ខណៈកម្ពុជា និងវៀតណាម អះអាងថា ដីនៅតំបន់ដាក់ដាំ ខេត្តមណ្ឌលគិរី ជារបស់ផងខ្លួនរៀងៗខ្លួន តំណាងរាស្ត្រគណបក្សសង្គ្រោះជាតិម្នាក់គឺលោកអ៊ុំ សំអាន បានសរសេរលើហ្វេសប៊ុកផ្លូវការរបស់លោកពីសហរដ្ឋអាមេរិកមកថា ក្នុងការចរចាទ្វេរភាគីជាមួយវៀតណាម រឿងបញ្ហាព្រំដែន ដែលវៀតណាមបានរំលោភយកពីកម្ពុជា គឺវៀតណាមមិនងាយប្រគល់មកឲ្យកម្ពុជាវិញទេ។ លោកអ៊ុំ សំអាន អះអាងថា មានតែតុលាការយុត្តិធម៌អន្តរជាតិប៉ុណ្ណោះទើបអាចដោះស្រាយបញ្ហាព្រំដែនកម្ពុជា វៀតណាមបាន។
តំណាងរាស្ត្រគណបក្សសង្គ្រោះជាតិមួយរូប ដែលអះអាងថា លោកទៅសហរដ្ឋអាមេរិក ដើម្បីរកផែនទីដែលយកទៅតម្កល់នៅអង្គការសហប្រជាជាតិ នាជំនាន់សម្ដេចព្រះនរោត្តម សីហនុនោះ បានថ្លែងថា មានតែយន្តការតុលាការអន្តរជាតិប៉ុណ្ណោះ ទើបអាចទាមទារយកដីដែលវៀតណាមរំលោកយកពីកម្ពុជាមកវិញបាន។
លោកអ៊ុំ សំអាន បានសរសេរលើហ្វេសប៊ុកផ្លូវការរបស់លោកនៅថ្ងៃទី១០ ខែវិច្ឆិកា ២០១៥ មានខ្លឹមសារថា ជាទម្លាប់ កាលណាវៀតណាមកាន់កាប់ដីខ្មែរហើយ វៀតណាមមិនដែលប្រគល់ឲ្យខ្មែរវិញទេ ទោះចរចាទ្វេភាគីយ៉ាងណាក៏ដោយ។ ដូច្នេះបើចង់បានដីនោះមកវិញ ជម្រើសមានតែម្យ៉ាងគត់ គឺប្តឹងទៅតុលាការយុត្តិធម៌អន្តរជាតិ ICJ។
នៅលើហ្វេសប៊ុកនោះ លោកអ៊ុំ សំអាន បានសរសេរអត្ថបទមួយមានចំណងជើងថា «ព័ត៌មានពិសេសពីផែនទីតម្កល់នៅUN អាចការពារដីខ្មែរនៅតំបន់ដាក់ដាំ» ។ លោកថា ផែនទីកម្ពុជាតម្កល់នៅអង្គការសហប្រជាជាតិ(UN) ដែលលោកបានទទួលគឺផ្ទាំង Sre Khtum បោះពុម្ពឆ្នាំ១៩៥២ ស្របតាមមាត្រា២នៃរដ្ឋធម្មនុញ្ញ។ លោកបន្តថា ខ្សែព្រំដែនដើរតាមព្រែកដាក់ហ៊ូត មិនមែនខ្សែព្រំដែនដើរតាមព្រែកដាក់ដាំដូចការអះអាងរបស់វៀតណាមនោះទេ។
លោកអ៊ុំ សំអាន បានផ្ដល់អនុសាសន៍ថា រដ្ឋាភិបាលអាចប្រើផែនទីតម្កល់នៅអង្គការសហប្រជាជាតិនេះ និងសេចក្តីសម្រេចរបស់អគ្គទេសាភិបាលបារាំងប្រចាំឥណ្ឌូចិនឆ្នាំ១៩១៤ ដើម្បីទាមទារដីខ្មែរ៥១គីឡូម៉ែត្រការ៉េពីវៀតណាមមកវិញ។
