ភ្នំពេញ៖សម្តេចនាយករដ្ឋមន្រ្តី ហ៊ុន សែន បានបង្ហាញគំនិតផ្តួចផ្តើមត្រៀមបើកប្រទេសឡើងវិញ ខណៈរដ្ឋាភិបាលបានត្រៀមយុទ្ធសាស្រ្តមួយចំនួនដែលអាចទប់ស្កាត់អត្រានៃការស្លាប់ដោយសារជំងឺកូវីដ-១៩បាន។ នេះជាសារសំឡេងរបស់សម្តេច ហ៊ុន សែន បង្ហោះលើទំព័រហ្វេសប៊ុកនៅថ្ងៃទី១៩ ខែតុលាឆ្នាំ២០២១នេះ។ អ្នកតាមដានផ្នែកសង្គមសាទរចំពោះដំណឹងនេះ តែព្រួយបារម្ភពីការផ្ទុះឡើងវិញបើសិនមិនបានអនុវត្តវិធានការការពារឱ្យបានតឹងរឹង។
លោក កែវ សុខា រាយការណ៍ពីព័ត៌មាននេះ
មានលក្ខខណ្ឌដែលអាចទៅរួមមួយចំនួនដែលនាំឱ្យសម្តេច ហ៊ុន សែន នាយករដ្ឋមន្រ្តីនៃកម្ពុជាផ្តួចផ្តើមគំនិតចង់បើកប្រទេសឡើងវិញតាមរយៈសាររបស់សម្តេចនៅថ្ងៃនេះ។ លក្ខខណ្ឌទាំងនោះដោយសម្តេច ហ៊ុន សែន មើលឃើញថា ប្រជាជនបានចាក់វ៉ាក់សាំងប្រឆាំងជំងឺកូវីដ១៩ សម្រេចបានជាង៨៥%នៃប្រជាជនសរុប ដែលប្រការនេះអាចធានាអត្រានៃការស្លាប់ និងធ្លាក់ខ្លួនឈឺធ្ងន់ធ្ងរដោយសារជំងឺនេះ។
ជាគម្រោងរបស់នាយករដ្ឋមន្រ្តី សម្តេចគ្រោងយកវ៉ាក់សាំងចាក់ជូនពលរដ្ឋដល់ខ្នងផ្ទះតែម្តង ដែលសម្តេចអះអាងថា វ៉ាក់សាំងមានគ្រប់គ្រាន់សម្រាប់ប្រជាពលរដ្ឋ។
សម្រាប់នាយករដ្ឋមន្រ្តី ការទទួលបានការចាក់វ៉ាក់សាំងកូវីដ១៩ គ្រប់ចំនួនអាចជួយកាត់បន្ថយអត្រានៃការស្លាប់ និងឈឺធ្ងន់ ដែលអ្នកជំងឺអាចព្យាបាលដោយខ្លួនឯងបាននៅផ្ទះ។
មួយទៀតដែរ គឺជំនឿចិត្តនិងការពង្រឹងសមត្ថភាពក្រុមគ្រូពេទ្យព្យាបាលអ្នកជំងឺកូវីដ-១៩ នៅតាមបណ្តាលខេត្ត ដែលអាចឆ្លើយតបដោយប្រសិទ្ធភាពលើការព្យាបាលជូនអ្នកជំងឺ។
ប្រសាសន៍របស់សម្តេចនាយករដ្ឋមន្រ្តី
តាមនាយករដ្ឋមន្រ្តី ការឈានទៅបើកប្រទេសឡើងវិញនេះ មានភាពចាំបាច់ដើម្បីបើកដំណើរការសេដ្ឋកិច្ចប្រទេសឡើងវិញ តាមរយៈការបើកដំណើរការវិស័យទេសចរណ៍ ការបើកសាលារៀន ស្របពេលដែលវិស័យកសិកម្ម និងឧស្សាហកម្មបានបើកដំណើរជាធម្មតាហើយនោះ។
លោក យ៉ង់ គឹមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព សាទរចំពោះដំណឹងនៃគម្រោងបើកដំណើរការប្រទេសឡើងវិញនេះ។ តែយ៉ាងណាលោកសម្តែងក្តីព្រួយបារម្ភពីការចម្លងឡើងវិញ បើសិនគ្មានវិធានការណ៍ការពារបានត្រឹមត្រូវទេនោះ។ សម្រាប់លោក យ៉ង់ គឹម អេង ការធានានៃការបើកប្រទេសឡើងវិញ លុះត្រាស្ថានភាពនៃការគ្រប់គ្រងជំងឺកូវីដ១៩ បានល្អប្រសើរ ស្របពេលវ៉ាក់សាំងអាចធានាបង្ការការចម្លងជំងឺនេះបានដោយប្រសិទ្ធភាពខ្ពស់។
សូមស្តាប់ការលើកឡើងបន្ថែមរបស់លោក យ៉ង់ គឺមអេង
ជាការកត់សម្គាល់ គំនិតផ្តួចផ្តើមរបស់នាយករដ្ឋមន្រ្តីឈានទៅបើកប្រទេសឡើងវិញនេះ ស្របពេលដែលប្រជាជនបានចាក់វ៉ាក់សាំងបានជាង ១៣លាននាក់ សម្រេចបាន ៨៥%នៃចំនួនប្រជាជនសរុប ដែលជាចំនួនមួយសម្រេចបានក្នុងកម្រិតខ្ពស់។
តែយ៉ាងណាប្រទេសក្បែរខាងកម្ពុជា ពោលគឺប្រទេសថៃបានផ្ទុះការឆ្លងរីករាលដាលឡើងវិញ បន្ទាប់ពីរដ្ឋាភិបាលប្រទេសមួយនេះ បានបើកអនុញ្ញាតឱ្យមានដំណើរការទេសចរឡើងវិញ៕
