loader

សកម្មជន​មាតាធម្មជាតិទទួលពានរង្វាន់ក្រោយពីត្រូវបានដោះលែង

 ​​ក្រោយពីត្រូវបានដោះលែង ក្រុមយុវជន​សកម្មជន​មាតាធម្មជាតិ​ចំនួន០៦រូប​ ត្រូវបាន​អង្គការអន្តរជាតិ​មួយដែលមានមូលដ្ឋាននៅប្រទេសអៀកឡង់ឈ្មោះ ហ្រ្វាន់ឡាញ​ ​ឌីហ្វិនឌឺ​ (​Frontline​ ​Defenders) ​ ផ្តល់​ពានរង្វាន់ដល់ពួកគេជា “អ្នកការពារឈានមុខ”​ ដើម្បីជាការលើកទឹកចិត្តនៃភាពអង់អាចក្លាហាន ​ហ៊ាន​ប្រថុយ​គ្រោះថ្នាក់​ ក្នុងការការពារ​បរិស្ថាន​​និង​ធនធានធម្មជាតិប្រទេសកម្ពុជា​ ខណ:កន្លងមកសកម្មភាពរបស់ពួកគេមិនត្រូវបានទទួលស្គាល់ពីរាជរដ្ឋាភិបាល។

ភ្នំពេញ៖ យុវជន ថុន រដ្ឋា​, ភួន កែវរស្មី, ​ ឡុង គន្ធា​ , យីម លាងហ៊ី​, លី ចន្រ្ទដារ៉ាវុធ​ និងស៊ុន រដ្ឋា​ ពួកគេ០៦នាក់ជាក្រុមយុវជនសកម្មជនមាតាធម្មជាតិ ដែលកន្លងបានធ្វើសកម្មភាពកន្លងមកពាក់ព័ន្ធការការពារសិទ្ធមនុស្ស ​ធនធាន​ធម្មជាតិ​ និងបរិស្ថាន​តាមរយ:ការបញ្ចេញមតិពីបញ្ហាសំរាម លូទឹកស្អុយ និងបញ្ហាផ្សេងទៀតដែលកើតឡើងក្នុងប្រទេសកម្ពុជា។

សកម្មជនទាំងនេះត្រូវបានអាជ្ញាធរចាប់ខ្លួនកាលពីអំឡងខែ មិថុនា ឆ្នាំ២០២១ ក្រោយពីរដ្ឋាភិបាលកម្ពុជាឃើញភស្តុតាងថា ពួកគេមានអង្គការចាត់តាំងខុសច្បាប់ពីក្រៅប្រទេស ប្រើប្រាស់ហិរញ្ញប្បទានភេវកម្ម និងធ្វើសកម្មភាពបំបែកបំបាក់ជាតិ ហើយ​អាជ្ញាធរបានចោទប្រកាន់ពួកគេក្រោមបទចោទ «​ញុះញង់​បង្កឱ្យមានភាពវឹកវរធ្ងន់ធ្ងរ​ដល់​សន្តិសុខ​សង្គម» បទ «រួមគំនិតក្បត់» និងបទ «ប្រមាថអង្គព្រះមហាក្សត្រ»។ យ៉ាងណាមិញ សកម្មជនទាំងនេះត្រូវបានអាជ្ញាធរដោះលែង ឱ្យនៅក្រៅឃុំបណ្ដោះអាសន្នវិញហើយកាលពីថ្ងៃទី១២ ខែវិច្ឆិកា ឆ្នាំ២០២១ខណ:ការដោះលែងនេះ អ្នកខ្លះបានអនុវត្តទោសចប់តាមការកំណត់របស់តុលាការ ហើយអ្នកខ្លះទៀតត្រូវបានដោះលែងនៅក្រៅឃុំបណ្ដោះអាសន្ន ដោយទោសនៅសល់ត្រូវព្យួរសាកល្បងប៉ុណ្ណោះ។

