របាយការណ៍ថ្មីមួយរបស់អង្គការយូនីសេហ្វ បានអោយដឹងថា កុមារនៅកម្ពុជាប្រឈមនឹងហានិភ័យខ្ពស់ ដោយសារឥទ្ធិពលនៃវិបត្តិអាកាសធាតុ។ អង្គការអន្តរជាតិនេះបានដាក់កម្ពុជាឱ្យនៅលេខរៀងទី ៤៣ ក្នុងចំណោម ១៦៣ ប្រទេសលើពិភពលោក។ ចំណាត់ថ្នាក់ដ៏ទាបនេះបង្ហាញថា កុមារប្រឈមមុខខ្លាំងចំពោះផលប៉ះពាល់នៃវិបត្តិអាកាសធាតុ។
———
អង្គការយូនីសេហ្វ កាលពីចុងសប្ដាហ៍មុន បានចេញរបាយការណ៍សកលមួយក្រោមចំណងជើងថា «វិបត្តិអាកាសធាតុគឺជាវិបត្តិនៃសិទ្ធិកុមារ៖ សន្ទស្សន៍ហានិភ័យអាកាសធាតុរបស់កុមារ»។ នេះគឺជាការវិភាគគ្រប់ជ្រុងជ្រោយដំបូងបង្អស់មិនធ្លាប់មាន ទាក់ទងនឹងហានិភ័យអាកាសធាតុ តាមរយៈការយល់ឃើញរបស់កុមារ។
ក្នុងនោះប្រទេសកម្ពុជា បានជាប់ចំណាំត់ថ្នាក់លេខ៤៦ ក្នុងចំណោម ១៦៣ ប្រទេសលើពិភពលោក។ ចំណាត់ថ្នាក់ទាបនេះ បង្ហាញថា កុមារនៅក្នុងប្រទេសកម្ពុជាប្រឈមខ្លាំងចំពោះមុខហានិភ័យ ដែលបណ្ដាលមកពីផលប៉ះពាល់នៃវិបត្តិអាកាសធាតុ។
យូនីសេហ្វបានគួសបញ្ជាក់ថា នេះជាលើកទីមួយ ដែលខ្លួនបានដាក់ចំណាត់ថ្នាក់ប្រទេសនានា ទៅតាមកម្រិតនៃការប្រឈម និងភាពងាយរងគ្រោះរបស់កុមារ ដោយសារវិបត្តិអាកាសធាតុ និងបរិស្ថាន។
លោកស្រី ហ្វ័រូហ្គ ហ្វយូហ្សិថ នាយិកាអង្គការយូនីសេហ្វប្រចាំកម្ពុជា បានថ្លែអនៅក្នុងសេចក្ដីប្រកាសព័ត៌មានថា៖ «វិបត្តិអាកាសធាតុគឺជាវិបត្តិសិទ្ធកុមារ ព្រោះថាវិបត្តិនេះបង្កការគំរាមកំហែងដល់គ្រប់ទិដ្ឋភាពទាំងអស់នៃសុខភាព និងសុខុមាលភាពរបស់កុមារ ក្នុងកម្រិតដែលមនុស្សជាតិពុំធ្លាប់ជួបប្រទះកន្លងមក។»
លោកស្រីបន្តថា៖ «បម្រែបម្រួលអាកាសធាតុធ្វើអោយពិភពលោកក្លាយជាកន្លែងកាន់តែមានហានិភ័យ សម្រាប់ការរស់នៅ និងការលូតលាស់ធំធាត់របស់កុមារ។
ដោយឡែក លោក ម៉ាកូល្វីហ្ស៊ី ក័រហ្ស៊ី (Marcoluigi Corsi) នាយកស្ដីទីប្រចាំតំបន់របស់យូនីសេហ្វ បានអោយដឹងថា កុមារ នៅតាមប្រទេសក្នុងតំបន់អាស៊ីបូព៌ា និងអាស៊ីប៉ាស៊ីហ្វិក កំពុងស្ថិតនៅជួរមុខ ប្រឈមនឹងផលប៉ះពាល់នៃវិបត្តិអាកាសធាតុ ហើយមុខសញ្ញាគ្រោះថ្នាក់ធម្មជាតិ ដែលពួកគេជួបប្រទះ មានចាប់ពីរលកកម្ដៅ គ្រោះរាំងស្ងួត ទឹកជំនន់ រហូតដល់ភ្លើងឆេះព្រៃ។
