រដ្ឋមន្ត្រីក្រសួងហិរញ្ញវត្ថុកូរ៉េខាងត្បូង លោក ហុង ណាំ គី បាននិយាយនៅថ្ងៃចន្ទថា រដ្ឋាភិបាលនឹងផ្តើមនីតិវិធីសុំចូលជាសមាជិក ក្នុងកិច្ចព្រមព្រៀងតំបន់ពាណិជ្ជកម្មសេរីនៃភាពជាដៃគូអន្តរប៉ាស៊ីហ្វិក (TPP)។
លោក ហុង ដែលមានឋានៈជាឧបនាយករដ្ឋមន្ត្រីផង បានធ្វើការកត់សម្គាល់អំពីរឿងនេះ អំឡុងកិច្ចប្រជុំ
គណៈរដ្ឋមន្ត្រីស្តីពីកិច្ចការសេដ្ឋកិច្ចក្រៅប្រទេស។
គេរំពឹងថា រដ្ឋាភិបាលកូរ៉េខាងត្បូងនឹងដាក់ពាក្យសុំចូលជាសមាជិកក្នុងតំបន់ពាណិជ្ជកម្មសេរី ធីភីភី ក្រោយពីរាយការណ៍ប្រាប់សភា អំពីជំហានរបស់ខ្លួន ក្នុងចំណោមជំហានផ្សេងៗទៀត។
កិច្ចព្រមព្រៀងពាណិជ្ជកម្ម ធីភីភី ដែលមានសមាជិក១១ប្រទេស ពោលគឺ អូស្ត្រាលី ប៊្រុយណេ កាណាដា ស៊ីលី ជប៉ុន ម៉ាឡេស៊ី ម៉ិកស៊ិក ប៉េរូ នូវែលសេឡង់ សិង្ហបុរី និងវៀតណាម ត្រូវបានគេស្គាល់ជាផ្លូវការថា «កិច្ចព្រមព្រៀងពេញលេញនិងជឿនលឿនដើម្បីភាពជាដៃគូអន្តរប៉ាស៊ីហ្វិក»៕
—
យោង៖ https://english.kyodonews.net/news/2021/12/1517eb6ae2e1-urgent-s-korea-to-apply-for-tpp-free-trade-pact-membership.html
