ភ្នំពេញ៖ ក្នុងឱកាសបុណ្យណូអែលនេះ ផ្សារទំនើប អូឡាំព្យា បានរៀបចំកម្មវិធីពិព័រណ៍សប្បុរសធម៌មួយឈ្មោះថា“ពិព័រណ៍បុណ្យណូអែល៖ រួមចំណែកកែប្រែជីវិតកុមារកម្ពុជា”។ ពិព័រណ៍នេះ រៀបចំឡើងដើម្បីរៃអង្គាសទឹកប្រាក់ជូនទៅដល់អង្គការទស្សនៈពិភពលោក ដើម្បីសាងសង់អណ្តូងទឹកមួយដល់សិស្សានុសិស្សចំនួន ៤០០នាក់ ក្នុងសាលាបឋមសិក្សា អាឡែង នៅខេត្តកំពង់ឆ្នាំង។
កម្មវិធីពិព័រណ៍សប្បុរសធម៌នេះ នឹងធ្វើឡើងនៅផ្សារទំនើប អូឡាំព្យា រាជធានីភ្នំពេញពីថ្ងៃទី ២៤ ដល់ថ្ងៃ៣១ ខែធ្នូ ឆ្នាំ២០២១។ អ្នកចូលរួមពិព័រណ៍ អាចមកមើលតូបលក់កាដូបុណ្យណូអែលជាច្រើន ដែលមានទាក់ទងជាមួយនឹង អនាម័យ ទឹកស្អាត វិស័យអប់រំ រួមទាំងការសម្តែងពីសិល្បករដ៏ឆ្នើមរបស់ប្រទេសកម្ពុជាផងដែរ។
លោក នង ដាវីត មន្ត្រីបច្ចេកទេសកម្មវិធីទឹកស្អាត និងអនាម័យនៅ អង្គការទស្សនៈពិភពលោក បានប្រាប់ថា គោលដៅរបស់កម្មវិធី នៃគម្រោងទឹកស្អាតនិងអនាម័យរបស់អង្គការទស្សនៈពិភពលោក គឺសម្រាប់ធានាទៅដល់ការលូតលាស់របស់កុមារ ដើម្បីឲ្យពួកគាត់មានសុខភាពល្អ ហើយនិងសម្រាប់ក្រុមគ្រួសារទទួលបាននូវទឹកស្អាតផងដែរ។
តាមការវាយតម្លៃរបស់អង្គការទស្សនៈពិភពលោក បានបង្ហាញថា សិស្សានុសិស្សសរុបចំនួនជាង៤០០នាក់ (៣៩១នាក់) ក្នុងនោះ ១៩៧ ជាសិស្សស្រី និងគ្រូចំនួន ១៥នាក់ មិនមានទឹកស្អាតសម្រាប់បរិភោគ និងលាងសម្អាត ឬប្រើប្រាស់បង្គន់អនាម័យនោះទេ។ លោក នង ដាវីត បន្ថែមថា ការចូលរួមពីអ្នកទាំងអស់គ្នា គឺដើម្បីជួយនិងធានាទៅលើការអភិវឌ្ឍន៍របស់កុមារគ្រប់រូប៕
