រដ្ឋាភិបាលនូវែលសេឡង់ នៅថ្ងៃព្រហស្បតិ៍ បានប្រកាសផែនការនានា ដើម្បីបញ្ចូលបម្រាមលក់បារីឱ្យក្មេងៗជំនាន់ក្រោយ។ ប៉ុន្តែមានសមាជិកបក្សប្រឆាំងដែលមិនគាំទ្រផែនការនេះទេ។

រដ្ឋាភិបាលនូវែលសេឡង់ នៅថ្ងៃព្រហស្បតិ៍ បានប្រកាសផែនការនានា ដើម្បីបញ្ចូលបម្រាមលក់បារីឱ្យក្មេងៗជំនាន់ក្រោយ ទៅក្នុងច្បាប់។

នេះជាបម្រាមពេញមួយជីវិត ដែលស្ថិតក្នុងគោលដៅរបស់ប្រទេសនូវែលសេឡង់ ក្នុងការប្រែក្លាយខ្លួនជាប្រទេស«គ្មានផ្សែងបារី»នៅឆ្នាំ២០២៥។

នៅក្រោមផែនការនេះ មនុស្សដែលមានអាយុចាប់ពី១៤ឆ្នាំចុះក្រោម នឹងមិនអាចទិញថ្នាំជក់ដោយស្របច្បាប់បានទេ នៅពេលណាដែលច្បាប់ចូលជាធរមាន។

សេចក្ដីស្នើច្បាប់ស្ដីពីរឿងនេះ ​នឹង​ត្រូវ​ដាក់​ឱ្យ​សភាពិនិត្យ​នៅ​ខែ​មិថុនា​ឆ្នាំ​ក្រោយ ​ក្នុង​គោល​បំណង​សុំឱ្យសភាអនុម័តឱ្យក្លាយជា​ច្បាប់​នៅ​ចុង​ឆ្នាំ​២០២២។

គម្រោងច្បាប់ថ្មីនេះក៏នឹងព្យាយាមកាត់បន្ថយ«ភាពទាក់ទាញ, ភាពញៀន, និងភាពងាយរកបាន»នៃបារីដែរ។

វានឹងអនុញ្ញាតឱ្យលក់តែផលិតផលថ្នាំជក់ ដែលមានជាតិនីកូទីនទាបបំផុត ហើយវានឹងកាត់បន្ថយយ៉ាងច្រើននូវចំនួនតូបលក់បារី។

នាយករដ្ឋមន្ត្រីនូវែលសេឡង់ លោកស្រី ចាស្ស៊ីនដា អាឌែន (Jacinda Ardern) បានគាំទ្រវិធានការថ្មីដ៏តឹងរ៉ឹងនេះ។

លោកស្រីបានប្រាប់អ្នកសារព័ត៌មានតាមសម្ដីផ្ទាល់ថា៖ «ការបន្តដំឡើងថ្លៃនឹងមិនអាចជួយមនុស្សឱ្យឈប់ជក់បារីបានទេ»។

ប៉ុន្តែ ការហាមប្រាមមិនដែលបានផលល្អទេ ហើយតែងតែហុចផលវិបាកនានា ដែលគេមិនចង់បាន។ នេះបើយោងតាមលោកស្រី ការ៉ែន ឈួរ (Karen Chhour) ដែលជាសមាជិកាម្នាក់នៃគណបក្សប្រឆាំងឈ្មោះ សមាគមអ្នកប្រើប្រាស់និងអ្នកបង់ពន្ធ ហៅកាត់ថា អែកថ៍ (ACT)។

លោកស្រី ការ៉ែន ឈួរ ដែលហៅខ្លួនឯងថាជា«អតីតអ្នកជក់បារី» បានថ្លែងថា៖ «ជាយថាហេតុ យើងនឹងឃើញមានទីផ្សារថ្នាំជក់លួចលាក់កើតឡើង ដោយពុំមានបទដ្ឋានឬបទប្បញ្ញត្តិ ហើយប្រជាជននឹងរងគ្រោះ»។

បច្ចុប្បន្ន ការជក់បារីជាហេតុចម្បងគេនៃមរណភាពដែលអាចបញ្ចៀសបាន ក្នុងចំណោមប្រជាជននូវែលសេឡង់ ដែលមានចំនួន៥លាននាក់។

វាបណ្តាលឱ្យមានជំងឺមហារីក១ករណីក្នុងចំណោម៤ករណី នៅទូទាំងប្រទេសនូវែលសេឡង់៕

—

យោង៖ https://english.kyodonews.net/news/2021/12/48b519490de1-new-zealand-plans-lifetime-ban-on-cigarettes-for-young-generations.html