ដើម្បីជាការលើកទឹកចិត្ត នៃភាពអង់អាចក្លាហាន ​ហ៊ាន​ប្រថុយ​គ្រោះថ្នាក់​របស់ពួកគេ ក្នុងការការពារ​បរិស្ថាន​​និង​ធនធានធម្មជាតិ​ក្រោយពីពួកគេត្រូវបានដោះលែង ​អង្គការអន្តរជាតិមួយឈ្មោះហ្រ្វាន់ឡាញ​ ​ឌីហ្វិនឌឺ​ (​Frontline​ ​Defenders) ដែលជាអង្គការបង្កើតឡើងដើម្បី​ទទួលស្គាល់​កិច្ចការ​របស់​សកម្មជន​បរិស្ថាន​ ​សង្គម​ ​និង​សិទ្ធិមនុស្ស​ ​ដែល​ក្លាហាន​​ហ៊ាន​ចូលរួម​សកម្មភាព​លើក​កម្ពស់ ​និង​ការពារ​បរិស្ថាន​ ​ធនធានធម្មជាតិ​ ​និង​សិទ្ធិមនុស្សនៅប្រទេសរបស់ខ្លួន បានផ្ដល់ពានរង្វាន់ “Frontline​ Award” ឬជាភាសាខ្មែរហៅថាពានរង្វាន់ “ អ្នកការពារឈានមុខ ”  ដល់ពួកគេ។

ពានរង្វាន់ “អ្នកការពារឈានមុខ” ត្រូវបានប្រគល់ជូនសកម្មជនកម្ពុជា​ទាំង០៦ នាក់កាលពីថ្ងៃទី២៤ ខែវិច្ឆិកា នៅទីក្រុង Dublin ប្រទេសអៀកឡង់។ ពានរង្វាន់​​ដែលសកម្មជនចលនាមាតាធម្មជាតិទទួលបាន បានបង្ហាញពីការលើកទឹកចិត្តដល់ពួកគេ ​និង​យុវជន​ដទៃ​ឱ្យបន្ត​សកម្មភាពការពារ​បរិស្ថាន​និង​ធនធានធម្មជាតិ​​កាន់តែ​ខ្លាំងជាងមុនបន្ថែមទៀត​ទោះបី​ជាការងារ​នេះប្រឈមហានិភ័យចំពោះអាយុជីវិតពួកគេយ៉ាងណាក៏ដោយ។

កញ្ញា ភួន កែវរស្មី​ យុវតីម្នាក់​ ក្នុងចំណោម​យុវជន០៦នាក់​ នៃសកម្មជន​មាតាធម្មជាតិ​ បានថ្លែង​ប្រាប់សារព័ត៌មាន VOD ថា ចំពោះពានរង្វាន់ដែលទទួលបាន គឺមានពានមួយ និងថវិកាចំនួន៥០០០អឺរ៉ូ ឬស្មើនឹងជាង៥០០០ដុល្លារ។  ​​ផ្អែកតាមសម្ដីសកម្មជនរូបនេះ ថវិកាដែលពួកគេទទួលបាន នឹងយកទៅធ្វើការងារទាក់ទងនឹងបរិស្ថានបន្តទៀត ​​។

នាយិកាប្រតិបត្តិមជ្ឈមណ្ឌលសិទ្ធិមនុស្សកម្ពុជា លោកស្រី ចក់ សុភាព សាទរចំពោះការទទួលបានពានរង្វាន់របស់សកម្មជនបរិស្ថាន។ តែលោកស្រីយល់ថា ការអនុវត្ត​ច្បាប់របស់កម្ពុជា​បានដើរផ្ទុយពីរដ្ឋធម្មនុញ្ញនិងកតិកាសញ្ញាអន្តរជាតិ ដែលរដ្ឋាភិបាលមានកាតព្វកិច្ចការពារនិងធានាតុល្យភាពទាំងអស់នេះ រួមទាំងច្បាប់ស្ដីពីការការពារបរិស្ថានដែលបានលើកកម្ពស់ឱ្យមានការចូលរួមរបស់ប្រជាពលរដ្ឋ​។​