លោកអ៊ុំ សំអាន បានសរសេរបន្តទៀតថា តំបន់ដាក់ដាំ ដាក់ហ៊ូត ខេត្តមណ្ឌលគិរី វៀតណាមអះអាងថាជាទឹកដីរបស់ខ្លួន ដោយបានធ្វើផ្លូវក្រាលកៅស៊ូមកដល់ច្រកដាក់ដាំ (ចូលទឹកដីខ្មែរ) ជាប់ព្រែកដាក់ដាំ សាងសង់សាលារៀន និងប្រឡាយទឹកនៅតំបន់នោះ ទោះបីមានការតវ៉ាពីភាគីកម្ពុជាក៏ដោយ។
លោកអ៊ុំ សំអាន បានសរសេរបន្ថែមទៀតថា ពីព្រែកដាក់ដាំ ទៅព្រែកដាក់ហ៊ូតមានផ្ទៃក្រឡាប្រហែល៥១គីឡូម៉ែត្រការ៉េ ប៉ុន្តែបច្ចុប្បន្នដី៥១គីឡូម៉ែត្រការ៉េនេះគ្រប់គ្រងដោយវៀតណាម។ ទោះជាយ៉ាងណាក៏ដោយ តំបន់នេះមិនទាន់ដោះស្រាយរួចរាល់និងបោះបង្គោលនៅឡើយទេ។ លោកថា សព្វថ្ងៃព្រំដែនកម្ពុជា-វៀតណាមបណ្តោះអាសន្ននៅត្រឹមព្រែកដាក់ដាំ។
បញ្ហាខ្សែបន្ទាត់ព្រំដែនខ្មែរនៅតំបន់ដាក់ដាំ ដាក់ហ៊ូតនេះ ទាំងលោកនាយករដ្ឋមន្ត្រីហ៊ុន សែន ទាំងលោកសុខ ទូច សុទ្ធតែបានអះអាងថា ខ្សែបន្ទាត់ព្រំដែននៅតំបន់នោះរត់តាមព្រែកដាក់ហ៊ូត ដូចៗគ្នា។
យ៉ាងនេះក្ដី ខាងភាគីវៀតណាម បានអះអាងថា ខ្លួនមានអធិបតេយ្យពេញលេញ លើដីនៅតំបន់ព្រំដែនដាក់ដាំ ក្នុងខេត្តដាក់ណាង ប្រទេសវៀតណាម ជាប់ព្រំដែនខេត្តមណ្ឌលគិរីប្រទេសកម្ពុជា។
វិទ្យុស្ត្រីអេហ្វអឹម ១០២ នៃWMC បានទាក់ទងទងទៅលោកស្រីកុយ ពិសី អនុប្រធានលេខាធិការដ្ឋានអចិន្ត្រៃយ៍នៃអាជ្ញាធរជាតិ ទទួលបន្ទុកកិច្ចការព្រំដែនកម្ពុជាដែរ ដើម្បីចង់ដឹងពីជំហររបស់គណៈកម្មការព្រំដែនកម្ពុជា ប៉ុន្តែលោកស្រីមិនទទួលទូរសព្ទ។
ទោះបីជាយ៉ាងណា កាលពីដើមខែវិច្ឆិកានេះ ប្រធានគណៈកម្មាធិការទទួលបន្ទុកកិច្ចការព្រំដែនកម្ពុជា លោក វ៉ា គឹមហុង បានមានប្រសាសន៍ជាមួយវិទ្យុអាស៊ីសេរីថា កម្ពុជា មានសេចក្តីសម្រេចរបស់អគ្គទេសាភិបាលបារាំង ឆ្នាំ១៩១៤ ខ្សែព្រំដែនតាមព្រែកដាក់ហ៊ូត ។ ដូច្នេះ តំបន់ដាក់ដាំដាក់ហ៊ូត ស្ថិតក្នុងបូរណភាពទឹកដីរបស់កម្ពុជា៕
