ភ្នំពេញ៖ ស្រ្តីកូនខ្មែរមួយរូបគឺអ្នកស្រី សៀង ម៉ាលីណែត ជាអ្នកជួសជុលប្រាសាទបុរាណមានបទពិសោធន៍ផ្សំសារធាតុ និងលាយបាយអ រយៈពេល២០ឆ្នាំមកហើយ។ នេះបើតាមទំព័រហ្វេសប៊ុករបស់អាជ្ញាធរជាតិអប្សរាកាលពីថ្ងៃទី០២ វិច្ឆិកាឆ្នាំ២០២១។
ស្រី្តយុវ ៣៧ឆ្នាំរូបនេះ រស់នៅភូមិឪឡោក ស្រុកប្រាសាទបាគង ខេត្តសៀមរាប។ អ្នកស្រី ម៉ាលីណែត ចេះជំនាញផ្សំសារធាតុ និងលាយបាយអ ពីជីតានិងពីអ្នកជំនាញអាជ្ញាធរជាតិអប្សរា។ បើតាមអាជ្ញាធរជាតិអប្សរាក្រៅពីអ្នកស្រី ម៉ាលីណែត ក៏មានស្រ្តីមួយចំនួនទៀតដែរ ដែលមានជំនាញធ្វើផ្សំកំបោរបាយអនេះ។
អ្នកស្រីឱ្យដឹងថា អ្នកស្រីស្រឡាញ់ជំនាញផ្សំសារធាតុ និងលាយបាយអតាមរូបមន្តបុរាណខ្មែរនេះខ្លាំងណាស់ ហើយចង់បន្តបង្រៀនជំនាញនេះទៅអ្នកជំនាន់ក្រោយ ដើម្បីកុំឱ្យបាត់បង់កេរិ៍ដំណែលដ៏វិសេសមួយនេះ។
សារធាតុសំខាន់ៗដែលអាចយកមកផ្សំធ្វើជាបាយអបានបច្ចុប្បន្ននេះ គឺងាយរកបំផុតនៅតាមផ្ទះ ដូចជា កំបោរធ្វើពីសំបកលៀស កម្ទេចឥដ្ឋ ដីខ្សាច់ ស្ករត្នោត ធ្យូង និងកាវស្បែកគោជាដើម។ បច្ចុប្បន្ន ការជួសជុលប្រាសាទបុរាណដែលធ្វើពីឥដ្ឋឡើងវិញ ត្រូវការកំបោរបាយអជាចាំបាច់ដើម្បីបៀកបិទដុំឥដ្ឋឱ្យខាំជាប់គ្នាល្អ៕
