រដ្ឋាភិបាលអូស្ត្រាលី តាមរយៈស្ថានទូតរបស់ខ្លួនប្រចាំនៅកម្ពុជា បានប្រកាសផ្ដល់ជំនួយជាង៣លាន ដុល្លារអាមេរិកដល់កម្ពុជា ដែលជំនួយនេះ ដើម្បីជួយកម្ពុជា ស្ដារសេដ្ឋកិច្ច និង ជួយគ្រួសារក្រីក្រនៅកម្ពុជា។
តាមសេចក្ដីប្រកាសព័ត៌មាន ដែលបានផ្សព្វផ្សាយ ក្នុងផេករបស់ កម្មវិធីអភិវឌ្ឍន៍អង្គការសហប្រជាជាតិ ប្រចាំនៅកម្ពុជា គឺជំនួយ មានសាច់ប្រាក់ ៣លាន១៥ម៉ឺនដុល្លារ ហើយជំនួយនេះត្រូវបានដាក់បញ្ជូលក្នុងគំរោងកម្មវិធីអភិវឌ្ឍន៍អង្គការសហប្រជាជាតិក្នុងក្រមខណ្ឌ ជួយកម្ពុជា កាត់បន្ថយផលប៉ះពាល់ នៃសេដ្ឋកិច្ចកម្ពុជាដោយសារកូវីដ-១៩ និងជួយគ្រួសារក្រីក្រនៅកម្ពុជា។ តាមប្រភពដដែលនេះ តំណាងរដ្ឋាភិបាល អូស្ត្រាលី បានចុះហត្ថលេខា នៃការផ្ដល់ជំនួយនេះជាមួយ កម្មវិធីអភិវឌ្ឍន៍អង្គការសហប្រជាជាតិប្រចាំនៅកម្ពុជាកាលពីថ្ងៃទី១០ឧសភា។
ឯកអគ្គរដ្ឋទូតអូស្ត្រាលី ប្រចាំនៅកម្ពុជា លោក Pablo Kang បាននិយាយក្នុងសេចក្ដីប្រកាសព័ត៌មាននេះថា ជំនួយនេះ គឺជាករណីបន្ទាន់ ដែលជួយកម្ពុជាស្ដារសេដ្ឋកិច្ច និងជួយដល់ពលរដ្ឋក្រីក្រ ។
លោក Pablo Kang – ឯកអគ្គរដ្ឋទូតអូស្ត្រាលី ប្រចាំនៅកម្ពុជា
លោក Pablo Kang បានបញ្ជាក់ដូចនេះថា៖ កូវីដ-១៩ នាំមកនូវបញ្ហាប្រឈមបន្ទាន់ចំពោះមុខជាច្រើនដល់សេដ្ឋកិច្ចកម្ពុជា ក៏ដូចជាជីវភាពរស់នៅរបស់ប្រជាពលរដ្ឋ។ ក្នុងនាមជាដៃគូ និងមិត្តភ័ក្រ្តយូរអង្វែងរបស់ប្រទេសនេះ យើងចង់ធ្វើអ្វីដែលអាចធ្វើទៅបាន ដើម្បីសម្រាលផលប៉ះពាល់ទាំងនេះ ជាពិសេសផលប៉ះពាល់មកលើក្រុមមនុស្សដែលងាយរងគ្រោះជាងគេ។ តាមរយៈការសហការជាមួយនឹង UNDP យើងក៏កំពុងបង្កើនថវិកាគាំទ្រ សម្រាប់ការងារដែលចាំបាច់នៅពេលបច្ចុប្បន្ន ដើម្បីជួយកម្ពុជាក្នុងការត្រៀមស្ដារសេដ្ឋកិច្ចឡើងវិញឱ្យបានឆាប់រហ័ស ប្រកបដោយបរិយាបន្ន បន្ទាប់ពីការរាតត្បាតជាសកលនេះ។
តាមសេចក្ដីប្រកាសនេះ គឺរដ្ឋាភិបាល អូស្ត្រាលីបានហៅថាជា កញ្ចប់ជំនួយបន្ថែមសម្រាប់កម្ពុជា។
អូស្ត្រាលីអះអាងថា អំឡុងកម្ពុជា ឆ្លងរីករាលដាលជំងឺកូវិដ គឺរដ្ឋាភិបាល អូស្ត្រាលី ដែលមានកម្មវិធីអភិវឌ្ឍន៍អង្គការសហប្រជាជាតិជាដៃគូ គឺសាច់ប្រាក់ ៧១លាន៥សែនដុល្លារអូស្ត្រាលី ត្រូវបានជួយដល់កម្ពុជាគឺសម្រាប់ឆ្នាំ ២០២០ និង ២០២១។ គិតមកដល់ពេលនេះ មូលនីធិជំនួយរបស់អូស្ត្រាលី ដែលផ្ដល់អោយកម្ពុជា គឺមាន ២៩០លានដុល្លារអាមេរិក ដោយបានជួយដល់គ្រួសារក្រីក្រនៅកម្ពុជា ៦៩៣ពាន់គ្រួសារ។
តំណាងកម្មវិធីអភិវឌ្ឍន៍អង្គការសហប្រជាជាតិ ប្រចាំកម្ពុជា លោក Nick Beresford បាននិយាយថា អូស្ត្រាលី គឺជាដៃគូសហប្រតិបត្តិដ៏សំខាន់មួយ ក្នុងការជួយអភិវឌ្ឍន៍ ប្រទេសកម្ពុជាតាមរយៈគំរោងទាំងឡាយរបស់ កម្មវិធីអភិវឌ្ឍន៍អង្គការសហប្រជាជាតិ ។
លោក Nick Beresford – តំណាងកម្មវិធីអភិវឌ្ឍន៍អង្គការសហប្រជាជាតិ ប្រចាំកម្ពុជា
អូស្ត្រាលី ជាសហគមន៍អន្តរជាតិ ឈានមុខគេមួយដែរ ក្នុងចំណោមប្រទេសជាច្រើនទៀត មានសហរដ្ឋអាមេរិក ជប៉ុន បារាំង អាល្លឺម៉ង់ ស៊ុយអែត និងសហភាពអឺរ៉ុប ក្នុងការជួយស្ដារនិងអភិវឌ្ឍន៍ប្រទេសកម្ពុជាឡើងវិញ បន្ទាប់ពីរាជាណាចក្រ មួយនេះ បញ្ចប់សង្រ្គាមស៊ីវិល នៅឆ្នាំ១៩៩១៕
