(បន្ទាយមានជ័យ)៖ ស្នងការនគរបាលខេត្តបន្ទាយមានជ័យ កាលពីថ្ងៃអាទិត្យ ទី២៤ ខែ តុលា ឆ្នាំ២០២១ បានបញ្ជូនមេខ្យល់ប្រុសស្រីចំនួនបួននាក់ទៅតុលាការ ករណីនាំពលករប្រមាណ១៣ នាក់ ក្នុងនោះមានទាំងកុមារម្នាក់ផង ឆ្លងដែនដោយខុសច្បាប់ទៅប្រទេសថៃ។

ពលករយ៉ាងហោចណាស់ ១៣នាក់  ក្នុងនោះមានទាំងកុមារម្នាក់ផង ត្រូវបានមេខ្យល់ប្រុសស្រីចំនួន០៤ នាក់ នាំឆ្លងដែនទៅថៃ និងថាបានយកប្រាក់ក្នុង១នាក់ ២៥០០បាត ជាថ្នូរថ្លៃនាំផ្លូវ។  មេខ្យល់ទាំងបួននាក់ត្រូវបានគេស្គាល់មានឈ្មោះ ចាន់ រស្មី  ភេទស្រីអាយុ៤១ ឆ្នាំ, ប្រម វិន័យ ភេទស្រី អាយុ២៦​ឆ្នាំ, សួន ម៉ាង ភេទប្រុស អាយុ៣៩ ឆ្នាំ និងចំរើន ធារ: ភេទប្រុស អាយុ៤៣ ឆ្នាំ ពួកគេ​ត្រូវបានស្នងការនគរបាលខេត្តបន្ទាយមានជ័យ ឃាត់ខ្លួននៅថ្ងៃទី២៣ ខែតុលា ឆ្នាំ២០២១ និងបញ្ជូនទៅតុលានៅថ្ងៃបន្ទាប់ ។ មេខ្យល់ទាំងនេះបានដឹកជញ្ជូនពលករតាមរថយន្តនិងម៉ូតូ នៅច្រកបឹងព្រីង ក្នុងភូមិថ្នល់បំបបែក ឃុំគោករមៀត ស្រុកថ្មពួក។

លោកស្រីឌី សជាតិ ស្នងការរងផែនការងារប្រឆាំងការជួញដូរមនុស្សនិងយេនឌ័បានបញ្ជាក់ថា បច្ចុប្បន្នមេខ្យល់ប្រុសស្រីទាំង៤នាក់ ត្រូវបានឃាត់ខ្លួនបញ្ជូនទៅតុលាការចាត់ការតាមច្បាប់ និងបានតម្រូវឲ្យមេខ្យល់ប្រគល់ប្រាក់ជូនពលករទាំងអស់វិញ។ ដោយឡែកពលករទាំង១៣នាក់ ក្នុងនោះមានកុមារម្នាក់ផងត្រូវបានសមត្ថកិច្ចបញ្ជូនទៅធ្វើចត្តាឡីស័កនៅមណ្ឌលព្យបាលកូវីដ១៩ ក្នុងក្រុងសិរីសោភ័ណ៕

រូបភាពពី ការពិត GCNP