ព្រះនាង ម៉ាកូ ដែលត្រូវជាភាគិនេយ្យាឬក្មួយស្រីរបស់ព្រះចៅអធិរាជជប៉ុន បានរៀបអភិសេកជាមួយរាស្ត្រដែលជាសង្សារបស់ព្រះនាងកាលនៅមហាវិទ្យាល័យហើយនៅថ្ងៃអង្គារ បន្ទាប់មកព្រះនាងបានចាកចេញពីគ្រួសាររាជវង្ស។
ទីភ្នាក់ងារសារព័ត៌មានរើយធើ នៅថ្ងៃទី ២៦ ខែតុលា រាយការណ៍ឱ្យដឹងថា ព្រះនាង ម៉ាកូ ដែលត្រូវជាភាគិនេយ្យាឬក្មួយស្រីរបស់ព្រះចៅអធិរាជជប៉ុន បានរៀបអភិសេកជាមួយរាស្ត្រដែលជាសង្សារបស់ព្រះនាងកាលនៅមហាវិទ្យាល័យហើយនៅថ្ងៃអង្គារដដែល បន្ទាប់មកព្រះនាងបានចាកចេញពីគ្រួសាររាជវង្ស។
បើតាមរើយធើ ព្រះរាជពិធីអាពាហ៍ពិពាហ៍នេះបានកើតឡើងបន្ទាប់ពីមានការភ្ជាប់ពាក្យដែលមានការរំខានអស់រយៈពេលជាច្រើនឆ្នាំដោយសារការពិនិត្យពិច័យ ដែលបានធ្វើឱ្យព្រះនាងមានវិបត្តិផ្លូវចិត្ត។ រើយធើលម្អិតថា ព្រះនាង ម៉ាកូ និងគូដណ្តឹងឈ្មោះ កេអ៊ី កូមូរ៉ូ ដែលស្ថិតក្នុងវ័យដំណាលគ្នា គឺ ៣០ ឆ្នាំ បានប្រកាសភ្ជាប់ពាក្យកាលពី ៤ ឆ្នាំមុន ដែលជាដំណើរមួយដែលពីដំបូងបានធ្វើឱ្យប្រទេសជប៉ុនអបអរសាទរ។ ប៉ុន្តែអ្វីៗបានប្រែជាជូរចត់ទៅវិញ នៅពេលដែលសារព័ត៌មានបានរាយការណ៍រឿងអាស្រូវហិរញ្ញវត្ថុ ដែលពាក់ព័ន្ធនឹងម្តាយរបស់លោក កូមូរ៉ូ ជាហេតុនាំឱ្យសារព័ត៌មានបើកការស៊ើបអង្កេតលើរូបគាត់វិញ។ រើយធើបន្តថា អាពាហ៍ពិពាហ៍ត្រូវបានពន្យារពេល ហើយលោក កូមូរ៉ូ បានចាកចេញពីប្រទេសជប៉ុន ដើម្បីទៅសិក្សាផ្នែកច្បាប់នៅទីក្រុងញូវយកក្នុងឆ្នាំ ២០១៨ ហើយទើបត្រលប់មកជប៉ុនវិញកាលពីខែកញ្ញា ឆ្នាំ ២០២១ នេះ។
យោងតាមរើយធើ អាពាហ៍ពិពាហ៍របស់គូស្វាមីភរិយានេះមានមន្ត្រីម្នាក់មកពីទីភ្នាក់ងារគ្រួសារអធិរាជ ដែលជាទីភ្នាក់ងារចាត់ចែងជីវិតគ្រួសាររាជវង្ស ហើយមន្ត្រីនោះបានបញ្ជូនលិខិតស្នាមពាក់ព័ន្ធទៅការិយាល័យមួយនៅមូលដ្ឋាននាពេលព្រឹក ដោយមិនបានធ្វើកិច្ចសាសនានិងពិធីជាច្រើន ដែលមង្គលការរបស់រាជវង្សត្រូវប្រតិបត្តិ រួមទាំងពិធីទទួលភ្ញៀវផងក៏មិនបានរៀបចំដែរ។
ព្រះនាង ម៉ាកូ ក៏បានបដិសេធប្រាក់ចំណងដៃប្រហែល ១,៣ លានដុល្លារ ដែលជាធម្មតាថ្វាយចំពោះក្សត្រិយ៍ ដែលរៀបការជាមួយរាស្ត្រ និងក្លាយទៅជាពលរដ្ឋសាមញ្ញ ស្របតាមច្បាប់របស់ប្រទេសជប៉ុន។ រើយធើ រំលេចឱ្យដឹងដូច្នេះ៕
