អ្នកស្រី តាំងគាន និយាយថា៖ «សំណើរបស់យើងសុំឱ្យកាត់ខ្វៀលដី ហើយផ្អាកការឈូសឆាយ កុំសាងសង់សំណង់លើដីរបស់ខ្ញុំ។ ក្រុមហ៊ុនហ្នឹងពេលប្រជាពលរដ្ឋតវ៉ា គេមិនផ្អាកការឈូសឆាយទេ ហើយក្រុមហ៊ុនបានឈូសឆាយ ហើយវាកំពុងតែដាក់សំណង់ ខួងដី ដើម្បីសង់សំណង់លើដីរបស់ខ្ញុំ ខ្ញុំអត់ចង់មានអាគារមាននៅលើដីជម្លោះទេ»។
សូមបញ្ជាក់ថា ប្រជាពលរដរងផលប៉ះពាល់ដីធ្លីចំនួន ៣១៨ គ្រួសារ នៅក្នុងឃុំចំនួន ៥ មានឃុំព្រែកខ្សាច់ ឃុំព្រៃមាស ឃុំកោះស្តេច ឃុំតានូ និងឃុំថ្មស ស្ថិតនៅក្នុងស្រុកគីរីសាគរ និងស្រុកបុទុមសាគរ ខេត្តកោះកុង បានរងផលប៉ះពាល់ពីការអភិវឌ្ឍរបស់ក្រុមហ៊ុនចិន នោះលើផ្ទៃដីសរុបជាង ៣ ពាន់ ៦ រយ ហិកតា ជាដីភូមិ ដីស្រែ និងដីចម្ការ របស់ប្រជាពលរដ្ឋ៕
