នៅថ្ងៃទី១៨ ដល់ថ្ងៃទី២០ ខែវិច្ឆិកា ឆ្នាំ២០២១ ខាងមុខ គឺជាព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ប្រជាជនកម្ពុជាបានទទួលការឈប់សម្រាករយៈពេល៣ថ្ងៃ អ្នកខ្លះត្រៀម ដំណើរកម្សាន្ដទៅកាន់គោលដៅទេសចរណ៍នានា មិនថាតំបន់សមុទ្រ តំបន់ព្រៃភ្នំ និងតំបន់វប្បធម៌ ជាដើម តែអ្នកខ្លះក៏បានឱ្យដឹងថាមិនមានគម្រោងទៅណាទេ ដោយសារបញ្ហាហិរញ្ញវត្ថុ។
កញ្ញា តឹប កុម្ភៈ បុគ្គលិកក្រុមហ៊ុនឯកជនមួយកន្លែង បានប្រាប់វិទ្យុស្ដ្រីថា ក្នុងអំឡុងពេលឈប់ សម្រាកពិធីបុណ្យអុំទូក កញ្ញាមានបំណង២ អាចទៅស្រុកកំណើត និងអាចទៅទស្សនាតំបន់វប្បធម៌ នៃខេត្តសៀមរាប តែកញ្ញាក៏បញ្ជាក់ថា អាស្រ័យលើស្ថានភាពនៅថ្ងៃឈប់មកដល់ដែរ។ មិនខុសពីនេះ លោក ណែម ប៉ាវ ជាបុគ្គលិកផ្នែកបច្ចេកវិទ្យានៃក្រុមហ៊ុនឯកជនមួយក៏បានប្រាប់វិទ្យុស្ដ្រីដែលថា លោកអាចទៅស្រុកកំណើត ដើម្បីជួយការងាអ្នកផ្ទះ។ ដោយឡែកលោកស្រី ណែម លីនដា ជាពាណិជ្ជករម្នាក់ប្រាប់ថា លោកស្រីមិនទាន់មានគម្រោងដើរកម្សាន្ដទេក្នុងអំឡុងពេលឈប់សម្រាក អុំទូកនេះ ហើយចំពោះ ប្រជាជនជាច្រើនទៀតដែលវិទ្យុស្ដ្រីបានសុំសម្ភាសន៍ភាគច្រើនបានឆ្លើយតបថា អាចមានដំណើរកម្សាន្ដជិតផ្ទះតិចតួច ក្នុងរាជធានីភ្នំពេញ ព្រោះជាថ្ងៃឈប់សម្រាក ណាមួយ ការរកចំណូលក្នុងអំឡុងកូវីដ១៩ មិនមានភាពល្អប្រសើរឡើងនោះទេ ទើបមិនអាចដើរកម្សាន្ត ទីឆ្ងាយបានច្រើន។
សូមជម្រាបថា ព្រះរាជពិធីបុណ្យអុំទូក ជាពិធីបុណ្យជាតិដ៏ធំមួយ ហើយសម្រាប់ឆ្នាំនេះ ត្រូវបានផ្អាកម្ដងទៀត ដោយហេតុផលនៃការឆ្លងរាលដាលនៃជំងឺកូវីដ១៩ ។ នេះបើតាមការលើក ឡើងរបស់សម្ដេច ស ខេង កាលពីថ្ងៃទី១១ ខែ តុលា ឆ្នាំ២០២១ នៅពេលចូលរួមកម្មវិធី ចូលកាន់តំណែងអភិបាលខេត្តបាត់ដំបង ដោយសម្ដេចបានបន្ដឱ្យដឹងបន្ថែមថា ដោយហេតុផលនេះតម្រូវឱ្យពលរដ្ឋគ្រប់រូបត្រូវចេះរស់នៅជាមួយស្ថានភាពរក្សាគម្លាត អនាម័យ តាមគន្លងប្រក្រតីភាពថ្មី និងគោរពតាមវិធានសុខាភិបាល និងរដ្ឋាភិបាលដើម្បីទប់ស្កាត់ការចម្លង។ ការអាក់ខានមិនបានរៀបចំពិធីបុណ្យ អុំទូកនេះ មិនមែនជាលើកទី១ទេ សម្រាប់កម្ពុជា គឺក្រោមហេតុផលច្រើនយ៉ាង៕
