ក្រុមគ្រួសារសកម្មជនការពារបរិស្ថាននៃអង្គការចលនាមាតាធម្មជាតិ បានស្នើឲ្យរដ្ឋាភិបាលទម្លាក់ការចោទប្រកាន់ សកម្មជនការពារបរិស្ថាន និងតំណាងសហគមន៍អារ៉ែង ឲ្យមានសេរីភាពវិញ។ ការស្នើសុំនេះធ្វើឡើងនៅក្នុងសន្និសីទសារព័ត៌មាន នៅព្រឹកថ្ងៃទី ០៤ ខែវិច្ឆិកា ឆ្នាំ២០១៥នេះ នៅភោជនីដ្ឋាន ទន្លេបាសាក់ រាជធានីភ្នំពេញ ខណៈដែលសាលាដំបូងខេត្តកោះកុងកំពុងបើកសវនាការទៅលើ យុវជនរបស់អង្គការចលនាធម្មជាតិទាំងបីនាក់នោះ ។
ថ្លែងក្នុងសន្និសីទកាសែត ដែលបានរៀបចំឡើងនៅភោជនីដ្ឋាន ទន្លេបាសាក់នា ថ្ងៃទី ០៤ ខែ វិច្ឆិកានេះ អ្នកស្រី សំ សំណាង ជាម្តាយរបស់លោកទ្រី សុវិគា ដែលកំពុងជាប់ឃុំនៅពន្ធនាគារ បានស្នើរឱ្យមានការដោះលែងកូនប្រុសអ្នកស្រី ជាពិសេសអ្នកស្រីស្នើទៅដល់លោកនាយករដ្ឋមន្ត្រីហ៊ុន សែន ឲ្យជួយរកខុសត្រូវលើករណីនេះផង ។ អ្នកស្រីថាកូនប្រុសអ្នកស្រីមិនបានធ្វើអ្វីខុសច្បាប់ឡើយ រូបគេគ្រាន់តែទៅការពារសម្បត្តិធម្មជាតិតែប៉ុណ្ណោះ។ អ្នកស្រីរំពឹងថា កូនប្រុសអ្នកស្រីនឹងមានសេរីភាពវិញនាពេលឆាប់ៗនេះ។
ចំណែកអ្នកស្រី ថា សុភា ភរិយារបស់លោកស៊ឹម សំណាង បានប្រាប់ថា ក្រោយពីប្តីអ្នកស្រីជាប់ពន្ធនាគារ គ្រួសារអ្នកស្រីបានជួបបញ្ហាជីវភាពយ៉ាងខ្លាំង ព្រោះប្តីអ្នកស្រីគឺជាជំហរគ្រួសារ។ ម្យ៉ាងវិញទៀត ប្តីអ្នកស្រីក៏កំពុងមានជំងឺនៅក្នុងខ្លួនផងដែរ។ ដូចគ្នានឹង អ្នស្រី សំ សំណាង អ្នកស្រី ថា សុភា បានស្នើសុំឱ្យរដ្ឋាភិបាលធ្វើអន្តរាគមន៍យ៉ាងណា ដោះលែងប្តីអ្នកស្រី និងអ្នកទាំងបីផ្សេងទៀតឱ្យបាននៅក្រៅឃុំផងដែរ។
លោកថន រដ្ឋា ជាសកម្មជនការពារធនធានធម្មជាតិរបស់អង្គការចលនាមាតាធម្មជាតិ បានលើកឡើងថា អ្វីដែលតុលាការខេត្តកោះកុង បានចោទប្រកាន់ទៅលើយុវជនទាំងបីនាក់ គឺជារឿងមិនសមស្រប ហើយយុវជនទាំងនោះមិនបានធ្វើខុសដូចអ្វីដែលក្រុមហ៊ុនចោទប្រកាន់ឡើយ ពួកគេគ្រាន់តែប្រើប្រាស់សិទ្ធិ ជាប្រជាពលរដ្ឋខ្មែរ ដែលមានចែងក្នុងរដ្ឋធម្មនុញ្ញតែប៉ុណ្ណោះ។
សូមជំរាបថា កាលពីថ្ងៃទី១៧ ខែសីហា ឆ្នាំ២០១៥ យុវជនអង្គការមាតាធម្មជាតិ ៣នាក់ ត្រូវបាន កម្លាំងនគរបាលខេត្តកោះកុង ឃាត់ខ្លួន ខណៈដែលពួកគេតវ៉ាទាមទារឱ្យបញ្ឈប់ ការធ្វើអាជីវកម្មរបស់ក្រុមហ៊ុនបូមខ្សាច់ នៅក្នុងខេត្តកោះកុង ។ យុវជនទាំង៣រូប រួមមាន៖ ឈ្មោះ សាន់ ម៉ាឡា អាយុ ២៣ឆ្នាំ ទ្រី សុវីគា អាយុ២៤ឆ្នាំ និង ស៊ឹម សំណាង អាយុ ២៦ឆ្នាំ។ ការឃាត់ខ្លួនយុវជនខាងលើ ធ្វើឡើងតាមបណ្តឹងរបស់ក្រុមហ៊ុន ។ ពួកគេត្រូវបានតុលាការសម្រេចឃុំខ្លួន នៅពន្ធនាគារខេត្តបណ្តោះអាសន្ន ដោយចោទប្រកាន់ពីបទ «គំរាមកំហែងថា នឹងធ្វើឲ្យខូចខាត ដែលភ្ជាប់បញ្ជាអ្វីមួយ» តាមមាត្រា ៤២៤ នៃក្រមព្រហ្មទណ្ឌ៕
