លោក ទួន យ៉ក់ដា សមាជិកគណៈកម្មការទី៧ រដ្ឋសភាមកពីគណបក្សសង្គ្រោះជាតិ បានប្រាប់វិទ្យុស្ត្រី នៃWMC នៅថ្ងៃទី០៦ខែវិច្ឆិកានេះថា លោកសាទរចំពោះសេចក្តីសម្រេចរបស់ក្រសួងដែនដីបានចេញលិខិតឱ្យផ្អាកសំណង់ និងរុះរើសំណង់របស់ក្រុមហ៊ុនណាហ្គាវើល។ ប៉ុន្តែលោកក៏ ស្នើសុំឲ្យក្រសួងដែនដី នគរូបនីយកម្មនិងសំណង់ ពិនិត្យពិចារណាឡើងវិញ ចំពោះការអនុញ្ញតឲ្យក្រុមហ៊ុនមួយចំនួនអាចសង់អគារខ្ពស់ៗក្បែរវិមានរដ្ឋសភាកម្ពុជា ដែលជាហេតុនាំឲ្យបាត់បង់សោភ័ណ្ឌភាពអគាររដ្ឋសភា។
សមាជិកគណកម្មការទី៧រដ្ឋ សម្តែងការសាទរចំពោះចំណាត់ការរបស់ក្រសួងដែនដី នគរូបនីយកម្មនិងសំណង់ ដែលបានសម្រេចឲ្យក្រុមហ៊ុនណាហ្គាវើលរុះរើជាបន្ទាន់ បន្ទាប់ពីក្រុមហ៊ុនមួយនេះធ្វើការសាងសង់ខុសពីច្បាប់អនុញ្ញាត។
លោក ទួន យ៉ក់ដា សមាជិកគណៈកម្មការទី៧នៃរដ្ឋសភា និយាយថា លោករីករាយ និងសាទរចំពោះវិធានការរបស់ក្រសួងដែនដី ដែលផ្អាកការសាងសង់របស់ក្រុមហ៊ុនណាហ្គា វើល និងរុះរើសំណង់ដែលនៅជាប់វិទ្យាស្ថានពុទ្ធសាសនបណ្ឌិត្យចេញ។ តែទោះបីជាយ៉ាងនេះក្តី លោកក៏ស្នើសុំឲ្យក្រសួងដែនដីនគរូបនីយកម្ម ត្រូវតែពិនិត្យឡើងវិញ ដោយមិនត្រូវឲ្យមានសំណង់អគារខ្ពស់ៗនៅជុំវិញវិមារដ្ឋសភាឡើយ ព្រោះនាំឲ្យបាត់បង់សោភ័ណ្ឌភាព និងរចនាបទរបស់រដ្ឋសភាព។ លោក ទួន យ៉ក់ដា៖ «ខ្ញុំគាំទ្រដែលឲ្យរើ ព្រោះធ្វើឲ្យខូចរចនាបទខ្មែរ។ ពេលណាដែលសំនង់ហ្នឹងកាន់តែច្រើនទៅ ឥឡូវឃើញសំណង់ខ្ពស់ៗព័ន្ធជុំវិញអាគាររដ្ឋសភាហ្នឹង អញ្ចឹងថ្ងៃណាមួយបើសំណង់សង់ជុំវិញអស់គេទៅជាវាយតំលៃថា អាគាររដ្ឋសភាថ្លៃថោកជាង អញ្ចឹងត្រូវធ្វើម៉េចវ៉ៃរចនាបទខ្មែរចោល។ អាហ្នឹង!ក្រសួងដែនដីនគរូបនីយកម្មត្រូវចាប់ផ្តើមគិតហើយ»។
ឆ្លើយតបទៅសំណើនេះ លោក ឆាយ រឹទ្ធីសែន អគ្គនាយកដ្ឋាននរគរូបនីយកម្ម លើកឡើងថា លោកមិនអាចឆ្លើយតបបាននោះទេនៅពេលនេះ ព្រោះនៅមិនទាន់មានសណើផ្លូវការណ៍ណាមួយដាក់ចូលមកក្រសួងនៅឡើយនោះទេ។ លោក ឆាយ រឹទ្ធីសែន៖ «មិនមានលិខិតអ្វីផ្លូវការណ៍ផងហ្នឹង! បើសិនជាគាត់ស្នើគណៈកម្មការទី៧ ឲ្យស្នើមកក្រសួងដែនដីមក ទើបយើងមានមូលហេតុធ្វើការដោះស្រាយ»។
សូមរំលឹកថា វិធានការនេះធ្វើឡើងក្រោយពេលលោក ហ៊ុន សែន កាលពីព្រឹកថ្ងៃព្រហស្បតិ៍ បានចុះទៅពិនិត្យមើលសំណង់ក្រុមហ៊ុនណាហ្គាវើល និងណែនាំឲ្យអាជ្ញាធរមានសមត្ថកិច្ចពិភាក្សាចាត់វិធានការកែលម្អឡើងវិញនូវសំណង់អគារ ដោយលើកឡើងថា សំណង់នោះប៉ះពាល់ដល់សោភ័ណភាពរាជធានី។ ភ្លាមៗបន្ទាប់ពីការបញ្ជារបស់លោកនាយករដ្ឋមន្ត្រី ហ៊ុន សែន លោក អ៊ឹម ឈុនលឹម រដ្ឋមន្ត្រីក្រសួងរៀបចំដែនដី និងលោក ប៉ា សុជាតិវង្ស អភិបាលរាជធានីភ្នំពេញ បានប្រជុំបន្ទាន់មួយពាក់ព័ន្ធនឹងសំណង់ណាហ្គាវើល កាលពីថ្ងៃព្រហស្បតិ៍ ឲ្យត្រួតពិនិត្យឡើងវិញ។ ក្រោយមកក្រសួងក៏បានចេញលិខិតឲ្យផ្អាកសំណង់និងរុះរើសំណង់នោះតែម្តង។
