កងកម្លាំងស្វ័យការពារប្រទេសជប៉ុន និងយោធាសហរដ្ឋអាមេរិក បានរៀបចំផែនការធ្វើប្រតិបត្តិការរួមគ្នាមួយ ដែលនឹងអនុញ្ញាតឱ្យមានការបង្កើតមូលដ្ឋានវាយប្រហារ ប្រសិនបើមានការលុកលុយជាយថាហេតុណាមួយនៅកោះតៃវ៉ាន់។
យោងតាមប្រភពពីរដ្ឋាភិបាលជប៉ុន កងកម្លាំងស្វ័យការពាររបស់ប្រទេសជប៉ុន និងយោធាសហរដ្ឋអាមេរិក បានរៀបចំផែនការធ្វើប្រតិបត្តិការរួមគ្នាមួយ ដែលនឹងអនុញ្ញាតឱ្យមានការបង្កើតមូលដ្ឋានវាយប្រហារនៅតាមបណ្តោយជួរកោះណាន់សៃ ភាគនិរតីនៃប្រទេសជប៉ុន ប្រសិនបើមានការលុកលុយជាយថាហេតុណាមួយនៅកោះតៃវ៉ាន់។
ប្រភពដដែលបានប្រាប់ទីភ្នាក់ងារសារព័ត៌មានក្យូដូកាលពីថ្ងៃព្រហស្បតិ៍ថា ប្រទេសជប៉ុន និងសហរដ្ឋអាមេរិក នឹងអាចឯកភាពគ្នាចាប់ផ្តើមធ្វើការ ដើម្បីកំណត់ជាផ្លូវការ នូវផែនការធ្វើប្រតិបត្តិការមួយ នៅពេលដែលរដ្ឋមន្ត្រីការពារជាតិ និងរដ្ឋមន្ត្រីបរទេស នៃប្រទេសទាំងពីរ ជួបគ្នានៅដើមខែមករា ក្នុងក្របខ័ណ្ឌ “ពីរបូកពីរ”។
ដំណើរវិវឌ្ឍន៍នេះទំនងជានឹងបង្កឱ្យមានប្រតិកម្មប្រឆាំងយ៉ាងខ្លាំងក្លាពីសំណាក់ប្រទេសចិន ដែលចាត់ទុកកោះស្វ័យត្រាណតៃវ៉ាន់ថាជាខេត្តបំបែកខ្លួនមួយ ដែលត្រូវបង្រួបបង្រួមជាមួយចិនដីគោកវិញ ទោះបីជាត្រូវប្រើកម្លាំងបង្ខំក៏ដោយនោះ។
បើតាមផែនការព្រាង នៅដំណាក់កាលដំបូងនៃការវាយប្រហារជាយថាហេតុ កងទ័ពជើងទឹកសហរដ្ឋអាមេរិកនឹងបង្កើតមូលដ្ឋានវាយប្រហារបណ្ដោះអាសន្នមួយនៅតាមជួរកោះណាន់សៃ ដែល លាតសន្ធឹងនៅភាគនិរតីនៃប្រទេសជប៉ុន ចាប់ពីខេត្តកាហ្គូស៊ីម៉ា និងខេត្តអូគីណាវ៉ា ឆ្ពោះទៅកោះតៃវ៉ាន់។
ខេត្តអូគីណាវ៉ា មានមូលដ្ឋានយោធាសហរដ្ឋអាមេរិកធំជាងគេនៅក្នុងប្រទេសជប៉ុន។
ប្រភពបាននិយាយថា យោធាសហរដ្ឋអាមេរិកនឹងទទួលបានការគាំទ្រពីកងកម្លាំងស្វ័យការពាររបស់ជប៉ុន ក្នុងការបញ្ជូនទាហានទៅកាន់បណ្ដាកោះទាំងនោះ ប្រសិនបើការវាយប្រហារជាយថាហេតុ ទៅលើកោះតៃវ៉ាន់ មានសភាពបន្ទាន់។
ប៉ុន្តែ ការដាក់ពង្រាយកម្លាំងបែបនេះនឹងធ្វើឱ្យកោះទាំងនោះក្លាយជាគោលដៅនៃការវាយប្រហារដោយយោធារបស់ប្រទេសចិន ហើយធ្វើឱ្យជីវិតអ្នកស្រុកនៅលើកោះ ប្រឈមមុខនឹងគ្រោះថ្នាក់។
ប្រភពបាននិយាយថា គេត្រូវការឱ្យមានការកែប្រែច្បាប់នៅក្នុងប្រទេសជប៉ុន ដើម្បីសម្រេចផែនការនេះ៕
