អាជ្ញាធរអប្សរាឱ្យដឹងថា ចំនួនភ្ញៀវទេសចរបរទេសចូលទស្សនានៅរមណីយដ្ឋានអង្គរ ប្រចាំខែតុលា និងរយៈពេល ១០ ខែ
ក្នុងឆ្នាំ២០១៥នេះ មានការកើនឡើង បើប្រៀបធៀបទៅនឹងខែដូចគ្នា នៅឆ្នាំ២០១៤។
យោងតាមសេចក្ដីប្រកាសព័ត៌មាន របស់អាជ្ញាធរជាតិអប្សរា ចុះនៅថ្ងៃទី៣ ខែវិច្ឆិកា ឆ្នាំ២០១៥ ស្ដីពី៖ «ស្ថិតិភ្ញៀវទេសចរបរទេសនៅរមណីយដ្ឋានអង្គរប្រចាំខែ ខែតុលា និង១០ខែ ឆ្នាំ២០១៥» បានឱ្យដឹងថា ចំនួនភ្ញៀវទេសចរទិញបណ្ណចូលទស្សនារមណីយដ្ឋានអង្គរ ប្រចាំខែតុលា ឆ្នាំ២០១៥ មានចំនួនភ្ញៀវ ១៥៣,៣០៨នាក់ បើប្រៀបធៀបនឹងខែតុលា ឆ្នាំ២០១៤ កើនឡើង៤.៩ភាគរយ។ ក្នុងនោះចំណូលដុល នៃចំនួនសំបុត្រ ដែលលក់បានសរុបមាន ៤,៣៨១.០៤០ ដុល្លារ បើប្រៀបធៀប នឹងខែតុលា ឆ្នាំ២០១៤ កើនឡើង ៤.៥២ ភាគរយ។
ជាមួយគ្នានេះដែរ សេចក្ដីប្រកាសព័ត៌មានដដែលបន្តថា ចំនួនភ្ញៀវទេសចរ ដែលបានចូលមកទស្សនា នៅរមណីយដ្ឋានអង្គរ ក្នុងរយៈពេល ១០ ខែ នៅឆ្នាំ ២០១៥ មានចំនួនភ្ញៀវ ១,៦៧៧,៣៥២នាក់។ បើប្រៀបធៀបនឹង១០ ខែ ក្នុងឆ្នាំ ២០១៤ ចំនួនភ្ញៀវទេសចរណ៍រយៈពេល ១០ ខែ នៅឆ្នាំ ២០១៥ កើនឡើង ២.០៥ ភាគរយ។
ទន្ទឹមនឹងនោះ ចំណូលដុលនៃចំនួនសំបុត្រដែលលក់បានមានចំនួនសរុប ៤៧,៦៨១,០៨០ ដុល្លារ បើប្រៀបធៀបនឹង ១០ ខែ ឆ្នាំ ២០១៤ កើន ០.៦២ ភាគរយ។ អាជ្ញាធរជាតិអប្សរាឱ្យដឹងថា ដើម្បីទទួល បានព័ត៌មានលម្អិតស្ដីពីស្ថិតិភ្ញៀវទេសចរបរទេស ចូលទស្សនារមណីយដ្ឋានអង្គរ ប្រចាំថ្ងៃ សូមចូលទៅក្នុងគេហទំព័រផ្លូវការរបស់អាជ្ញាធរជាតិអប្សរា www.apsaraauthority.gov.kh និង អាចចូលមើលតាមរយៈគណនីហ្វេសប៊ុក (Facebook) ដែលមានឈ្មោះថា អាជ្ញាធរជាតិអប្សរា៕