លោកបានបន្តថា៖ «វិបត្តិនេះប៉ះពាល់លើសលប់ដល់កុមារ និងក្មេងជំទង់ ដែលងាយរងគ្រោះជាងគេ ដែលធ្វើអោយស្ថានភាព វិសមភាពនាពេលបច្ចុប្បន្នកាន់តែមានកម្រិតធ្ងន់ធ្ងរ និងធ្វើអោយអន្តរាយដល់វឌ្ឍនភាព ដែលសម្រេចបានក្នុងរយ:ពេលប៉ុន្មានទសវត្សចុងក្រោយនេះ។»
ទោះបីជាយ៉ាងណា របាយការណ៍ដដែលបានអោយដឹងថា ការវិនិយោគលើសេវាសង្គមនៅកម្ពុជាជាពិសេស លើការបង្កើនលទ្ធភាពទទួលបានទឹកស្អាត និងអនាម័យ សេវាសុខភាព និងអាហារូបត្ថម្ភ ការអប់រំ និងសេវាគាំពារសង្គម អាចនាំមកនូវ ការប្រែប្រួលគួរឱ្យកត់សម្គាល់ដល់លទ្ធភាពក្នុងការការពារអនាគតកុមារទាំងនេះ ពីផលប៉ះពាល់នៃការប្រែប្រួលអាកាសធាតុ។
បើតាមលោកស្រី ម៉ី នារី ដែលជាអ្នកបច្ចេកទេសផ្នែកអាហាររូបត្ថម្ភ នៃអង្គការសម្ព័ន្ធសុខភាពកុមារ និងសុខភាពបន្តពូជ រ៉ាឆា បានលើកឡើងថា កុមារគប្បីទទួលបាននូវការថែទាំសុខភាពជាចាំបាច់ និងផ្ដល់អាហាររូបត្ថម្ភគ្រប់គ្រាន់ដល់ពួកគេ ហើយថា សព្វថ្ងៃ អង្គការរបស់លោកស្រីបាននិងកំពុងបណ្ដុះបណ្ដាលអាណាព្យាបាលរបស់កុមារ ដើម្បីយល់ដឹងពីបញ្ហាទាំងនេះ។
ដោយសារកុមារនៅកម្ពុជាប្រឈមមុខខ្ពស់នឹងបញ្ហាខ្វះទឹក គ្រោះទឹកជំនន់តាមដងទន្លេ និងជំងឺឆ្លងតាមមេរោគចម្លង រួមផ្សំ នឹងទម្លាប់ផ្តល់អាហារពុំបានត្រឹមត្រូវ សេវាទឹកស្អាត និងអនាម័យមិនល្អ ភាពក្រីក្រ និងការខ្វះការអប់រំរបស់ម្តាយ គឺជាមូលហេតុធំៗមួយចំនួន ដែលនាំឲ្យកុមារពុំទទួលបានសារធាតុចិញ្ចឹមគ្រប់គ្រាន់ ជាហេតុនាំអោយកុមារងាយប្រឈមនៅពេលមានបម្រែបម្រួលអាកាសធាតុ៕
សូមបញ្ជាក់ថា ដើម្បីកាត់បន្ថយនូវបញ្ហាខាងលើ យូនីសេហ្វស្នើរបានអោយរដ្ឋាភិបាល ក្រុមហ៊ុន និងតួអង្គពាក់ព័ន្ធនានា បញ្ជ្រាបការយល់ដឹង និងផ្ដល់អោយកុមារនូវការអប់រំអំពីអាកាសធាតុនិងការការពារបរិស្ថាន ហើយបង្កើនការវិនិយោគ ដើម្បីធ្វើយ៉ាងណាដើម្បីអោយពួកគេ កាន់តែបន្សាំទៅនឹងអាកាសធាតុ ក៏ដូចជាប្រព័ន្ធទឹកស្អាត អនាម័យ សេវាសុខភាព នឹងសេវាអប់រំជាដើម៕
