(ភ្នំពេញ)៖ ក្នុងដំណើរផ្លាស់ប្តូរវេណកម្លាំងចាស់ដែលបានបញ្ចប់បេសកកម្មរយៈពេលមួយឆ្នាំក្នុងក្របខ័ណ្ឌអង្គការសហប្រជាជាតិ កងទ័ពមួកខៀវកម្ពុជា ៧៣នាក់ ក្នុងនោះនារី ៣៤ នាក់ នឹងចេញដំណើរទៅប្រទេសស៊ូដង់ខាងត្បូង។
តាមការឱ្យដឹងពីសំណាក់ ឯកឧត្តម សែម សុវណ្ណនី អនុប្រធានគណៈកម្មាធិការជាតិ និងជាអគ្គនាយមជ្ឈមណ្ឌលជាតិរក្សាសន្តិភាព នាថ្ងៃពុធ ទី២៧ ខែតុលា ដំណើរការផ្លាស់ប្ដូរនេះ កងរាជអាវុធហត្ថលេខ៧៣៩ ដែលជាកងកម្លាំងមានក្រុមមនុស្សចំនួន៧៣ នាក់ នារី ៣៤ នាក់ ជាអ្នកចេញទៅបំពេញបេសកកម្មរក្សាសន្តិភាពបន្ត ក្រោយធ្វើការហ្វឹកហាត់ជំនាញអស់រយៈពេលបីខែ និងគ្រោងចេញដំណើរនៅល្ងាចថ្ងៃទី២៨ ខែតុលា ឆ្នាំ២០២១តាមជើងយន្តហោះរបស់ អង្គការសហប្រជាជាតិ ។
គិតចាប់តាំងពីឆ្នាំ២០០៦ មកត្រឹមឆ្នាំ២០២០ កម្ពុជាបានបញ្ជូនកងកម្លាំងរក្សាសន្តិភាពជានារី ចំនួន៤១៩ នាក់ ក្នុងចំណោម ៧ ១២៣នាក់ ទៅចូលរួមបំពេញ បេសកកម្មអង្គការសហប្រជាជាតិ ក្នុងប្រទេសចំនួន៩។ តាមការវាយតម្លៃចុងក្រោយពី អង្គការនេះ នារីមួកខៀវកម្ពុជា បន្តរក្សាចំណាត់ថ្នាក់លេខ២ ក្នុងសហគមន៍ អាស៊ានទាំង១០ប្រទេស។
នេះ សឱ្យឃើញពីការលះបង់យ៉ាងធំធេងចំពោះជាតិកម្ពុជា និងជាមោទនភាពមួយសម្រាប់ស្ត្រីក្នុងតំណែងជាអ្នកដឹកនាំ ការចូលរួមបំពេញបេសកកម្មយ៉ាងស្វិតស្វាញនៅលើឆាកអន្តរជាតិមួយនេះ៕
