តុលាការនៃប្រទេសមីយ៉ាន់ម៉ាដែលគ្រប់គ្រងដោយយោធា បានពន្យារពេលការប្រកាសសាលក្រមដំបូង ក្នុងការជំនុំជម្រះរឿងក្ដីរបស់លោកស្រី អោង សាន ស៊ូ ជី ទៅថ្ងៃទី៦ ខែធ្នូវិញ។ នេះជាសេចក្ដីរាយការណ៍របស់ទីភ្នាក់ងារសារព័ត៌មានរើយធើ ផ្សាយនៅថ្ងៃអង្គារ ដោយផ្អែកតាមប្រភពស្និទ្ធនឹងនីតិវិធីតុលាការ។
តុលាការបានកំណត់ពេលប្រកាសសាលក្រមនៅថ្ងៃអង្គារ ទី៣០ ខែវិច្ឆិកា ទាក់ទងនឹងបទញុះញង់ និងបទរំលោភវិធានការទប់ស្កាត់កូវីដ-១៩ តាមច្បាប់ស្ដីពីគ្រោះមហន្តរាយធម្មជាតិ។ ប្រភពដែលនិយាយក្នុងលក្ខខណ្ឌមិនបញ្ចេញឈ្មោះ មិនបានប្រាប់ពីមូលហេតុនៃការពន្យារពេលនេះទេ ហើយតុលាការក្នុងរដ្ឋធានីណៃពីដោក៏មិនអាចឱ្យអ្នកសារព័ត៌មានទាក់ទងបានភ្លាមៗដែរ។
លោកស្រី ស៊ូ ជី អាយុ៧៦ឆ្នាំ រងការចោទប្រកាន់ជិត១២ករណី ប៉ុន្តែបានបដិសេធរាល់បទចោទទាំងអស់។ អ្នកគាំទ្រលោកស្រី ស៊ូ ជី និយាយថា ករណីចោទប្រកាន់ចំពោះលោកស្រី ស៊ូ ជី មានហេតុផលនយោបាយ។
ម្ចាស់ជ័យលាភីណូបែលសន្តិភាពរូបនេះ បានដឹកនាំរដ្ឋាភិបាលស៊ីវិលជាប់ឆ្នោត ប៉ុន្តែត្រូវបានបណ្តេញចេញពីអំណាច ក្នុងរដ្ឋប្រហារយោធានាថ្ងៃទី០១ ខែកុម្ភៈ។ លោកស្រីត្រូវបានឃុំខ្លួនដោយមិនឱ្យមានទំនាក់ទំនង ហើយតុលាការបានជំនុំជម្រះទោសលោកស្រីចាប់តាំងពីខែមិថុនាមក ក្នុងសវនាការអសាធារណៈ៕
