នាយករដ្ឋមន្ត្រីអង់គ្លេស លោក បូរីស ចនសុន បាននិយាយនៅថ្ងៃចន្ទថា យ៉ាងហោចណាស់មនុស្សម្នាក់បានស្លាប់នៅក្នុងចក្រភពអង់គ្លេស បន្ទាប់ពីបានឆ្លងមេរោគបំប្លែងខ្លួនអូមីក្រុង នៃជំងឺកូវីដ-១៩។ នេះបើយោងតាមទីភ្នាក់ងារសារព័ត៌មានរើយធើ។
នេះជាការស្លាប់ដំបូងគេបង្អស់ដែលត្រូវបានបញ្ជាក់ជាសាធារណៈនៅទូទាំងពិភពលោក ដោយសារការរីករាលដាលយ៉ាងឆាប់រហ័សនៃមេរោគប្រភេទថ្មីខាងលើ។
ចាប់តាំងពីពេលដែលករណីឆ្លងមេរោគបំប្លែងខ្លួនអូមីក្រុង ដំបូង ត្រូវបានរកឃើញនៅថ្ងៃទី២៧ ខែវិច្ឆិកាក្នុងប្រទេសអង់គ្លេស, លោក ចនសុន បានដាក់ចេញនូវវិធានការរឹតត្បិតកាន់តែតឹងរ៉ឹង។
កាលពីថ្ងៃអាទិត្យ នាយករដ្ឋមន្ត្រីអង់គ្លេសក៏បានព្រមានដែរថា មេរោគបំប្លែងខ្លួនប្រភេទថ្មីនេះអាចជម្នះលើប្រព័ន្ធការពារខ្លួនរបស់អ្នកដែលបានចាក់វ៉ាក់សាំងកូវីដ-១៩ចំនួន២ដងរួចហើយ។
ប្រទេសអង់គ្លេសមិនបានផ្តល់ព័ត៌មានពិស្ដារអំពីការស្លាប់នេះទេ ក្រៅពីថាជននោះត្រូវបានគេធ្វើរោគវិនិច្ឆ័យនៅមន្ទីរពេទ្យ។ វាមិនប្រាកដទេថា តើអ្នកជំងឺបានចាក់ថ្នាំបង្ការរួចរាល់ ឬមានបញ្ហាសុខភាពផ្សេងៗឬយ៉ាង។
ការស្លាប់ដោយសារមេរោគប្រភេទអូមីក្រុង អាចកើតឡើងនៅក្នុងប្រទេសផ្សេងទៀត ប៉ុន្តែមិនទាន់មានការបញ្ជាក់ជាសាធារណៈនៅឡើយ ក្រៅពីចក្រភពអង់គ្លេស៕
—
យោង៖ https://www.reuters.com/world/uk/britain-says-omicron-spreading-phenomenal-rate-2021-12-13/
