អគ្គលេខាធិការរដ្ឋសភា នៅថ្ងៃសុក្រ ទី០៥ ខែវិច្ឆិកា បានឱ្យដឹងថា ឯកឧត្ដម ងួន ញ៉ិល អនុប្រធានទី១នៃរដ្ឋសភា បានទទួលមរណភាពនៅព្រឹកថ្ងៃដដែល ដោយរោគាពាធ ក្នុងជន្មាយុ៧៩ឆ្នាំ។ អនិច្ចកម្មរបស់ឯកឧត្ដម ងួន ញ៉ិល ដែលមានគោរម្យងារ«កិត្តិនីតិកោសលបណ្ឌិត» បានធ្វើឱ្យរដ្ឋសភា«មានសេចក្ដីក្រៀមក្រំ»។ នេះបើយោងតាមសេចក្ដីជូនដំណឹងរបស់ឯកឧត្ដមអគ្គលេខាធិការ ឡេង ប៉េងឡុង។
ឯកឧត្ដម ងួន ញ៉ិល ជាតំណាងរាស្ត្រមណ្ឌលខេត្តកំពង់ធំ មកពីគណបក្សប្រជាជនកម្ពុជាដែលកំពុងកាន់អំណាច។ សម្ដេច ហ៊ុន សែន ដែលជានាយករដ្ឋមន្ត្រី និងជាប្រធានគណបក្សនេះផង បានចេញសាររំលែកទុក្ខចំពោះគ្រួសារសព ដោយអះអាងថា នេះជាការបាត់បង់«ដ៏ធំធេងនូវឥស្សរជននយោបាយខ្មែរដ៏ឆ្នើមមួយរូប ដែលពោរពេញដោយឆន្ទៈ មនសិការក្នុងការបម្រើបុព្វហេតុជាតិ សាសនា ព្រះមហាក្សត្រ គ្រប់កាលៈទេសៈ»។ សម្ដេច ហ៊ុន សែន ថែមទាំងបានថ្លែងទៀតថា ឯកឧត្ដម ងួន ញ៉ិល «បានរួមចំណែកយ៉ាងសកម្ម ក្នុងការលើកកម្ពស់តម្លៃនីតិរដ្ឋ ប្រកបដោយឧត្ដមគតិខ្ពង់ខ្ពស់ជាអនេកប្បការ»។
គេនៅចាំបានថា នាដើមនីតិកាលទី៥នៃរដ្ឋសភា ឯកឧត្ដម ងួន ញ៉ិល បានធ្វើឱ្យសាធារណៈជនមានការហួសចិត្តជាខ្លាំង។ កាលនោះ ឯកឧត្ដមបានអង្គុយក្រាញនៅនឹងកៅអីអនុប្រធានទី១នៃរដ្ឋសភា មិនព្រមប្រគល់ជូនឯកឧត្ដម កឹម សុខា អនុប្រធានគណបក្សសង្គ្រោះជាតិ ដែលត្រូវអង្គុយកៅអីនោះទេ បន្ទាប់ពីការបោះឆ្នោតជ្រើសតាំងតំណាងរាស្ត្រឆ្នាំ២០១៣។ រហូតទាល់តែសម្ដេច ហ៊ុន សែន ថ្លែងណែនាំចំៗ ទៅកាន់ឯកឧត្ដម ងួន ញ៉ិល ទើបបញ្ហាដណ្ដើមកៅអីអនុប្រធានទី១នៃរដ្ឋសភានាពេលនោះ ត្រូវបានដោះស្រាយ៕
