ភ្នំពេញ៖ លោក ទួន វណ្ណៈ តំណាងប្រជាពលរដ្ឋប្រាប់វិទ្យុស្រ្តីនៅថ្ងៃទី០៧ ខែកញ្ញា នេះថា ខាងក្រុមហ៊ុនបានដាក់គ្រឿងចក្រមកឈូសឆាយលើដីស្រែរបស់ប្រជាពលរដ្ឋ ដែលកំពុងមានទំនាស់មិនទាន់បានដោះស្រាយនៅឡើយ។ លោកបញ្ជាក់ថា សកម្មភាពឈូសឆាយនេះមានការការពារពីកម្លាំងសមត្ថកិច្ចប្រហែលជា ៦០០ នាក់ដើម្បីការពារខ្លាចប្រជាពលរដ្ឋតវ៉ារំខានដូចកាលពីពេលមុនៗ។
លោកបញ្ជាក់ថា អាជ្ញាធរបានចេញសេចក្តីជូនដំណឹងដល់ប្រជាពលរដ្ឋដោយបញ្ជាក់ថា ការឈូសឆាយនេះគឺដើម្បីកាយកាត់ផ្តាច់ផ្លូវ ៥៤ ពីចំណុច៩០ ដល់ចំណុច ៩២ ដើម្បីរំដោះទឹក។
ទាក់ទងករណីនេះ វិទ្យស្រ្តីពុំទាន់អាចសុំការបំភ្លឺបន្ថែមពីតំណាងក្រុមហ៊ុន OCIC គឺ លោក ជូ កុកសាយ និងលោក ស៊ឹម គឹមស៊ុន អធិការរងស្រុកកណ្តាលស្ទឹង បានទេនៅថ្ងៃនេះ។
យ៉ាងណាតំណាងប្រជាពលរដ្ឋយល់ថា ការធ្វើសកម្មភាពលើដីទំនាស់មានទាំងគ្រឿងចក្រ និងកម្លាំងសមត្ថកិច្ចច្រើនបែបនេះ ជារូបភាពមួយដាក់ការគំរាមកំហែងដល់ប្រជាពលរដ្ឋកុំឱ្យហ៊ានតវ៉ាជាមួយអាជ្ញាធរ។
សូមស្តាប់ការលើកឡើងរបស់លោក ទួន វណ្ណៈ បន្ថែម
កាលពីពេលថ្មីនេះ តំណាងក្រុមហ៊ុនOCIC ជាក្រុមហ៊ុនទទួលសិទ្ធិអភវិឌ្ឍន៍ព្រលានយន្តហោះថ្មីនៅស្រុកកណ្តាលស្ទឹង ខេត្តកណ្តាលធ្លាប់បានប្រាប់វិទ្យុស្រ្តីថា ខាងក្រុមហ៊ុនធ្វើការឈូសផ្តាច់ផ្លូវនេះ គឺជាផ្នែកមួយនៃការសាងសង់របស់ក្រុមហ៊ុនព្រលានយន្តហោះដែលមិនស្ថិតក្នុងដីទំនាស់ទេ។
សូមបញ្ជាក់ថា ក្រុមហ៊ុន អូ.ស៊ី.អាយ.ស៊ី (OCIC) របស់លោក ពុង ឃាវសែ បានទទួលសិទ្ធិសាងសង់ព្រលានយន្តហោះខ្នាតអន្តរជាតិមួយស្ថិតក្នុងស្រុកកណ្ដាលស្ទឹង ខេត្តកណ្ដាល។ តាមគម្រោង ក្រុមហ៊ុននឹងសាងសង់រួចរាល់នៅ ឆ្នាំ២០២៣។ ព្រលានយន្តហោះថ្មីនេះ វិនិយោគក្នុងទឹកប្រាក់ប្រមាណជាងមួយពាន់ប្រាំរយលានដុល្លារ (១.៥០០លាន) លើផ្ទៃដីជិតបីពាន់ហិកតា។