ទោះជាយ៉ាងណា រដ្ឋលេខាធិកាក្រសួងបរិស្ថានឯកឧត្ដមនេត ភក្ត្រា ចាត់ទុកការផ្ដល់ និង ទទួលពានរង្វាន់របស់សកម្មជនមាតាធម្មជាតិ នាពេលថ្មីៗនេះថា ជាលើកតម្កើងជនល្មើសឱ្យប្រព្រឹត្តិបទល្មើស​បំបែកបំបាក់ជាតិ និងបង្ហាញចេតនានយោបាយយ៉ាងពិតប្រាកដរបស់ពួកគេតាមរយ:សកម្មភាពជ្រកក្រោមស្លាកបរិស្ថាន។

អ្នករាយការណ៍​ពិសេស​របស់​អង្គការសហប្រជាជាតិ​ ទទួលបន្ទុក​ផ្នែក​សិទ្ធិមនុស្ស​ប្រចាំ​នៅ​កម្ពុជា​ លោក​ វិទិត​ ​មុនតា​ប៊ន ​(​Vitit​ ​Muntarbhorn​) ​បានសរសេរ​នៅ​លើ​ទំព័រ​ហ្វេសប៊ុក​លោកនៅថ្ងៃទី២៤ ខែវិច្ឆិកា ឆ្នាំ២០២១ ថា​ការ​ការពារ​បរិស្ថាន​ជា​តម្រូវ​ការ​ដ៏​ចាំបាច់​បំផុត​មួយ​​នៅ​ក្នុង​ពិភពលោក​នា​ពេល​បច្ចុប្បន្ននេះ​ ​ដែល​ត្រូវ​បាន​ទទួលស្គាល់​កាលពី​ខែមុន​។ លោក​បន្ត​ថា​ ការ​ការពារ​បរិស្ថាន​មាន​ទំនាក់ទំនង​គ្នា​យ៉ាង​ជិតស្និទ្ធ​ទៅ​នឹង​ការ​អំពាវនាវ​ឱ្យ​មាន​សន្តិភាព​ ​សិទ្ធិមនុស្ស​ ​ប្រជាធិបតេយ្យ​ ​និង​ការ​អភិវឌ្ឍ​ប្រកបដោយ​ចីរភាពផងដែរ​។​ លោកបានអំពាវនាវឱ្យរដ្ឋាភិបាល និងតុលាការទម្លាក់ការចោទប្រកាន់ទាំងស្រុងប្រឆាំងនឹងពួកគេដោយថា ទោះស្ថិតនៅក្នុងកាលៈទេសៈណាក៏ដោយ សកម្មភាពសន្តិភាពមិនគួរត្រូវបានដាក់ទោសទណ្ឌឡើយ៕

0 0 votes
Article Rating
guest
0 Comments
Inline Feedbacks
View all comments

ព័ត៌មានទាក់ទង

ក្រសួងកសិកម្មដាក់ការរំពឹងលើការវិនិយោគកែច្នៃដំណាំចន្ទីពីក្រុមហ៊ុនជប៉ុន

ក្រសួងកសិកម្ម រុក្ខាប្រមាញ់ និងនេសាទ ដាក់ការរ[...]

ក្រុមសហជីពចាត់ទុកការចាប់ខ្លួនបុគ្គលិកណាហ្គាវើលដ៍ជាគ្រោះថ្នាក់ដល់សិទ្ធិសេរីភាពកម្មករ

ភ្នំពេញ៖ ក្រុមប្រឹក្សាសហភាពសហជីពអន្តរជាតិប្រច[...]

កូដករណាហ្គាវើលដ៍សាទរសារសម្តេច ស ខេង តែការចរចាកើតឡើងលុះត្រាតំណាងត្រូវដោះលែង

កូដករក្រុមហ៊ុនណាហ្គាវើលដ៍សាទរចំពោះសាររបស់សម្ត[...]

ព័ត៏មានថ្មី

វីដេអូថ្មីបំផុត

0
Would love your thoughts, please comment.x
()
x