សាកលវិទ្យាល័យដែលឈានមុខគេមួយនៅហុងកុង បានរុះរើ និងយករូបសំណាកមួយ ចេញពីបរិវេណសាលារបស់ខ្លួន។ ទីនោះជាកន្លែងរំលឹកដល់បណ្ដាបាតុករគាំទ្រលទ្ធិប្រជាធិបតេយ្យ ដែលត្រូវបានសម្លាប់ អំឡុងពេលមានការបង្ក្រាបនៅទីលានធានអានមេន របស់ប្រទេសចិន នាឆ្នាំ១៩៨៩។

ស្នាដៃសិល្បៈ ស្ដីពីដងខ្លួនមនុស្សដែលឈឺចាប់ខ្លាំង គឺជាបូជនីយដ្ឋានមួយ ក្នុងចំណោមទីសក្ការៈសាធារណៈមួយចំនួន ដែលនៅសេសសល់លើអតីតដែនដីអាណានិគមអង់គ្លេស។ គេបានស្ថាបនាវាឡើងដើម្បីរំលឹកអំពីការបង្ក្រាបដ៏បង្ហូរឈាមនាពេលនោះ ដែលជាប្រធានបទហាមឃាត់នៅក្នុងប្រទេសចិនដីគោក ទីដែលគេមិនអាចរំលឹកអំពីរឿងនោះជាសាធារណៈបាន។

ដោយត្រូវបានគេស្គាល់ថាជា “សសរនៃភាពអាម៉ាស់” រូបសំណាកនោះគឺជានិមិត្តសញ្ញាដ៏សំខាន់នៃសេរីភាពទូលំទូលាយ ដែលគេបានសន្យាផ្តល់ឱ្យទីក្រុងហុងកុង ពេលកោះនេះវិលត្រឡប់ទៅនៅក្រោមការគ្រប់គ្រងរបស់ចិនវិញក្នុងឆ្នាំ១៩៩៧៕

—

យោង៖ https://www.reuters.com/world/china/hong-kong-university-fences-off-tiananmen-statue-campus-2021-12-22/